Faamalosia e ala i le Faataitaiga a Maria

Ata

O Maria o loo asia e le agelu o Kaperielu

O Le Folafolaga, saunia e Carl Heinrich Bloch

O soo se tasi na auauna atu i se misiona na te iloa o le faatalitali mo se telefoni o le siitaga e mafai ona atuatuvale ai. O le faatalitali mo le valaauga ina ua taunuu mai lo’u peresitene fou o le misiona o se taimi sili lea ona popole ai mo a’u.

Sa ou mafaufau po o fea o le a ou auauna atu ai ma po o ai la’u soa fou o le a i ai. Sa ou mafaufau foi pe o le a faape’i la’u peresitene fou o le misiona ma pe faapefea ona ia faia ni mea.

I se tasi taeao a o latalata mai siitaga, sa ou faitau ai i le tala i le agelu o Kaperielu o faaali atu ia Maria. Sa faateia au i le molimau na faasoa atu e Kaperielu ia te ia: “E leai lava se mea e tasi e le mafaia e le Atua” (Luka 1:37). Sa ou maofa foi i le tali lotomaualalo a Maria: “Faauta, o au nei o le auauna a le Alii; ia faia ia te au e tusa ma lau fetalaiga” (Luka 1:38).

E mautinoa lava, sa ono lagona e Maria le fefe i le lumanai. O le a faapefea ona tali mai Iosefa? O a ni manatu o isi tagata? Ae sa tuu atu e Maria le faatuatuaga gauai i le Atua ma i Lana fuafuaga mo ia.

Sa ou iloaina a o ou feagai ma o’u lava popolega, sa ou fia pei o Maria. Sa ou manao e fai atu i la’u lava ala, “Faauta, o au nei o le auauna a le Alii.” Sa ou manao e fai soo se mea e finagalo ai le Atua ia te au ma alu i soo se mea na Ia valaauina ai au. Sa faamafanafanaina au i le faamanatu a Kaperielu faapea o le Atua, e mafai ai mea uma.

Mo le vaega o totoe o le vaiaso, soo se taimi lava e oo mai ai mafaufauga popole i lo’u mafaufau, sa ou mafaufau ia Maria. O lana faataitaiga na ou maua ai le lototele ma le malosi e tuu ese ai o’u popolega.

Sa faataitai mai e lo tatou Faaola lenei lava uiga o le lotomaualalo ma le malosi ina ua Ia fetalai mai i le Faatoaga o Ketesemane, “Ava, lou Tama e, e te mafaia e oe mea uma lava; ia e aveeseina lenei ipu ia te a’u: a e aua le faia lo’u loto, a o lou finagalo” (Mareko 14:36; ua faaopoopo le faamamafa). I lena taimi, sa faailoa mai ai e le Faaola e mafai mea uma i le Atua. Ae e pei o Lona tina, sa Ia tuuina atu le faatuatuaga gauai i le finagalo o Lona Tama.

Sa ou maua ni aafiaga matagofie faatasi ma la’u soa fou i la ma eria fou. O le asō o loo ou feagai ai ma ni mea e sili atu ona taufaafefe e le mailoa. Ae a ou manatua Maria—ma lou Faaola—ua faamanatu mai ia te au nai lo le popole, e mafai ona ou filifili e faalagolago i le Atua ma Lana fuafuaga mo a’u. Pe a Ia fetalai mai ia te au e fai se mea faigata, e mafai ona ou feagai ma lena galuega ma le faatuatua aua e leai se mea e faigata ia te Ia.