Fausiaina o lo Tatou Faavae e ala i Mea Laiti ma Faatauvaa

Ata

lima o loo uu i luga se fetu teuteu

E i ai sa’u fetu teuteu uga i lo’u potu na ou aumaia i le fale mai la’u misiona. Ou te fiafia i le auala e foliga ai pe a faamalamalamaina. O lenei fetu laitiiti o loo tautau i luga o se puipui ina ia mafai ona ou vaai i ai i po uma a o ou alu e moe ma le mea muamua pe a ou ala i luga.

Talu ai nei sa ou matauina ai e lei pipii atu la’u fetu i le puipui ma le saogalemu e pei ona masani ai, ae ou te lei mafaufau tele i ai. Sa ou mautinoa o le fasi mea faapipii e tasi o loo mau ai i le puipui o le a pipii ai.

Ona oo lea i se tasi taeao, sa lei i ai iina la’u fetu—ua pa’ū. Sa tonu ia te a’u ou te toe faamauina le fetu i nisi mea faapipii. O le taimi lea sa ou faaaogaina ai ni vaega se lima—e tasi le vaega mo pito taitasi o le fetu—ia mautinoa o le a le toe pau.

O iina na ou iloa ai o si a’u tamai fetu susulu e pei lava o i tatou taitoatasi, ma o le mea faapipii o loo uuina e mafai ona faatusa i o tatou mausa faaleagaga. O le malamalama ua tatou maua i totonu o i tatou e faalagolago atoa lava i mea tatou te faia e faamalolosia ai, pe malupuipuia ai, a tatou molimau. O fasi mea faapipii uma sa ou tuu i luga o le fetu na faamanatu mai ai ia te au le Alema 37:6: “O mea laiti ma faatauvaa e faataunuu ai mea tetele.”

Sa ou mafaufau foi i le auala na ou matauina ai o le a pa’ū la’u fetu mo ni nai aso, ae sa leai se mea na ou faia e faasaoina ai seia oo ina pa’ū. Ma e tutusa lava ma a tatou molimau—afai tatou te le popole ma galo ona faia faiga laiti, faaleagaga ia e mafai ona fesoasoani e faatumauina ai le malosi o lo tatou faatuatua, e mafai ona faavaivaia a tatou molimau.

O lea la ua faamanatu mai e le fetu ia te au i po taitasi e fesili ifo ia te au lava ni nai fesili: O le a le tele o le “mea faapipii faaleagaga” na ou faapipiiina i le aso? Pe ua lava le saogalemu o lo’u faatuatua lea ou te saogalemu ai faaleagaga mai le pa’ū? Mata e mafai e isi ona vaai i le Malamalama o Keriso ia te au?

Pe a ou mafaufau i nei fesili, e mafai ona ou vaai pe faapefea ona ou faamalosia atili lau molimau ia Iesu Keriso. Ua uunaia au e mafaufau pe mafai ona ou suesue loloto atili i au tusitusiga paia, tatalo atili e le aunoa, alu soo i le malumalu, pe auauna atu ma le mataalia atili i lou valaauga. Ou te mafaufau loloto po o a ni a’u fesili e ono i ai mo le Alii ma pe mafai faapefea ona ou maua le upumoni. Ma ua taialaina au e faia ni suiga laiti e valaaulia atili ai le Agaga i lou olaga.

O le a taumafai pea le fili e faalavelave ia i tatou mai le faia o nei mea laiti, faaleagaga pe faatalitonuina i tatou o le faia o le mea aupito itiiti o le a lava lea mo i tatou e taofimau ai i a tatou molimau. Ae ua faamanatu mai e Peresitene Russell M. Nelson ia i tatou e tatau ona tatou faamautuina ma le malosi lo tatou faatuatua: “Ou te aioi atu ia te outou ia faaavanoa se taimi mo le Alii! Ia fai lou oe lava ia faavae faaleagaga ia mausali ma mafai ona tumau i taimi o tofotofoga e ala i le faia o mea na e faatagaina le Agaga Paia e faatasi ma oe i taimi uma,”¹

E pei lava ona fesoasoani fasi mea faapipii faaopoopo e faatumauina ai la’u fetu laitiiti mai le pa’ū, o le tuuina o vaega o le “mea faapipii faaleagaga” ma faalogologo i uunaiga a le Agaga o le a fesoasoani ia i tatou e faalatalata atu ai i le Faaola, le faavae o lo tatou faatuatua, ma tetee atu ai i le toso a le fili. Sa faamamafa mai e Peresitene Dallin H. Oaks, le Fesoasoani Muamua i le Au Peresitene Sili, le taua o mea iti: “O le faigofie o le ala po o le faigofie o le galuega ua poloaiina e le mafai ona faauigaina faapea e le taua.”²

E pei ona fai mai i le Alema 37:6, e mafai e le Atua ona fesoasoani ia i tatou e ausia faamoemoega maoae e ui lava o a tatou taumafaiga laiti e faalatalata atili atu ia Keriso. E mafai ona Ia faalauteleina o tatou mausa faigofie e pei o le tatalo, suesueina o tusitusiga paia, ma le auai i le malumalu e tuuina mai ia i tatou le malosi tatou te manaomia e faatoilalo ai le fili ma isi mea faalavefau i o tatou olaga. Afai tatou te faia nei mea laiti ma faatauvaa, e mafai ona tatou mausali i lo tatou faatuatua. E pei lava o la’u fetu laitiiti, e mafai foi ona tumau le saogalemu o lo tatou faavae ia Keriso a o tatou faaauau pea i luma i le ala o feagaiga.