O Le Kerisimasi i Isaraelu

Ata

keke ma fualaau aina i luga

Ia Aokuso 1977, sa ma siitia atu ai ma lo’u toalua i Rehovot, Isaraelu, ma le ma fanau e toatolu, e itiiti ifo ma le ono tausaga le matutua. O le gagana sa le masani ai, e toaitiiti ni tagata na tautatala i le gagana Peretania, sa ese meaai mai mea sa masani ai, ma o le fai o faatauga sa o se luitau. Sa ma aoaoina le tele o mea i le lua tausaga sa ma nonofo ai iina.

Sa vave le alu o le taimi, ma e lei umi ae oo ia Tesema. Mo le toatele o tagata i le atunuu, o le aso 25 o Tesema o le a pei o se isi lava aso. Ae mo lo matou aiga ma le toalaiti o isi Kerisiano o loo nonofo i Isaraelu, o le Kerisimasi.

Sa oo ina matou iloa se ulugalii Iutaia lalelei, o Isaraelu ma Millie Jachobson. Sa sau o ia i Isaraelu o se tagata sulufai mai lona atunuu moni o Lituania, ma sa sau le tina mai Aferika i Saute. Sa ova i le tai 60 o la tausaga ma sa nonofo i se tamai fale mautotogi pe tusa ma se maila mai ia i matou. Sa faigaluega Isaraelu i le Weizmann Institute of Science, lea sa faigaluega ai foi lo’u toalua. Sa agalelei i laua ia i matou, ma valaaulia i matou i lo latou fale mautotogi mo ni nai taimi e faamanatu ai ni aso malolo eseese faa-Iutaia.

A o matou sauni mo le Kerisimasi i lena tausaga, sa ma mananao ia lagona e le ma fanau le taua o le faamanatuina o le soifua mai o le Faaola. Sa ou mauaina ni pepa lanu enaena afifi meaalofa ma otioti i le foliga o se laau Kerisimasi. Sa valivali e le ma fanau i ni vali gao lanumeamata. Ona matou faapipiiina lea o lole i le matou laau pepa o ni meateuteu ma faapipii i luga o le puipui. Matou te lei faamoemoeina le tele o meaalofa i lalo o le matou laau i lena tausaga. Sa matou lagonaina le tuuatoatasi ma le mamao ese mai tagata uma ma mea uma sa matou iloaina.

I se tasi afiafi i ni nai aso a o lumanai le Kerisimasi, sa tuitui mai ai se tasi i lo matou faitotoa. Ina ua matou tatalaina le faitotoa, sa matou maua atu Isaraelu Jachobson o tu iina, o uuina se keke. Sa la iloa ma lona toalua o i ma’ua o ni Kerisiano ma o le soifua mai o Iesu Keriso sa taua ia i ma’ua. Sa la faia mea sa la manatu sa sili ona lelei ma faia se keke e fesoasoani ia i matou e faamanatu ai le aso fanau o le Faaola. O se aafiaga ootia lena mo lo matou aiga atoa.

O lena Kerisimasi sa matou fiafia e asiasi i Peteleema ma fanua o loo siomia ai. Ae sa leai se mea na sili atu ona ootia ai i matou nai lo le meaalofa magafagafa lelei o se alii poto e igoa ia Isaraelu Jachobson ma lona toalua agalelei, ma agaalofa, o Millie.