Mas Magpaduol ngadto ni Jesukristo

Sa pahina 4, inyong magamit ang mga pagtulun-an gikan ni Elder David A. Bednar aron sa pagtudlo sa inyong pamilya sa importansiya sa mga ordinansa sa templo. Nagsunod niana nga artikulo mao ang usa ka koleksiyon sa mga pagpamatuod gikan sa mga miyembro sa tibuok kalibotan mahitungod sa bag-o nga mga templo sa ilang mga dapit. Ipakita sa inyong pamilya ang tsart sa pahina 12 aron makita ang pagtubo sa gidaghanon sa mga templo nga bag-ohay lang gipahibalo. Sa unsang paagi ang mga ordinansa sa templo mas makapaduol sa mga indibidwal ug mga pamilya ngadto sa Langitnong Amahan ug kang Jesukristo?

Magamit ninyo ang Mga Sukaranan sa Ebanghelyo nga artikulo sa pahina 22 aron sa pagtudlo kon unsa ang mga kasulatan ug kon nganong importante ang pagtuon niini ug sa mga pagtulun-an sa mga propeta sa modernong panahon.

Sa pahina 40, si Elder Ciro Schmeil naghisgot og mga ehemplo sa mga tawo nga nahimong mga instrumento sa mga kamot sa Ginoo. Basaha ang pipila ka kinutlo gikan sa artikulo ug hisgoti uban sa mga sakop sa pamilya kon sa unsang paagi sila mahimong bukas sa mga pag-aghat sa Espiritu ug mahimong mga instrumento sa mga kamot sa Ginoo.

Ester 4–7

Si Ester nagmaisogon sa pagduol sa hari ug pagluwas sa iyang katawhan.

1. Lingkod nga magporma og lingin ug pangutan-a ang usa ka sakop sa pamilya sa paghingalan og bayani sa kasulatan kinsa maisogon, magsulti og usa ka paagi diin ang tawo nagpakita og kaisog (pananglit: Ester, kaisog nga mosulti).

2. Ang sunod nga tawo diha sa lingin mosulti sa ngalan sa unang bayani ug dayon mopili og laing tawo diha sa kasulatan nga iyang gihunahuna nga maisogon ug mopasabot kon ngano.

3. Padayon diha sa lingin, nganlan ang matag karakter sa kasulatan nga napili ug magdugang og bag-o nga karakter. Padayon sa pagdula hangtod ang tanan sa pamilya adunay labing menos usa ka turno.

Panaghisgot: Sa unsang paagi kita mahimong maisogon sa atong panahon ug sa atong piho nga mga kahimtang? Sa unsang paagi kita makapanalangin sa kinabuhi sa uban kon maisogon kitang molihok ug mobuhat sa husto nga butang? 

2 Mga Hari 6:8–23

Basaha ang istorya ni Eliseo ug sa batan-on nga sulugoon diha sa 2 Mga Hari 6:8–23.

1. Pagkuha og nipis nga tukog nga dali rang mabali.

2. Hagita ang usa ka tawo sa pagbali niini.

3. Pundoka ang 10 o mas daghan pa nga mga tukog. Hagita ang samang tawo sa pagbali sa grupo sa mga tukog nga dili ibulag ang bisan unsa.

4. Nganong mas lisod ang hagit sa ikaduhang higayon?

5. Basaha ang 2 Mga Hari 6:16-17: “Ayaw kahadlok kay ang ania uban kanato mas daghan kay niadtong uban kanila. Unya nag-ampo si Eliseo ug miingon, ‘O Ginoo, buksi ang iyang mata aron siya makakita’. Busa gipakita sa Ginoo ang batan-ong sulugoon ni Eliseo sa nagkatag nga mga kabayo ug mga karwahi nga kalayo nga naglibot kang Eliseo.”

6. Kinsa ang nakita ni Eliseo ug sa batan-ong sulugoon nga nanalipod kanila?

7. Basaha ang mosunod: “Sama niana nga sulugoon ni Eliseo, adunay mas daghan pa nga nag-uban kaninyo kay sa niadtong inyong makita nga mibatok kaninyo. Ang pipila kinsa nag-uban kaninyo mahimo nga dili makita sa inyong mortal nga mga mata.” (Henry B. Eyring, “O Kamo nga Anaa sa Pag-alagad,” Liahona, Nob. 2008, 59).

Panaghisgotan: Basaha ang Doktrina ug mga Pakigsaad 84:88. Sa mga panahon nga tingali mobati kita nga nag-inusara, sa unsang paagi kita makasalig nga kita wala nag-inusara? Sa unsang paagi ang Ginoo nanalipod ug nagtabang kanato karon? (Alang sa mga ideya, tan-awa sa Ronald A. Rasband, “Ayaw Kabalaka,” Liahona, Nob. 2018, 18–21.)