Pagbaton sa Kaisog nga Motabang

Ang Dios mogamit kanato aron mohimo og kalainan kon atong buntogon ang kahadlok.

Imahe

duha ka lalaki nga nag-istorya ug nagpahiyom

Isip mga tumutuo, kita adunay dako nga panginahanglan sa kaisog niining mga panahona, bisan sa atong mga kasinatian sa pagpangalagad. Si John (giusab ang mga ngalan) gisangonan sa pagpangalagad kang Peter, usa ka miyembro nga wala gayod mitambong sa mga panagtigom sa ward. Nagpanagana si John bahin sa pagduol kang Peter tungod kay wala pa siya makahimamat niya ug wala makahibalo sa iyang istorya. Apan nakahinumdom sa tambag sa “paghigugma, pagpaambit, ug pagdapit,” nag-ampo si John alang sa giya ug dayon naningkamot nga mahimo unang sinsero nga higala ni Peter. Migahin siya og panahon sa pag-ila-ila kang Peter, uban ang makanunayon nga mga pagbisita, mga tawag sa telepono, ug panagsa nga panlaag aron mamahaw og dungan. Naila-ila gayod ni John si Peter, ug si Peter nakabaton og pagsalig sa ilang panaghigalaay. Kon nagkinahanglan siya og tabang, natural lang alang kaniya nga mangayo og tabang kang John, kinsa malipayong misanong.

Usa ka adlaw, gibati ni John nga naaghat nga tingali andam na si Peter alang sa usa ka imbitasyon nga mobalik sa simbahan. Atol sa usa sa ilang mga panag-istorya, gihisgotan niya ang ideya sa natural nga paagi. Mihunong si Peter. “Wala na ako makasimba sulod sa 17 ka tuig,” miingon siya. “Pero kahibalo ka, tingali mobalik ko.” Sa dihang miabot si Peter diha sa ward, didto na si John aron sa pag-abiabi kaniya ug molingkod tupad kaniya. Mibati nga mapasalamaton si John nga iyang nabuntog ang iyang kahadlok sa sinugdanan. Pinaagi niini nga mga paningkamot, ang duha ka lalaki nakabaton og tinuod nga panaghigalaay nga mipanalangin sa ilang mga kinabuhi.

Pagbaton og Bag-o nga Kaisog

Imahe

Si Ester atubangan sa hari

Esther before the King [Si Ester atubangan sa Hari], ni Minerva Teichert

Ang istorya sa Daang Tugon bahin ni Ester (tan-awa sa Ester 1–10) nagtudlo og daghang baroganan apan tingali labing nailhan isip usa ka istorya sa kaisog. Si Ester usa ka batan-on kaayo nga Judio nga babaye sa dihang gipili siya isip rayna ug mipakita og dakong kaisog sa dihang girisgo niya ang iyang kinabuhi sa pagluwas sa iyang katawhan.

Pinaagi sa panglingla, ang hari nalimbongan sa paghatag og balaod nga ang tanang Judio sa gingharian kinahanglang patyon. Nakahunahuna si Ester og plano nga nagkinahanglan og dakong hugot nga pagtuo ug tingali mao lamang ang kahigayoan sa pag-usab sa hunahuna sa hari.

Sa tradisyon sa iyang kultura, ang pagduol sa hari nga wala giimbitar mahimong mosangpot sa usa ka silot sa kamatayon. Apan maisogon siyang mipadayon sa iyang plano ug mihangyo sa iyang katawhan nga magpuasa dungan niya (tan-awa sa Ester 4:16). Pinaagi sa iyang maisogon nga mga aksiyon ug sa mga aksiyon sa uban, nakombinser niya ang hari nga usbon ang iyang kamandoan. Ang mga pag-ampo ni Ester ug sa iyang katawhan natubag.

Mahimo natong tan-awon si Ester isip usa ka ehemplo sa kaisog, bisan sa pagpangalagad, samtang atong buntogon ang atong mga kahadlok nga ila-ilahon ang usa ka tawo ug tabangan siya sa iyang mga hagit.

Mga Baroganan nga Hunahunaon

Unsay atong mabuhat kon atong makaplagan ang atong mga kaugalingon nga dili komportable kon mangalagad?

Si John nag-ampo alang sa giya sa Dios. Uban sa tabang sa Dios, atong mabuntog ang kahadlok (tan-awa sa Salmo 34:4).
Mahimo usab kitang mag-ampo aron mabati ang gugma sa Ginoo alang sa uban. “Ang gugmang hingpit magwagtang sa tanang kahadlok” (1 Juan 4:18).
Sama ni Ester, kita makahimo sa pagpuasa ug pag-ampo aron sa pagpalig-on sa atong hugot nga pagtuo sa paglihok (tan-awa sa Ester 4:3).
Kita makasalig nga adunay gahom sa pagtuman sa atong mga pakigsaad (tan-awa sa Doktrina ug mga Pakigsaad 110:9). Ang pagsunod sa atong mga pakigsaad makapahimo kanato nga makadawat sa Iyang tabang.
Atong mapalig-on ang atong hugot nga pagtuo pinaagi sa pagpuasa ug sa paghatag og bili sa mga saad sa Ginoo kanato. Ikonsiderar ang mga saad niini nga mga bersikulo: Deuteronomio 31:6; Isaias 41:10; 2 Timoteo 1:7; Doktrina ug mga Pakigsaad 6:33.

Unsa ang Atong Mabuhat?

Pagbaton sa kaisog nga motabang. Bisan kon kini mao ang pag-ila-ila sa usa ka tawo o sa pagdapit kaniya nga mobuhat og usa ka butang nga makapanalangin sa iyang kinabuhi, ang Dios motabang kaninyo.