“Inubanan sa Giya sa Ginoo,” Liahona, Hulyo 2022.
Mga Tingog sa mga Santos sa Ulahing mga Adlaw
Inubanan sa Giya sa Ginoo
Taliwala sa kalisdanan, nakakat-on ko nga makahimo ko og lisod nga mga butang.
Paghulagway pinaagi ni Stephanie Hock
Isip usa ka nurse nga tig-anestisya sa US Navy Reserve atol sa COVID-19 nga pandemya, gibalhin ko ug gidestino ngadto sa pang-emerhensiya nga ospital sa panggubatan didto sa Jacob K. Javits Convention Center sa Siyudad sa New York, naghatag og personal nga pag-atiman panahon sa labing kagrabe nga pagkatap sa COVID-19 sa siyudad.
Sa dihang misugod ako sa akong mga gimbuhaton, daghang kabalaka ang mipuno sa akong hunahuna. Nabalaka ako pag-ayo mahitungod sa pag-atiman sa mga pasyente ug pagpakigbatok niining makapaluya nga virus.
Gibati nako nga sama kang Nephi, “wala masay[o]d sa sinugdanan sa mga butang nga ako mobuhat” (1 Nephi 4:6). Kini nga hunahuna nakatabang nako nga mosalig sa Langitnong Amahan ug mag-ampo kanunay aron nga ako makadungog sa Iyang tingog, mosunod sa Iyang mga instruksiyon, ug mohatag sa labing maayo nga pag-atiman nga akong mahimo ngadto sa akong mga pasyente.
Atol sa akong unang gabii sa pag-atiman, may usa ka pasyente nga gi-admit nga anaa sa kritikal nga kondisyon. Samtang ang akong mga kauban og ako misugod sa pagsusi sa iyang kahimtang, nakabantay dayon ko nga makahinabi siya sa Espanyol lamang. Ako rang usa didto ang makasulti og Espanyol, nakat-on ko niini sa akong misyon didto sa Venezuela.
Samtang nagsugod ko sa pagpakigsulti sa pasyente, nangutana siya kon ang tanan ma OK ra ba. Ako siyang gipasaligan, gisultihan siya nga iyang nadawat ang labing maayo nga pag-atiman. Nakamatikod ko nga adunay pagsalig ug kahupay sa iyang mga mata. Sa tibuok nga panahon nianang gabii, ako kanunay nga miduaw kaniya, mihimo og pagsusi ug mihatag og mga kalamboan [updates]. Sulod sa pipila ka adlaw, ang iyang kondisyon dako kaayo og kalamboan ug gipagawas siya.
Atol sa akong pagkadestino, daghan kog nahimamat nga pasyente kinsa makasulti lamang og maayo sa Espanyol. Ang akong abilidad sa pagpakigsulti kanila nakatanyag kanila og kahupayan ug kasigurohan panahon sa ilang pagpaayo.
Samtang namalandong ko niini nga kasinatian sa pagtinguha sa langitnong giya aron sa paghatag sa mga pasyente sa labing maayong pag-atiman, napahinumdoman ko sa tambag ni Elder Brook P. Hales sa Seventy. Miingon siya nga ang Langitnong Amahan anaa nakiglabot “diha sa mga detalye sa atong mga kinabuhi” ug nga, “kita maangayan sa makanunayong pagdagayday sa balaan nga giya pinaagi sa impluwens[i]ya ug pagdasig sa Espiritu Santo”1
Akong naamgohan pag-ayo nga ang akong abilidad sa pagsulti og Espanyol sama ra ka bililhon sa akong medikal nga kahibalo. Samtang nag-atiman ko sa uban, ako nakaangkon usab og klaro nga panglantaw nga taliwala sa kalisdanan, ug inubanan sa giya sa Ginoo, makahimo ko og lisod nga mga butang.