Mga Kasulatan: Ang Pulong sa Dios

Ang Daang Tugon maoy usa ka rekord sa mga pakigsabot sa Dios ngadto sa Iyang katawhan sa pakigsaad sa karaang mga panahon. Naglakip kini sa mga pagtulun-an sa mga propeta sama ni Moses, Josue, Isaias, Jeremias, ug Daniel. Bisan tuod kini gisulat mga gatosan ka tuig sa wala pa ang pagkatawo ni Jesukristo, daghang mga propeta sa Daang Tugon nagsulat mahitungod Kaniya.

Ang Bag-ong Tugon nagrekord sa pagkatawo, mortal nga kinabuhi, mga pagtulu-an, ug Pag-ula ni Jesukristo. Naglakip kini sa mga pagtulun-an sa Apostoles ni Kristo ug sa ubang mga disipulo. Ang Bag-ong Tugon makatabang kanato nga makasabot kon unsaon sa pagsunod sa ebanghelyo ni Jesukristo karon.

Ang Basahon ni Mormon usa ka rekord sa ubang mga katawhan kinsa nagpuyo sa karaang Amerika. Naglakip kini sa mga pagtulun-an gikan sa mga propeta, ug ang labing mahinungdanong katuyoan niini mao ang pagkumbinsir sa tanang mga tawo nga si Jesus mao ang Kristo. Si Propeta Joseph Smith mihubad niini gikan sa palid nga mga bulawan pinaagi sa gasa ug gahom sa Dios.

Ang Doktrina ug mga Pakigsaad naglangkob sa mga pagpadayag nga gihatag ngadto ni Joseph Smith ug sa ubang mga propeta sa ulahing mga adlaw. Ang mga pagpadayag naghulagway kon giunsa sa pag-organisar ang Simbahan ni Jesukristo. Kini usab naglangkob sa mahinungdanong mga pagtulun-an sa ebanghelyo mahitungod sa pagkapari, sa mga ordinansa sa ebanghelyo, ug kon unsa ang mahitabo human niini nga kinabuhi.

Ang Perlas nga Labing Bililhon naglakip sa basahon ni Moises, sa basahon ni Abraham, sa pagpamatuod ni Joseph Smith, ug sa mga Artikulo sa Hugot nga Pagtuo sa Simbahan. Naglakip usab kini sa Joseph Smith—Matthew, kabahin sa hubad ni Joseph Smith sa Bag-ong Tugon.

Ang mga propeta nagtudlo kanato sa pagtuon sa mga kasulatan matag adlaw . Ang paghimo sa ingon makatabang sa pagdugang sa atong hugot nga pagtuo ug pagpaduol ngadto sa Langitnong Amahan ug ni Jesukristo. Samtang kita magtuon sa mga kasulatan nga mainampoon, ang Espiritu Santo motabang kanato sa pagkaplag og mga tubag sa atong mga pangutana.

Sa higayon nga ang mga propeta ug apostoles karon mamulong pinaagi sa gahom sa Espiritu Santo, ang ilang mga pulong sama sa kasulatan. Usa ka pananglitan niini mao ang kinatibuk-ang komperensiya. Kita makatuon sa mga pagtulun-an gikan sa komperensiya diha sa Mayo ug Nobyembre nga mga isyu sa Liahona.