Faatuatua ia Iesu Keriso—Savali Lata Mai Nei mai Perofeta ma Aposetolo

“Mo le tausaga ua tuanai, sa tatou feagai uma lava ma mea maoae ma e lei faamoemoeina.

“I le totonugalemu o lena le mautonu, e na o le tasi lava le auala e lagona ai le filemu—o le filemu moni lea e maua ai le malamalama uma. O lena filemu e maua i le faatuatua i le Alii o Iesu Keriso.”

“Tou te manatua mai le Tusi a Mamona na aoao mai ai i tatou e Nifae e faapea o le faatuatua ia Iesu Keriso o le ki lea i le mauaina o faaaliga o le upumoni ma o le ki o le mauaina o le talitonuga maumaututu o loo tatou mulimuli i le taitaiga a le Faaola.

“O le lagonaina o lena si’ufofoga o le a sau mai lo tatou faatuatua ia te Ia. O le lava o le faatuatua, o le a tatou fesili atu ai mo se taitaiga ma le faamoemoe e o ma fai, po o le a lava e poloai mai ai o Ia. O le a tatou atia’e ai le faatuatua e iloa po o le a lava le mea e poloai mai ai o Ia o le a manuia ai ma isi, ma mafai ona faamamaina i tatou i le faagasologa ona o Lona alofa mo i tatou.”

“E masani ona ou ta’u atu i talavou matutua e taua i latou. Ou te faia soo lenei savali aua ou te iloa e moni. Ou te faamautinoa atu ia te outou e taua tele outou i lo outou Tama Faalelagi ma le Alii o Iesu Keriso.

“Ua ou iloa o loo i ai le tele o uunaiga o loo i ai i le lalolagi i aso nei. E tele leo i le lalolagi i aso nei e ala i faasalalauga faaagafesootai.

“Ae ou te manao ia outou iloa o le leo aupito sili ona taua, o le mea aupito sili ona taua e manaomia ona tupu i o outou olaga, o le sailia lea o se taimi filemu lea e mafai ai ona e filemu ma iloa moni e alofa lo tatou Tama Faalelagi ia te oe, o oe o Lona atalii po o Lona afafine, ma o le Alii o Iesu Keriso o lou Faaola ma lou Togiola.”

“O le suesueina o le soifuaga o lo tatou Faaola tatou te latalata atili atu ai ia te Ia. … Ou te valaaulia outou ia faaalu se taimi e iloa ai le Alii o le Filemu—Lona soifua mai, soifuaga, savali, ma le toetu. O le tele o lo tatou aoao e uiga ia te Ia ma mulimuli i Lana faataitaiga, o le tele foi lea o le filemu e mafai ona tatou lagonaina i taimi faigata.”

“Tatou te tomanatu ma olioli i mea uma lava ua faia e le Faaola mo i tatou. Na Ia tuuina mai Lona soifua o se Togiola sui, faatoilaloina o le oti ma le tuuina atu o le togiola mo tagata uma. Ou te folafola atu o le mulimuli i Lona malamalama ma faataitaiga o le a aumaia ia i tatou le olioli sili atu, fiafia, ma le filemu i lenei olaga nai lo se isi lava mea.”

“O le a se mea ua tatou aoaoina mai le soifuaga o le Faaola e mafai ona faamalosia ai lo tatou faatuatua?

“Na faaali mai e Iesu ia i tatou i Lona soifua mai e faapea, o le taua o se agaga e le faalagolago i ona tulaga po o siosiomaga. O Ia, o le Foafoa sili o le lalolagi, na soifua mai i le mativa, i se fale o manu, ona sa leai se avanoa mo Ia ma Iosefa ma Maria i le faletalimalo. E mafai ona tatou faatuatua ia te Ia, ma le iloaina po o ai lava i tatou ma po o a lava o tatou tulaga, e silasila mai o Ia i o tatou loto, ma o i tatou taitoatasi e taua tele ia te Ia.

“Na faaali mai e Iesu ia i tatou i Lona soifuaga e mafai e agaga taitoatasi ona tuputupu ae ma alualu i luma. O le alofa o le Tama ma le Alo o le faavae lea o lo tatou olioli iinei ma le olaga a sau, ae ua faamoemoe mai lo tatou Tama Faalelagi ia tatou fausia i luga o lena faavae ma tuputupu ae e pei ona sa faia e Iesu. E mafai foi ona tatou tuputupu ae i lea laasaga ma lea laasaga ma Lana fesoasoani.

“Na faaali mai e Iesu ia i tatou e ala i Ona puapuaga ma le oti o le alofa o lona uiga o le auauna atu ma le ositaulaga. A o tatou auauna atu ma auauna atu e pei ona sa Ia faia, e mafai ona tatou maua le faatuatua atoatoa i le Faaola. Ua Ia tuuina mai Lona soifua mo i tatou, ma o lenei ua ia te Ia le mana uma e puipuia ma faamanuia ai i tatou o Ana uo.

“Ou te tuuina atu ia te outou la’u molimau mautinoa o le Toetu o Iesu Keriso o se mea moni. E mafai ona e ola ma se faamoemoe atoatoa ia Keriso mo le fesoasoani e te manaomia i le taimi nei ma mo le ola e faavavau a sau.”

“I se faigalotu mo talavou matutua e tautatala i le gagana Farani, sa ma faasoa atu ai ma Kathy o ma mafaufauga ma lagona e uiga i le mataupu faavae o le talitonu. Na saunoa mai le Aposetolo o Paulo: ‘A o le faatuatua, o le faalagolago lea i mea ua faamoemoe i ai, o le mautinoa lea o mea e le o vaaia’ [Eperu 11:1]. Mea. Mautinoa. O le mea lea e tau o le faatuatua. O le mea lea e tau o le talitonuga. E moni lava. O se vaega o lo tatou tagata i totonu.

“Sa ou uunaia nei talavou matutua ia talitonu i nei mea taua e ono:

“1. Ia talitonu i le Atua.

“2. Talitonu o oe o se afafine po o se atalii o le Atua ma Na te silafia lelei oe ma e alofa atoatoa ia te oe.

“3. Talitonu e mafai ona e talanoa atu i lou Tama Faalelagi ma o le a Ia auina mai Lona Agaga i ou luga.

“4. Talitonu o loo taavale atu le malo o le Atua i le salafa o le lalolagi ma o i tatou taitoatasi o se vaega taua o le sauniuniga mo le Afio Mai Faalua o le Faaola.

“5. Talitonu o isi e te iloa o le a taliaina le talalelei a Iesu Keriso.

“6. Talitonu o Iesu Keriso o le Faaola o le lalolagi.

“I le avea ai ma au uo ma uso a soo, e aunoa ma se uunaiga vagana ai lo’u alofa ma le faaaloalo mo outou, ou te faamautinoa atu ia te outou o lo outou faatuatua ia Iesu Keriso e le faaleaogaina. O le a e toe vaai ia te Ia. O le a iloa e le lalolagi uma o Ia o le Alo o le Atua. Ua ou iloa o Ia ma lagonaina Lona faatasi mai. Ou te molimau atu ma le mautinoa o loo soifua o Ia, ma ua toetu mai o Ia, ma o Lona alofa mo i tatou e le mafai ona faamatalaina.”

“A o tatou faia se taumafaiga naunautai, e tuputupu ae lo tatou faatuatua ia Iesu Keriso. Ma a o tuputupu ae, tatou te maua meaalofa faalelagi, mana, ma le tomai e faia ai mea e le mafai ona tatou faia e aunoa ma lena. A o tatou faamalosia lo tatou faatuatua, e faafuasei lava ona i ai se isi mana: o le mana o Keriso ma Lana Togiola. E amata ona e lagonaina Lana faamaoniga, Lona alofa, ma Lona alofa tunoa.”

“O fesootaiga e aumaia ai le uiga o le olaga.

“O le fesootaiga ma le Atua, aiga, ma le tasi ma le isi (o le mea ou te ta’ua o le auai i feagaiga) e tuuina mai ai o tatou olaga i o tatou uiga aupito silisili, agamalu, loloto.”