Mo Muri Jisu Karisito ena Kalawa ni Vakabauta

Vinaka vakalevu, matasere, na lagata na “Faith in Every Footstep.” Na ivakatagi kei na qaqani sere o ya a volai ena 1996 maivei Baraca Newell Dayley¹ me vakavakarau ki na marautaki nai ka 50 ni ivakananumi ni nodra tadu mai na ivuvu taumada ena Buca o Salt Lake ena 1847.

Dina ga ni sere oqo a vakarautaki ki na marau o ya, na kena itukutuku sa baleti vuravura taucoko.

Au dau taleitaka tu ga italetale ni sere oya:

Kemuni na taciqu kei na ganequ, au vakadinadinataka ni da muri Jisu Karisito ena kalawa ni vakabauta, sa tiko na inuinui. Sa tiko na inuinui vua na Turaga o Jisu Karisito. Sa tu na inuinui vei keda kece ena bula oqo. Sa tiko na inuinui meda uabaleta na noda cala, noda rarawa, noda sasaga, kei na noda vakatovolei kei na noda leqa. Sa tiko na inuinui ena veivutuni kei na vosoti ka vosoti ira na tamata. Au vakadinadinataka ni tiko na inuinui kei na vakacegu vei Karisito. Sa rawa Vua me tuberi keda ena gauna ni dredre. A cakava oqo vei ira na ivuvu e liu, ka sa cakava tiko oqo vei keda yadua.

Na yabaki oqo sa marautaki kina nai ka 175 ni ivakananumi ni nodra tadu mai na ivuvu taumada ki na Buca o Salt Lake, sa vakauqeti kina meu nanumi ira na noqu qase e liu, eso vei ira a taubale mai Nauvoo ki na Buca o Salt Lake. O ira na tubuqu vakarua era a taubale ena buca ni ra se itabagone. A yabaki 20 tiko o Henry Ballard;³ Margaret McNeil a yabaki 13;⁴ kei Joseph F. Smith, e muri a qai kaono ni Peresitedi ni Lotu, a se qai yabaki 9 ni yaco ena Buca o Salt Lake.⁵

Era a sotava na veimataqali leqa ena ilakolako o ya, me vaka na draki cevata, tauvimate, kei na sega ni isulu kei na kakana. Me vakataka, ni gauna sa yaco kina o Henry Ballard ena Buca o Salt Lake, a rekitaka nona raica na “Vanua Yalataki” ia a bula rere voli de dua e raici koya baleta na isulu e dara tiko sa kakabasubasu ka sega ni ubia rawa na yagona. A vunitaki koya ena veikau ena siga taucoko me yacova na bogi. A qai gole ki na dua na vale ka kere isulu kina me tomana tale na nona ilakolako me kunei rau na nona itubutubu. A vakavinavinaka vua na Kalou ni sa yacova na nona vale ni veimataka ena veitaqomaki.⁶

Rau na buqu tukaqu vakarua rau a muri Jisu Karisito ena ikalawa ni vakabauta ena nodrau ilakolako ni vakatovolei. Au vakavinavinaka vei ira ni ra a sega ni soro. Na nodra kalawa ni vakabauta sa vakalougatataki au kei na itabatamata e tarava, me vaka ga na nomu kalawa ni vakabauta ena vakalougatataki ira na nomu kawa.

Na vosa ivuvu e tamata ka vosa vakaibalebale. Ni tamata sa kena ibalebale e dua sa maliwai ira na isevu era vakadidike se vakaitikotiko ena dua na vanua vou. Vakavosa, sa kena ibalebale me dolava se vakarautaka na sala mera muria na tamata.⁷

Niu vakasamataki ira na ivuvu era sa vakarautaka na sala vei ira eso, au vakasamataka e liu na Parofita Josefa Simici. O Josefa a dua na ivuvu baleta ni nona kalawa ni vakabauta a muataki koya ki na veikau tabu ka laki tekiduru me masu ka dolava na sala vei keda me noda na taucoko ni kosipeli i Jisu Karisito. Na vakabauta nei Josefa me “kerea vua na Kalou”⁸ ena mataka ni vula itubutubu ena 1820 a dolava na sala ki na Vakalesuimai ni taucoko ni kosipeli i Jisu Karisito era oka kina na parofita kei na iapositolo sa kacivi mera veiqaravi tale e vuravura.⁹ Au kila ni o Josefa Simici e parofita ni Kalou.’ Au kila ni nona kalawa sinai ena vakabauta a muataki koya me laki tekiduru ena mata ni Kalou kei na Luvena Daulomani, o Jisu Karisito

Na kalawa ni vakabauta nei Parofita Josefa e rawa kina me iyaya ni cakacaka ni Turaga me kau mai na iVola i Momani, ni sa dua tale na ivakadinadina kei Jisu Karisito kei na Nona loloma veisorovaki.

Ena vakabauta kei na gugumatua i Josefa Simici ni sotava na veika dredre sara kei na veisaqasaqa, a rawa kina vua me dua na iyaya ni cakacaka ena liga ni Turaga ena kena tauyavutaki tale na Lotu i Jisu Karisito e vuravura.

Ena gauna ni koniferedi raraba sa oti, au a vosa baleta na kena vakalougatataki au na noqu kaulotu. Au a kalougata niu vakavulica na ituvatuva lagilagi ni veivakabulai nei Tamada Vakalomalagi, na iMatai ni Raivotu nei Josefa Simici, kei na nona vakadewataka na iVola i Momani. Na veivakavulici kei na ivunau vakalesuimai oqo a dusimaka na noqu kalawa ni vakabauta ena noqu vakavulici ira sa lomadra mera rogoca na itukutuku ni kosipeli Vakalesuimai.

O ira na noda daukaulotu nikua era sa painia ni gauna oqo baleta era sa wasea na itukutuku lagilagi oqo vei ira na tamata e vuravura, sa dolava kina na sala vei ira na luvena na Tamada Vakalomalagi mera kilai Koya kei na Luvena, o Jisu Karisito. Na ciqomi ni kosipeli i Jisu Karisito sa dolava na sala ki na tamata kecega mera vakavakarau ka cakava na cakacaka vakalotu kei na kalougata ni Lotu kei na valetabu.

Ena koniferedi raraba sa oti, a vakadeitaka tale kina o Peresitedi Russell M. Nelson “ni Turaga sa kerei ira yadua na cauravou kilikili, ka gugumatua mera vakavakarau ka laki kaulotu” ni “kaulotu sa madigi kaukauwa, ia ena digidigi” vei ira “na goneyalewa kei ira era rawata.”¹⁰

Kemuni na cauravou kei na goneyalewa, na nomuni kalawa ni vakabauta ena vukea mo ni muria na veisureti ni Turaga mo ni kaulotu—mo ni ivuvu ni gauna oqo—me dolavi na sala vei ira na luve ni Kalou mera raica ka tiko ga ena salatu ni veiyalayalati e veimuataki lesu ki na Nona iserau lagilagi.

O Peresitedi Nelson e dua na ivuvu ni Lotu. Ni sa iapositolo sa veilakoyaki ka dolava e vuqa na vanua me vakayacori kina na vunautaki ni kosipeli. Ni oti ga nona sa parofita ka Peresitedi ni Lotu, a kerei keda meda “vakalevutaka noda gumatua vakayalo meda ciqoma na ivakatakila.”¹¹ A tomana na nona vakavulici keda ena sala me qaqaco kina na noda ivakadinadina. Ena dua na lotu ni itabagone qase, a kaya kina:

“Au sa kerei kemuni mo ni lewa na nomuni ivakadinadina. Cakacakataka. Mo taukena. Mo karona. Susuga cake me rawa ni tubu. …

“[Mo qai] sarava na cakamana ena yaco ki na nomu bula.”¹²

Sa vakavulici keda ena sala meda na bula-rawati keda kina. A kaya, “ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, kei na veivakacegui tudei ni Yalo Tabu.”¹³

Au vakadinadinataka ni o Peresitedi Russell M. Nelson na parofita ni Kalou e vuravura nikua.

Na noda iVakabula, o Jisu Karisito, na painia cecere duadua me vakarautaka na sala. E dina, o Koya “na sala”¹⁴ ni ituvatuva ni veivakabulai me vakayacori rawa me rawa ni da veivutuni, kei na vakabauti Koya, ka lesu vei Tamada Vakalomalagi.

A kaya o Jisu, “Oi au na sala, kei na vu-ni-dina, kei na vu-ni-bula, sa sega ni torovi Tamaqu walega e dua na tamata, ena vukuqu ga.”¹⁵ Sa yalataka ni na sega ni biuti keda meda lomaleqa; ena lako mai ni da vakatovolei.¹⁶ Sa sureti keda meda “lako mai [Vua] ena lomada taucoko, ka na vakabulai [keda] o [Koya].”¹⁷

Au vakadinadinataka ni o Jisu Karisito na noda iVakabula ka Dauveivueti, ka noda Dauveivakaduavatataki kei Tamada. Na Tamada Vakalomalagi sa dolava na sala meda lesu rawa Vua ena noda muria na Luvena Daulomani, o Jisu Karisito, ena vakabauta ni veikalawa yadua.

Na tubuqu vakarua kei ira na painia taumada a sotava na vuqa na veivakataotaki ni ra lako voli ena qiqi, qiqidreti, ka taubale ki na Buca o Salt Lake. O keda talega eda na sotava na ibolebole ena noda ilakolako yadua ni noda bula. Eda sa sega ni bili qiqi se kauta tiko na qiqi vakaiubi ena veiulunivanua baba kei na waicevata titobu; eda sasaga talega me vakataki ira meda uabaleta vakayalo na veitemaki kei na ibolebole ni noda gauna oqo. Eda sa lakova na tokaitua; e tiko na delana—ka so na ulunivanua—meda kabata. Dina ni veivakatovolei nikua e duidui maivei ira na painia taumada, era sega ni ibolebole lailai cake kivei keda.

Sa ka bibi meda muria na parofita ka teivaka dei tiko na yavada ena salatu ni veiyalayalati ni yalodina me vakataki ira ga na ivuvu taumada.

Meda sa muri Jisu Karisito ena vakabauta ena veikalawa yadua. Sa gadrevi meda qarava na Turaga ka veiqaravi vakai keda. Sa gadrevi meda vaqaqacotaki keda vakayalo ena noda maroroya ka doka tiko na noda veiyalayalati. Me kakua ni yali vei keda na yalomaqusa meda maroroya na ivakaro. Ena saga o Setani me vakamalumutaka na noda yalayala meda lomana na Kalou kei na Turaga o Jisu Karisito. Yalovinaka nanuma tiko ke dua ena yali mai na salatu, eda na sega ni yali maivua na noda iVakabula. Ena veivakalougatataki ni veivutuni, sa rawa meda gole Vua. Ena vukei keda meda vuli, tubu, ka veisau ni da saga meda tiko ga ena salatu ni veiyalayalati.

Meda sa qai muria na kalawa i Jisu Karisito, kei na vakabauta ena noda veikalawa yadua, ka rai Vua, ka teivaka tudei tiko na yavada ena salatu ni veiyalayalati, sa noqu masu ena yaca i Jisu Karisito, emeni.