“Unsay Kalabotan sa Sambingay sa mga Talanton [Talento] sa Akong Calling isip Piyanista sa Primary,” Liahona, Hulyo 2022.
Mga Young Adult
Unsay Kalabotan sa Sambingay sa mga Talanton [Talento] ngadto sa Akong Calling isip Piyanista sa Primary
Ang Ginoo nakahibalo kon unsaon sa paggamit sa atong mga talento sa pagpanalangin kanato ug sa mga tawo nga atong giserbisyohan.
“Akong tangtangon ang akong mga hearing aid ug molakaw paingon sa pasilyo hangtod nga dili na ko makadungog kaninyo. Atong tan-awon kon unsa ka layo ang akong maabtan!” mituaw ang presidente sa Primary, nga misinyas kanako nga magsugod. Gitukar nako ang pangbukas nga mga chord sa “Ang Simbahan ni Jesukristo” (Songbook sa mga Bata, 48) diha sa piyano, ug usa ka koro sa bata nga mga tingog ang nagsugod sa pagkanta.
Kon wala kami nagsukod kon unsa ka kusog mokanta ang mga bata sa Primary, nanganta kami og mga awit sa nagkalainlaing gipaspason ug apilan ug mga aksiyon. Kini mao ang unang higayon nga nabalik ko sa Primary sukad sa adlaw nga nag-12 anyos ko, ug dili ko makatuo kon unsa ka puno og kalipay kini nga dapit.
Pipila ka tuig ang milabay, wala ko nagtuo nga ang pagtukar diay sa mga awit sa Primary matag semana mao ang mahimong nag-unang paagi nga akong gamiton ang akong mga abilidad sa musika. Nagbansay ko alang sa mga kompetisyon sa piyano ug biyolin sa dakong bahin sa akong kinabuhi ug nagtuo sulod sa taas nga panahon nga kanunay gayod akong malambigit sa musika.
Apan sa ulahing bahin sa akong mga tuig sa kolehiyo, ang reyalidad sa pagtapos og kurso ug paghupot og full-time nga trabaho mao ang nag-una. Ang pagtukar uban sa mga orkestra sulod sa pipila ka oras sa usa ka semana ug ang makugihong pagbansay sa akong kaugalingon nahimong kataposan sa akong lista sa mga prayoridad. Ganahan gihapon ko sa musika ug makanunayong naningkamot nga molingkod atubangan sa usa ka butanganan og panid sa musika aron mapabilin ang akong mga abilidad, apan kasagaran mihunong ako sa pagpasundayag.
Hinuon, bag-ohay lang, nahimong OK na ko niini. Ang paggamit sa akong talento alang sa Primary lahi gikan sa mga kompetisyon ug makapaugtas nga mga pasundayag nga gipaningkamotan gayod nako og maayo, apan sa pipila ka paagi mas maayo kini alang kanako. Kini usa sa bugtong nga mga higayon nga nabati gayod nako nga nagamit nako ang akong mga talento alang sa kaayohan sa uban.
Pagpakigbahin sa Akong mga Talento
Diha sa sambingay sa mga talanton [talento], naglaom ang agalon sa iyang mga sulugoon sa pagbuhat og mahinungdanon nga mga butang gamit ang mga talanton [talento] nga iyang gihatag kanila. Samtang naghatag siya og nagkalainlaing gidaghanon sumala sa ilang mga abilidad, ang matag sulugoon sa kataposan gilaoman nga mogamit sa mga talanton sa paagi nga mopalambo sa unsay anaa kanila kaniadto (tan-awa sa Mateo 25:15, 21).
Gisunod gayod nako kini nga sambingay sa dihang batan-on pa ako. Bisan og ang mga talanton diha sa sambingay mga kantidad sa kwarta, kini mahisama sa atong personal nga mga kahanas ug mga abilidad, ug gusto kong maningkamot og maayo sa pagpalambo sa akong kaugalingon ug sa pagpadaghan sa mga talento nga aduna ako. Mao nga sa dihang nahimong lisod ang pagdumala sa kahimtang sa kinabuhi ug sa mga responsibilidad isip usa ka estudyante sa kolehiyo, kasagaran dili maayo ang akong gibati nga wala ako naghimo og mas mahinungdanon pa sa akong tanan nga pagbansay sa musika. Naghunahuna ko kon sama ba ako sa hadlokan nga tawo kinsa “gilubong [iyang] talanton diha sa yuta,” tungod sa kahadlok nga mawala kini niya (Mateo 25:25).
Apan sa dihang nagsugod ko sa akong bag-o nga calling, wala gayod nako kana nabati. Bisan og wala nako gihagit ang akong kaugalingon sa paagi nga akong gibuhat kaniadto, mibati ako og kalipay sa matag higayon nga milingkod ako luyo sa piyano diha sa suok sa lawak sa Primary tungod kay nasayod ko nga nagserbisyo ako sa mga bata.
Sa dihang gihulagway ni Jesukristo kon giunsa sa tawo nga adunay lima ka talanton sa pagpalambo sa iyang mga talanton, miingon Siya nga ang tawo “milakaw dayon ug kini iyang gipamatigayon” (Mateo 25:16). Sa laing pagkasulti, gikinahanglan sa tawo ang pagpakigbahin sa unsay naa niya ngadto sa uban aron molambo ug mouswag.
Nagsugod ko nga makaamgo nga ang paggahin sa akong panahon sa pagtukar sa piyano alang sa daghang dili mahimutang nga mga bata kada Dominggo wala nagpasabot nga wala nako gipahimuslan ang akong mga abilidad. Ang pagtukar diha sa Primary usa ka pamatigayon; mihatag ko sa pagduyog, ug ako nakasaksi sa talagsaon nga mga pagpamatuod sa mga bata sa akong ward. Sa paggahin nako og mas daghang panahon diha sa suok sa lawak sa Primary, mas tinud-anay nakong nabati nga kini nga oportunidad naghatag kanako og “paglambo.”
Napanalanginan tungod sa Atong mga Calling
Nagtuo ko nga ang calling dinasig. Miabot kini sa higayon sa akong kinabuhi sa dihang nanglimbasog ko sa akong hugot nga pagtuo ug kasagarang mibati nga nabug-atan sa kinabuhi. Kini nga calling usa ka pahinumdom sa pagpalig-on sa akong pundasyon sa ebanghelyo ug sa pagtutok sa kayano ug katahom sa mahangtoron nga mga kamatuoran. Napalig-on nako ang akong pagpamatuod kauban ang mga bata nga akong giserbisyohan, nga mao ang usa sa tinuod nga mga katuyoan sa mga calling.
Mahimong lisod ang mga calling; usahay tawagon kita sa pagbuhat og mga butang nga bation nato nga dili kita kwalipikado ug nga mokuha og daghan sa atong panahon. Sa ubang panahon kini bali—tingali bation nato nga daw ang atong calling wala naggamit sa hingpit sa atong mga abilidad ug nga ang atong mga paningkamot mas maayo pang idirekta sa laing dapit. Apan nasayod ang Ginoo kon unsaon sa paggamit sa atong mga talento sa paagi nga dili lang mopanalangin sa mga tawo nga atong giserbisyohan apan sa atong kaugalingon usab.
Sama sa akong nakat-onan gikan sa akong kaugalingon nga kasinatian, ang bisan unsa nga paningkamot nga atong himoon sa pagserbisyo sa Ginoo magdala og paglambo sa atong kaugalingon nga mga kinabuhi. Kon atong ipahinungod ang atong panahon ug mga talento ngadto sa Ginoo, kanunay Niya kining gamiton alang sa atong kaayohan.