“Diin ang mga Damgo Mangatuman,” Liahona, Hulyo 2022.
Digital Lamang: Mga Hulagway sa Hugot nga Pagtuo
Diin ang mga Damgo Mangatuman
Gihulga ako sa akong amahan nga palayason sa balay kon magpasakop ako sa Simbahan, apan human ako nabunyagan, ang tanan nga akong nakita mao ang dagkong mga panalangin diha sa akong kinabuhi.
Litrato ni Shyam, iyang asawa, si Radhika, ug ilang anak nga lalaki ni Richard M. Romney
Tungod sa pipila ka rason, usa ka buotang bata nga babaye sa akong ika-10 nga grado sa hayskul mihukom sa paghatag kanako og kopya sa Basahon ni Mormon sa Iningles. Wala ako mahibalo kon unsa kadto. Ang akong papa mihatag kanako og basahon sa gipamubo nga mga istorya sa Biblia sa Hindi sa dihang ako batan-on pa. Busa, sa dihang misulay ako sa pagbasa og pipila ka mga pahina diha sa Basahon ni Mormon ug nakita ang ngalan nga Jesukristo, nahunahuna nako, “ Kini murag hitsura sa Biblia.”
Akong gitipigan ang libro, apan wala ko kini basaha. Dili ako mosulti og Iningles, bisan og nagtuon ako niini sa hayskul. Mga sama niana nga panahon, misugod ako sa pagpangandam alang sa eksamin uban sa akong higala kinsa mihatag kanako sa Basahon ni Mormon. Maayo ako sa akong tanan nga subject gawas sa usa.
Naguol gyod ko sa tinuod mahitungod sa akong eksamin sa Iningles,” gisultihan nako ang akong higala. “Nahadlok ako nga dili ako mopasar.”
Mitubag siya, “ Ako adunay pipila ka higala kinsa makatabang kanimo sa pagkat-on og Iningles.”
Kadto nga mga higala mga misyonaryo gikan sa Ang Simbahan ni Jesukristo sa mga Santos sa Ulahing mga Adlaw. Sa wala madugay misugod sila sa pag-anha sa akong panimalay ug mihatag kanako og mga leksiyon sa grammar sa Iningles. Human sa pipila ka semana, misugod sila sa pagtudlo kanako sa ebanghelyo.
Samtang ako mi-investigate sa Simbahan, ang mga misyonaryo mitudlo kanako mahitungod sa mga bunga sa Espiritu (tan-awa sa Mga Taga-Galacia 5:22–23) ug mitabang kanako sa pagpasabot kon unsaon sa Espiritu pagsulti ngari kanato. Misulti usab sila kanako sa pagpangutana sa Langitnong Amahan kon ang ilang mensahe tinuod ba. Samtang ako nag-ampo, wala ako magdahom og tubag sama sa usa nga nadawat ni Joseph Smith, apan gusto ko og tubag nga moabot sa paagi nga ako nahibalo nga naghimo ako og husto nga pagpili.
Ang tubag miabot og lawom sa kagabhion sa usa ka paagi nga dili ako makalimod. Kini usa ka tubag nga puno sa kahayag ug kalinaw. Gibati nako nga gibayaw ug natawo pag-usab. Gibati nako nga gusto ko nga mahimong ang labing buotan nga tawo sa kalibotan. Ang Dios nasayod kon unsaon sa pagtubag kanako, ug ako nasayod unsay buhaton human niana. Sa tinuod, nahadlok ako kon unsay mahitabo kanako kon dili ako magpabunyag.
Sa dihang ako misulti sa akong mga ginikanan, ang akong papa misupak niini–dili tungod kay siya dili maayong tawo apan tungod sa kabug-aton sa kultura. Dili siya siguro kon unsaon pagdawat sa among komunidad ang akong bunyag.
“Kon ikaw magpabunyag, ikaw palayason sa atong panimalay,” misulti siya kanako.
Luhaan, misulti ako sa akong inahan, “Ako gusto gayod nga magpabunyag, apan kini mao ang gisulti ni Papa.”
Mitubag siya, “Padayon. Tan-awon nato kon unsa ang mahitabo.”
Ako mipadayon ug nabunyagan. Human niana wala gayod ako moatras. Ang akong tanan nga nakita mao ang dagkong mga panalangin diha sa akong kinabuhi.
Wala ako palayasa sa akong papa, apan sulod sa usa ka tuig o duha, ang kinabuhi malisod sa panimalay. Kon adunay bisan unsang butang nga mahitabo sa among panimalay, ang pipila sa among paryente ug mga sakop sa pamilya mituo nga kini nahimo tungod kay ako mibatok sa mga dios-dios pinaagi sa pagpili sa pagdawat sa ebanghelyo. Apan samtang ang akong mga ginikanan nakakita og maayong mga kausaban kanako, ang mga sitwasyon nausab diha sa panimalay. Duha ka tuig human ako mipasakop sa Simbahan, akong gibunyagan ang akong duha ka manghod nga mga babaye. Wala madugay, ang akong lain nga igsoong babaye nabunyagan.
Usa ka Saad Natuman
Sa dihang ang mga misyonaryo mitudlo kanako sa ebanghelyo, ang higala kinsa mihatag kanako sa Basahon ni Mormon, misaad kanako nga kon akong basahon kining tibuok basahon sa Iningles, ako makakat-on sa pagsulti og Iningles. Seryoso ko nga gidawat kana nga saad, busa misugod ako sa pagbasa bisan tuod og daghang dili nako masabtan sa una. Akong gibasa ug gitun-an ang Basahon ni Mormon kada adlaw ug kada gabii. Gani akong tagoon kini ilawom sa akong unlan aron kon ako makamata sa gabii, makasugod ako sa pagbasa og balik.
Sulod sa usa ka tuig, maayo akong misulti og Iningles igo kaayo nga makatrabaho sa usa ka Iningles og sinultihan nga call center. Human makatigom og kwarta, ako gitawag ngadto sa India Bangalore Mission.
Sa panahon sa akong misyon, ako sa tinuod nabalaka mahitungod sa wala ang akong tibuok pamilya mag-uban sa Simbahan. Usa ka adlaw akong nabasa kini nga bersikulo: “Tan-awa, ikaw adunay daghan nga mga pag-antos tungod sa imong banay; bisan pa niana, Ako manalangin kanimo ug sa imong banay, oo, … ug ang adlaw moabot nga sila motuo ug masayod sa kamatuoran ug magkahiusa uban kanimo diha sa akong simbahan”.(Dokytrina ug mga Pakigsaad 31:2).
Gibati ko ang Espiritu nga hilabihan sa kakusog nga ako nahibalo niini nga bersikulo nga nagsulti ngari kanako. Mikabat kini og 14 ka tuig alang niana nga saad nga matuman diha sa akong pamilya. Apan tulo ka tuig ang milabay, akong gibunyagan ang akong duha ka ginikanan. Karon kaming tanan mga miyembro sa Simbahan gawas sa usa sa akong mga igsoong lalaki.
Ako kasagaran nga mosulti nini: Ang Simbahan usa ka dapit diin ang mga damgo mangatuman.” Tungod sa Simbahan, anaa nako ang mga butang nga labi nakong gitinguha. Akong nakat-onan ang pagsulti og Iningles. Ako miserbisyo og misyon nga puno sa mga milagro. Human sa akong misyon, akong nakaplagan si Radhika, kinsa mao karon ang akong maanyag nga asawa, ug kami na-seal sa Bern Switzerland Temple. Kami adunay usa ka kwatro anyos ang panuigon nga anak nga lalaki. Ang akong pamilya uban kanako sa Simbahan. Ang tanan kong nindot nga mga damgo nangatuman.