“O Le A Tatou Aoao Pea,” Liahona, Tes. 2022.
Faamanuiaga o le Ola-Tutoatasi
“O Le A Tatou Aoao Pea”
Ua faia e le aotauina se eseesega tele mo le aiga o Carvalho, o e ua vaai i le aoaoina o se taula i o latou olaga.
Ina ua 18 tausaga o Raimundo Carvalho, sa maliu lona tama. Sa maua e lona tama se totogi i le taina o lavalava mo isi aiga. O lea la ua leai lena totogi itiiti.
“O a’u o le ulumatua, le atalii e toatasi, ma tuafafine laiti e toafa. O lea, sa manaomia ai ona ou fesoasoani i lo’u tina e tausi le aiga,” na ia manatuaina. “Sa matou feagai ma le tele o luitau ma sa matou matua matitiva lava.”
Sa aoao Raimundo e fai seevae. Peitai, e lei umi, ae oo ina manino mai sa le mafai ona ia faaauauina ana suesuega ma lava galuega e tuuina atu ai le fesoasoani na manaomia e lona tina. “O le tausia o le aiga na muamua mai,” o lana tala lea. “Sa mafai ona ou faamaeaina au vasega i lena tausaga ma na o le pau lena.”
I lona loto, sa ia iloa ai o le a toe foi mai o ia i le aoga. Ae o afea ma e faapefea?
Sa faaauau pea ona galue o ia, ma sa manuia le aiga.
“Ona ou feiloai lea ma faaipoipo i lenei tamaitai lalelei,” o lana tala lea, ma ataata atu i lona faletua, o Eréroythe. “Ma sa ma fausia se ma’ua lava aiga. O le asō ua toatolu le ma fanau ma fanau a fanau e toatolu.”
O Eró, e pei ona lauiloa ai lona faletua, na uunaia Raimundo e toe foi i le aoga. “Ae ona o o’u tiutetauave o se tane ma se tamā,” o le tala lea a Raimundo, “Sa ou iloa e le mafai ona ou tulitulimatagauina le a’otauina sa ou manao ai i lena taimi. Ou te lei lafoaia la’u miti—sa na o lo’u koma lava. Na avea ma se mea o le a ou faia i le lumanai.”
O le mea e mafai ona ia faia, na ia iloa ai, o le faamalosiauina lea o lona toalua ma le fanau i a latou aoaoga.
“Ua aoao mai tusitusiga paia ia i tatou o le mamalu o le Atua o le atamai,1” o lana tala lea. “Ua latou fai mai foi e tatau ona tatou tausia a tatou fanau i le malamalama ma le upumoni2 ma e tatau ona tatou sailia le aoaoina e ala i le suesue ma le faatuatua.3 O nei mataupu faavae na avea ma tulaga faatonuina mo lo matou aiga.”
Tulitulimatagauina o Aoaoga i le Asō
O le asō, o Raimundo ua 62. Ma o lena miti sa ia koma ai? Ua iu lava ina taunuu. Sa faauu talu ai nei o ia mai le aoga maualuga. O le mea e sili ai, o loo ia sauni e ulufale i le kolisi. “E tatau ona ou faia se suega faigata e ulufale ai,” o lana tala lea. “Ae ou te manao i tagata, matutua ma talavou, ia iloa e mafai ona latou faatuina se sini ma ausiaina.”
O loo tulitulimatagauina foi e le avā ma le fanau a Raimundo ia aoaoga.
“Ina ua ou amata i le kolisi i ni nai tausaga ua mavae,” o le tala lea a Eró, e 57 tausaga, “e leai se tasi o le aiga na faia soo se ituaiga o aoaoga sili atu. Ae sa ou talitonu a tata’e lenei puipui, o le a faatumulia lo matou fale i le aoaoina. O le a lelei ai le agai i luma o mea. O au o se kuka i le galuega, ma ou te kuka ona ou te fiafia e kuka. Ae sa ou manatu e mafai ona ou aoao atili, ma sa manao foi lau tama teine o Dielle e aoao atili.”
Sa la auai i se vaega o le ola tutoatasi a le Ekalesia, ma sa fautuaina e le faatonu la te talosaga mo nonogatupe a le Tupe Faaagaga mo Aoga. “Sa faamaonia ia nonogatupe,” o le tala lea a Eró. “O lea, sa ma lesitala ai i le iunivesite e suesue mea tau taumafa. Sa ma aveina lea lava mataupu e tasi, ma o maua o se tama teine ma se tina i le aoga faatasi i le taimi lava e tasi. Ma te galulue i le aso atoa e kuka meaai, ona o lea i le kolisi i le po.” O nisi aso na amata ai ona faigaluega Eró i le 5:00 i le taeao, faigaluega i le aso atoa, ona amata lea o vasega i le 8:00 i le afiafi.
Ua ia tautino mai e tautulimoe i nisi taimi. “Ioe, e faigata,” o lana tala lea. “Ae tau lava o lou faatuatua o le a fesoasoani mai le Alii ia te oe, ma e faaauau pea.”
O Raimundo ma Eró Carvalho i le aso na maua ai lona faailoga i le kuka.
Ata mai faaaloaloga o le aiga o Carvalho
O lenei ua faauu uma le tina ma le afafine. Ua le toe faigaluega Eró i se faleaiga. E faigaluega o ia lava ma galue mai le aiga. “O loo ma kuka pea, ae ua sili atu ona ma agavaa ma maua le tele o avanoa e alualu ai i luma. Ua lava ma tupe maua e toe totogi ai a matou nonogatupe, ma o loo galue Dielle i se faailoga o le matuaofaiva i le puleaina o mea e fai!”
O loo galue nei Dielle i se faailoga o le matuaofaiva.
Ua faamalamalama mai foi e Eró, “O lo ma atalii o Odirlei, e ui ina faafalepuipuiina, ae ua faamaeaina se faailoga i luga o le initoneti i le tausitusi ma ua taliaina i se polokalama lelei a le iunivesite a le malo i suesuega o eleele. O loo ia faatalitali mo se faaiuga a se faamasino e mafai ai ona ia auai i vasega. Matou te uunaia o ia e faaaoga lona taimi e suesue ai, ia agavaa ai, a oo i le taimi e magalo tumau ai, o le a mafai ona ia maua se olaga sili atu. Ua ia aoaoina o le a’otauina e tuuina atu ai ia te oe le avanoa e fatufatu ai se mea moni fou, ma ua ia iloa e silafia e le Atua le mea e mafai ona avea ai o ia.”
Ua tautino mai e Eró, “Ua faia e le aotauinaa se eseesega tele mo lo matou aiga. E le na o le malamalama; o se taula i o matou olaga.” Ma sa tusia e Raimundo e faapea o lona tina, o le sa lei aoga i le tele o lona olaga, i le avea ai o se tamaitai matua na aoao e faitau ma tusitusi.
“O le suesue ma le faatuatua na avea ma tulaga faatonuina mo lo matou aiga,” o le tala lea a Raimundo.
O Se Isi Ituaiga o Malamalama
Ua iloa foi e Raimundo ma Eró se isi ituaiga o aoaoga—malamalama faaleagaga.
“Pe tusa ma le 30 tausaga ua mavae,” o le tala lea a Raimundo, “matou te lei toaaga i le Lotu. Ae sa fesili mai lo matou epikopo ia maua ma Eró mo se faatalanoaga. Sa ia valaaulia i ma’ua e ave se vasega e uiga i le faaipoipoga e faavavau, ma ona o lena vasega, sa ma toe foi mai ai i le Ekalesia ma sa ma suesue faatasi ma aoao ma fausia a ma molimau. I se tausaga mulimuli ane, sa faamauina ai i maua i lo matou aiga i le Malumalu o São Paulo .”
Ua la tuuina atu nei le tele o tausaga o auaunaga i a la uarota ma siteki, “ma o loo matou suesueina pea le talalelei, o loo aoao pea nisi upumoni,” o le tala lea a Raimundo.
“E tusa lava pe matou te matutua,” o le tala lea a Eró, “e tatau ona matou aoao pea. E faapitoa lava lo matou manaomia o le mauaina pea o le malamalama faaleagaga. O se vaega uma o se fuafuaga e faavavau.”
Fai mai Raimundo e fiafia o ia i lenei upusii mai ia Elder Dieter F. Uchtdorf o le Korama a Aposetolo e Toasefululua:
“O i tatou o tagata, tatou te tuua se faamuamua maualuga i aoaoga o le poto salalau ma atinaega faalematata. Tatou te mananao ma e tatau ona tatou tulagaese i sikolasipi ma galuega taulima. Ou te faamalo atu ia te outou o loo tauivi ma le maelega ia a’otauina ma avea ma tagata tomai faapitoa i la outou matata. Ou te valaaulia outou ia avea foi ma tagata tomai faapitoa i aoaoga faavae o le talalelei.”4
Ma e fiafia foi Raimundo i lenei mau:
“Soo se mataupu autu o le atamai tatou te maua i le olaga lenei, o le a tu mai faatasi ma i tatou i le toetutu.
Ma afai e maua e se tagata le poto ma le tomai sili atu i le olaga lenei i lo se isi tagata e ala i lona filiga ma le usiusitai, o le a maua e ia le avanoa tele atu i le lalolagi a sau.”5
“O lena mau e faaosofia ai au,” o lana tala lea. “E aumaia ia te au le fiafia i le iloa ai e tele atu isi mea o le a oo mai. Ou te alapo i le taeao ma ou te suesue i tusitusiga paia. Ona ou alu lea e galue ua faamalieina ona sa mafai ona ou aoaoina se mea i le taeao po.”
Faasoaina o Mea Sa E Aoaoina
E lei leva atu, na valaauina ai Raimundo ma Eró e faufautua i talavou nofofua matutua o lo latou eria.
“E matagofie!” Fai mai ai Eró. “Ma te maua lo latou malosi lelei, ona ma toe avatu lea ia i latou le poto. E pei lava o se sootaga atoatoa. E le tuueseeseina i tatou e tausaga. O le manao ia faaleleia e aumaia faatasi ai i tatou. Ua ma iloa e mafai ona latou aoaoina i maua i tomai ma te lei aoaoina. Ma i le fesuiaiga, e mafai ona ma tuuina atu ia i latou le poto masani o le olaga ma fesoasoani ia i latou ia malamalama i le auala e mafai ai e le a’otauina ona faalautele lo latou gafatia e ola tutoatasi ai. Ua tatou i ai iinei e lagolago e le tasi le isi ma aoao mai le tasi ma le isi.”
“Oka se avanoa ofoofogia ua tatou maua nei,” o le tala lea a Raimundo, “e fesoasoani ai i tupulaga talavou ia iloa le ala e mafai ai e le a’otauina ona fesoasoani ia i latou ia ola tutoatasi. Ae ou te faamoemoe e mafai foi ona tatou fesoasoani ia i latou ia malamalama o le mamalu o le Atua o le atamai lea. Ou te manatu ua tofu i tatou uma ma se manao e aoao. Ou te talitonu o le a tatou aoao pea lava pea.”