Matutulungan Tayo ng Espiritu Santo

Ang Ama sa Langit, si Jesucristo, at ang Espiritu Santo ay tinatawag na Panguluhang Diyos. Mahal Nila tayo at nagkakaisang gumagawa para isakatuparan ang plano ng kaligtasan. Ang Ama sa Langit at si Jesucristo ay may katawan na may laman at buto, ang Espiritu Santo ay wala. Siya ay isang espiritu.

Larawan

imahe sa stain-glass ng Ama at ng Anak

Saksi ng Ama at ng Anak

Ang Espiritu Santo ay “sumasaksi sa Ama at sa Anak” (2 Nephi 31:18). Ang ibig sabihin ay maaari tayong tumanggap ng patotoo tungkol sa Ama sa Langit at kay Jesucristo sa pamamagitan ng Espiritu Santo.

Ang Espiritu Santo ay sumasaksi sa lahat ng katotohanan. Tutulungan Niya tayong malaman na ang ebanghelyo—kabilang na ang plano ng kaligtasan, mga utos ng Diyos, ang Pagpapanumbalik, at ang Pagbabayad-sala ni Jesucristo—ay totoo. Palalakasin Niya ang ating patotoo kapag patuloy tayong nananalangin, sumusunod sa mga kautusan, at pinag-aaralan ang ebanghelyo.

Larawan

kamay na may hawak na kompas

Pumapatnubay at Pumuprotekta sa Atin

Magagabayan tayo ng Espiritu Santo sa ating mga pasiya at poprotektahan tayo laban sa pisikal at espirituwal na panganib. Tutulungan Niya tayong mahanap ang mga sagot sa ating mga tanong kung magdarasal tayo at sisikaping gawin ang tama. Palagi Niya tayong aakayin “sa paggawa ng mabuti” (Doktrina at mga Tipan 11:12).

Ang Espiritu Santo ay tinatawag kung minsan na “Mang-aaliw” (Juan 14:26). Mapupuspos Niya tayo ng “pag-asa at ganap na pag-ibig” (Moroni 8:26) kapag tayo ay nag-aalala, nalulungkot, o natatakot. Habang tinutulungan Niya tayong madama ang pagmamahal ng Diyos, madaraig natin ang panghihina-ng-loob at mapalalakas tayo sa ating mga pagsubok.

Matapos tayong binyagan, natatanggap natin ang kaloob na Espiritu Santo sa isang ordenansang tinatawag na kumpirmasyon. Kapag natanggap natin ang kaloob na ito, mapapasaatin palagi ang Espiritu Santo hangga’t namumuhay tayo nang matwid.

Larawan

babaeng nagbabasa ng mga banal na kasulatan

Paglalarawan ni J. Kirk Richards

Paano Natin Pinakikinggan ang Espiritu Santo

Ang Espiritu Santo ay nakikipag-ugnayan sa mga tao sa iba’t ibang paraan. Maaaring kabilang dito ang payapa at nakapapanatag na damdamin o ideya tungkol sa sasabihin o gagawin. Kapag ipinagdasal natin na patnubayan tayo at mapakinggan ang Kanyang mga pahiwatig, malalaman natin kung paano Siya nangungusap sa atin.