Pagpangandam alang sa akong Umaabot nga mga Tahas isip Bana ug Amahan

Ni Christopher Bingham

Ang tagsulat nagpuyo sa Utah, USA.

Isip single adult, tuyo gyod nako nga magpakabuhi karon sa paglig-on sa akong umaabot nga pamilya.

Imahe

lalaki nga nagsulat sa notebook

Sa sayo nga bahin sa akong mga katuigan sa pagkatin-edyer, mitambong ko og training camp sa pagkapangulo sa kabatan-onan. Sa tibuok semana, usa sa akong mga lider sa Young Men, si Bran Thelin, nakakita og daghang minugbo nga sulat nga gisulat sa iyang asawa, si Julie, nga iyang gitagoan sulod sa iyang mga hiposanan. Gipaambit niya ang pipila niadtong malumo ug makapausbaw sa pagtuo nga mga mugbong sulat ngari kanmo. Nakadayeg ko ug nabatyagan ang gugma sa yano ug mapinanggaong buhat sa iyang asawa nga iyang gihimo sa ilang kaminyoon. Bisan og si Bryan ug Julie wala magkauban sa pisikal niining semanaha, ang ilang kaminyoon nalig-on.

Sa wala madugay isip misyonaryo sa Argentina, nakabantay ko og usa ka magtiayon sa usa sa akong mga area kinsa puno sa gugma ni Kristo. Sa matag higayon nga makakita ko nilang duha nga magkuyog, mosanag ang ilang pagkamaayo. Akong mabatyagan ang kadako sa ilang pag-amuma sa usag usa ingon man usab ngadto sa tanan nga ilang ikatagbo. Akong gibati ang ilang sinseridad ngari kanako sa matag higayon nga mag-istorya mi. Gusto kong mogahin og mas daghang panahon sa ilang presensya tungod sa gugma ni Kristo nga namugna gikan kanila.

Ang mga ehemplo sama niini nga magtiayon mipanalangin sa akong kinabuhi. Nakatabang sila nako nga makakita unsaon nako sa paglig-on ang kaugalingon nakong umaabot nga kaminyoon ug pamilya.

Usa ka Rekord sa mga Impresyon gikan sa Espiritu

Gilantaw nako ang unahan dala ang pagpaabot sa adlaw na ako makatukod og usa ka lig-on nga kaminyoon. Hinoon, akong nabantayan nga isip single adult, wala ko magkinahanglan nga maghulat hangtod nga maminyo ko aron makapangita ug makat-on og mga paagi sa pagtabang nga makaandam alang sa akong umaabot nga mga tahas isip bana ug amahan.

“Makakat-on kamo sa importante nga kinahanglanong mga butang pinaagi sa unsay inyong madungog ug makita ug, ilabi na, kon unsay inyong pagbati, sigon sa giaghat sa Espiritu Santo,” mitudlo si Elder Richard G. Scott (1928–2015) sa Korum sa Napulog Duha ka Apostoles.

Mipadayon siya: “Isulat diha sa usa ka luwas nga dapit ang importanting mga butang nga inyong nakat-unan gikan sa Espiritu. Inyong makita nga kon isulat ninyo ang bililhong mga impresyon, sa kasagaran mangabot ang daghan pa.”¹

Ang mga impresyon nga makatabang sa paglig-on sa akong pamilya miabot kanako sa managlahi nga panahon. Sa pipila ka higayon mibati ako niini nga mga impresyon samtang akong nasaksihan ang maayong mga ehemplo sa akong kinabuhi. Sa ubang higayon mibati ako sa impresyon samtang naminaw sa usa ka pakigpulong o nagtuon sa mga kasulatan. Matag usa kanato makadawat og mga impresyon sa daghan nga lahi-lahi nga paagi.

Kon makadawat ko og usa ka impresyon o makadungog og ideya mahitungod sa pipila ka butang nga akong mahimo, irekord nako kini sa akong notebook. Sama pananglit, duna koy usa ka notebook nga sulatan nako sa mga ideya aron makatabang sa paglig-on sa hugot nga pagtuo sa mga bata, ug duna koy laing notebook nga dunay mga ideya aron makatabang sa paglig-on sa akong kaminyoon. Gusto nakong himoon kini nga mga notebook isip online nga mga dokumento aron kini akong ma-access gikan sa akong phone bisan kanus-a ug bisan asa, apan kini nga bulohaton mahimo usab nga himoon sa pisikal nga mga notebook. Kini nga mga koleksiyon sa mga ideya nahimo nga panalangin kanako samtang naningkamot ko nga makaandam sa umaabot nako nga mga tahas.

Mga Sanglitanan sa mga Notebook

Si Presidente Jean B. Bingham, Kinatibuk-ang Presidente sa Relief Society, mipaambit nga “ang importanting tahas sa mga ginikanan mao ang pagtabang sa ilang mga anak nga mokonetar sa langit, mapalambo ang mga hiyas base sa ebanghelyo aron malig-on para sa mga hagit sa kinabuhi.”² Mao nga, diha sa usa sa akong mga notebook, akong girekord ang mga ideya nga maghatod sa maayong kaugmaon sa akong mga anak nga magbaton og pundasyon sa hugot nga pagtuo sa Langitnong Amahan ug ni Jesukristo. Ang pipila niining mga ideya naglakip usab sa mga tradisyon nga gusto nakong himoon nga makatabang namo nga mapalawom ang among mga pagpamatuod. Kini nga notebook naglakip og mga ideya nga sama niini:

Mogahin og lima ka minutos matag adlaw uban sa inyong mga anak aron matabangan sila nga makasulat sa mga panalangin gikan sa Langitnong Amahan diin sila mapalasamaton. Kini nga kalihokan pwedeng usahon sa pamilya nga pagtuon sa kasulatan.
Kon mangutana kamo sa inyong gamay nga anak kon kinsa ang maong propeta ug dili sila sigurado, pagbitay og mga litrato sa propeta gikan sa Higala nga magasin nga makita sa libot sa kwarto.
Paghimo og regular nga temple trip sa paghimo og mga bunyag alang sa mga patay kon ang inyong mga anak igo na ang pangidaron, paghimo og bukas nga pagdapit alang sa mga silingan ug mga higala nga mokuyog kon motugot ang gilay-on. Usa ka nindot nga tradisyon nga sination sa tanan panahon sa mga Kapaskohan mao ang pagtinabangay og pangita og mga ngalan sa pamilya ug dad-on kini sa templo.
Kon duna kamoy anak nga nag-andam nga moserbisyo og misyon, hangyoa sila sa paghimo og personal nga mga sulat sa pagpamatuod ngadto sa ilang mga igsoon sa higayon nga magsugod na ang ilang misyon.
Alang sa mga pagsaulog sa adlaw nga natawhan, pasulata ang mga sakop sa pamilya ug mga bisita og mga kalidad nga ilang ganahan mahitungod sa o kasinatian nila kauban sa tawo nga nag-birthday. Human mabasa og dungan ang mga handomanan ug uban sa pagtugot sa maong tawo, i-upload ang kopya sa mga papel ngadto sa Handomanan nga seksiyon sa rekord sa Family Tree sa maong tawo diha sa FamilySearch.org alang sa ugma damlag nga pag-akses o kon nagkinahanglan sila og butang nga pangdasig.

Dunay dili maihap nga mga ideya, ug kon magtinguha kamo sa langitnong giya, aghaton kamo sa pagkahibalo unsay irekord samtang mag-andam kamo sa umaabot ninyong pamilya.

Lain pa nga sanglitanan mao ang pagrekord og mga ideya alang sa paghimo og usa ka palibot diin maanaa ang Espiritu. Ang pagtabang sa mga bata nga makat-on sa pag-ila sa mga pag-aghat sa Espiritu Santo mahinungdanon kaayo. Si Presidente Russel M. Nelson mitudlo nga: “Samtang ang kasamok modagsang lib[o]t kanato, kita kinahanglan nga mohimo og mga dapit diin kita luwas, sa temporal ug sa espiritwal nga paagi. Kon ang inyong panimalay mahimong personal nga santuwaryo sa hugot nga pagtuo—diin ang Espiritu makapuyo—ang inyong panimalay mahimong unang depensa.”³

Hunahunaa ang palibot sa ebanghelyo nga gusto ninyong ugmaron. Matag usa kanato makatutok sa tinuyo nga paagi sa pagpalig-on sa panimalay diin anaa ang Espiritu. Wala kinahanglana nga ako minyo aron makasugod og ingon niini nga matang sa palibot. Talagsaon kini nga oportunidad ang pagtukod og usa ka panimalay nga magdapit sa Espiritu. Matag usa kanato makagamit sa atong kabubut-on aron mapasiugdahan ang usa ka palibot nga nakasentro-sa-ebanghelyo. Mahimo kitang morekord sa mga ideya aron sa paghimo niini nga palibot, ug kita mahimong molihok niini karon.

Pangandami ang Pagdawat og Inspirasyon ug Dayon Lihokon

Dihang si Joseph Smith ug Sidney Rigdon nakadawat og panan-awon bahin sa tulo ka ang-ang sa himaya, gisugo sila makatulo ka higayon sa pagsulat “samtang [sila] diha pa ubos sa gahom sa Espiritu” (Doktrina ug mga Pakigsaad 76:28, 80, 113). Ang pagrekord sa espirituwal nga mga impresyon sa ingon niini nga paagi mipanalangin sa akong kinabuhi. Ang pagsulat sa mga impresyon diha dayon kon kita makadawat niini makatabang nga mapreserba ang pagkaklaro sa mensahe. Mapreserba usab niini ang mensahe alang sa umaabot nga pagpaambit niini ngadto sa uban. Kon atong isulat kini nga mga impresyon, kita nagsaksi ngadto sa Langitnong Amahan nga kita nagpakabana mahitungod sa mga impresyon nga atong nadawat ug nga kita andam nga modawat pa og daghan. Mapalig-on kini samtang atong lihokon ang mga impresyon nga posibling buhaton karon.

Kining tinuyo nga mga buhat karon nagtabang nga malig-on ang akong umaabot nga pamilya. Napanalanginan ako pinaagi sa pagtigom sa mga impresyon sa mga paagi nga ako mas maandam aron mapalig-on ang umaabot nako nga kaminyoon ug mapalig-on ang hugot nga pagtuo sa akong umaabot nga mga anak. Dapiton ko kamo sa pagkonsiderar og mga paagi nga kamo maandam alang sa inyong tahas isip usa ka kapikas ug ginikanan. Kon kita mobuhat niini, nasayod ko nga ang Langitnong Amahan ug si Jesukristo mogiya kanato sa atong matarong nga mga paningkamot.