« ពួកសាវក និងព្យាការីផ្ដល់ការងារបម្រើដល់ពួកបរិសុទ្ធនៅជុំវិញពិភពលោក » លីអាហូណា ខែ វិច្ឆិកា ឆ្នាំ ២០២៣ ។
ព័ត៌មានសាសនាចក្រ
ពួកសាវក និងព្យាការីផ្ដល់ការងារបម្រើដល់ពួកបរិសុទ្ធនៅជុំវិញពិភពលោក
នៅទិវាអភ័យទោសអន្ដរជាតិ នៅខែកក្កដា ប្រធាន រ័សុល អិម ណិលសុន បានចែកចាយសារលិខិតមួយអំពីការអភ័យទោសនៅលើប្រព័ន្ធផ្សព្វផ្សាយសង្គម ។ លោកបានថ្លែងថា « ការអភ័យទោសមិនមែនគ្រាន់តែជាទង្វើតែមួយដងនោះទេ ប៉ុន្តែជាដំណើរការជាបន្តបន្ទាប់ ដែលទាមទារឲ្យមានការអត់ធ្មត់ សេចក្ដីអាណិតអាសូរ និងការយល់យោគ ។ វាមិនមែនងាយស្រួលជានិច្ចទេ ដើម្បីអភ័យទោសឲ្យអ្នកដែលបានធ្វើឲ្យយើងឈឺចាប់នោះ ។ បងប្អូនអាចទទួលបានកម្លាំងមកពីព្រះយេស៊ូវគ្រីស្ទ » ។
ប្រធាន ដាល្លិន អេក អូក ទីប្រឹក្សាទីមួយនៅក្នុងគណៈប្រធានទីមួយ បានជំរុញដល់យុវមជ្ឈិមវ័យទូទាំងពិភពលោកនៅក្នុងការប្រជុំធម្មនិដ្ឋានកាលពីថ្ងៃទី ២១ ខែ ឧសភា ឲ្យបន្ដមានទស្សនវិស័យដ៏អស់កល្បជានិច្ច កាលពួកគេរស់នៅក្នុង « គ្រាដ៏តានតឹង » នៅសព្វថ្ងៃនេះ ។
ប្រធាន អូក បានថ្លែងថា « មិនថាយើងមានការប្រែប្រួលយ៉ាងណាទេនៅក្នុងភាពចម្រុះនៃការបង្កបង្កើតរបស់ព្រះវរបិតាសួគ៌ គឺទ្រង់ស្រឡាញ់យើងទាំងអស់គ្នា ហើយផែនការនៃសុភមង្គលដ៏ល្អឥតខ្ចោះរបស់ទ្រង់ គឺមានកន្លែងមួយសម្រាប់មនុស្សទាំងអស់ ។ យើងបង្ហាញសេចក្ដីស្រឡាញ់របស់យើងចំពោះទ្រង់ដោយការរក្សាបទបញ្ញត្តិរបស់ទ្រង់ រួមទាំងសេចក្ដីស្រឡាញ់ចំពោះបុត្រាបុត្រីរបស់ទ្រង់ផងដែរ » ។
ប្រធាន ហិនរី ប៊ី អាវរិង ទីប្រឹក្សាទីពីរនៅក្នុងគណៈប្រធានទីមួយ បានលើកទឹកចិត្តពួកបរិសុទ្ធថ្ងៃចុងក្រោយ ឲ្យចូលរួមក្នុងការឧទ្ទិសឆ្លងព្រះវិហារបរិសុទ្ធ សារ៉ាថូហ្គា ស្រ្ពីងស៍ យូថាហ៍ នៅថ្ងៃទី ៣១ ខែ សីហា ដើម្បីឆ្លើយតបដោយសេចក្ដីជំនឿ និងថាមពលទៅកាន់ព្រះដំណាក់ថ្មីរបស់ព្រះអម្ចាស់ ។
ប្រធាន អាវរិង បានមានប្រសាសន៍ថា សមាជិកសាសនាចក្រ « បានទទួលព្រះវិហារបរិសុទ្ធនេះជាសញ្ញាសម្គាល់នៃការទុកចិត្តរបស់ព្រះអម្ចាស់ … និងទំនុកចិត្តរបស់ទ្រង់ថា [ ពួកគេ ] នឹងឆ្លើយតបដោយសេចក្តីជំនឿ និងថាមពលដ៏កាន់តែខ្លាំង ។ ព្រះវិហារបរិសុទ្ធនេះគឺជាកន្លែងដែលក្មួយៗអាចទទួលបានអំណាចច្រើនជាងមុន ជាអំណាចនៃសេចក្ដីសញ្ញាក្នុងព្រះវិហារបរិសុទ្ធ ។ ទ្រង់ដឹងពីចិត្តរបស់ក្មួយៗ ។ ទ្រង់ជ្រាបពីបំណងប្រាថ្នារបស់ក្មួយៗ ដើម្បីបានលើកស្ទួយ និងក្លាយជាមនុស្សដែលសុចរិតជាងមុន—កាលដែលពិភពលោកនេះកាន់តែមានជម្លោះទាស់ទែង និងធ្លាក់ចុះកាន់តែខ្លាំងឡើង » ។
ប្រធាន អិម រ័សុល បាឡឺដ ប្រធានស្ដីទីក្នុងកូរ៉ុមនៃពួកសាវកដប់ពីរនាក់ បានមានប្រសាសន៍ថា នៅពេលដែលសមាជិកនិយាយ និងចែកចាយសារលិខិតអំពីការស្តារឡើងវិញ នោះអ្នកផ្សេងទៀតនឹងទទួលអារម្មណ៍ពីសេចក្ដីពិតនៃពាក្យសម្តីរបស់ពួកគេ ។ លោកបានថ្លែងថា « រឿងដ៏អស្ចារ្យបំផុតនៅក្នុងប្រវត្តិសាស្ដ្រពិភពលោកនេះបានកើតឡើងនៅក្នុងព្រៃពិសិដ្ឋនៅឆ្នាំ ១៨២០ ។ ស្ថានសួគ៌បានបើកឡើង » ។
ថ្លែងទៅកាន់សមាជិកទាំងឡាយ និងពួកអ្នកផ្សព្វផ្សាយសាសនានៅទីក្រុង តូរ៉ុនតូ រដ្ឋ អន់តារីអូ កាលពីខែ មេសា ប្រធាន បាឡឺដ បានថ្លែងទីបន្ទាល់អំពីការហៅជាព្យាការីរបស់ យ៉ូសែប ស្ម៊ីធ ។ លោកបានប្រាប់ពួកអ្នកផ្សព្វផ្សាយសាសនាថា « វាច្បាស់ជាមានអ្វីមួយដែលបានជ្រៀតចូលទៅក្នុងខ្លួនរបស់លោកហើយ—ចាប់ពីចុងសក់ដល់ចុងជើងរបស់លោក—នៅពេលលោកបានស្ដាប់ឮព្រះវរបិតាសួគ៌របស់យើងហៅឈ្មោះលោកថា ‹ យ៉ូសែប នេះជាព្រះរាជបុត្រាដ៏ស្ងួនភ្ងារបស់យើង ។ ចូរស្ដាប់តាមទ្រង់ចុះ ! › [ សូមមើល យ៉ូសែប ស្ម៊ីធ—ប្រវត្តិ ១:១៧ ] ។ នោះគឺជាសារលិខិតរបស់យើង » ។
នៅខែ មេសា អែលឌើរ ឌៀថើរ អេហ្វ អុជដូហ្វ បានទៅធ្វើទស្សនកិច្ចនៅប្រទេសបារាំង អេហ្ស៊ីប និងអ៊ីស្រាអែល ។ លោកបានចូលរួមការប្រជុំសាក្រាម៉ង់នៅប្រទេសអេហ្ស៊ីប បាននិយាយទៅកាន់សិស្សនៅមជ្ឈមណ្ឌលយេរូសាឡិមនៃសាកលវិទ្យាល័យ ព្រីកហាំ យ៉ង់ និងបានទៅទស្សនាទីកន្លែងដ៏បរិសុទ្ធនានា ។
លោកបានមានប្រសាសន៍ថា « វាគឺជាអារម្មណ៍ដ៏រីករាយមួយដែលមិនអាចថ្លែងបាន ដែលព្រះអម្ចាស់បានប្រទានឲ្យខ្ញុំធ្វើជាសិស្សម្នាក់របស់ទ្រង់នៅគ្រានេះ ។ ប្រាកដណាស់ យើងទាំងអស់គ្នាត្រូវធ្វើជាសិស្ស ហើយយើងត្រូវតែរស់នៅស្របតាមសេចក្ដីសញ្ញាដែលយើងបានធ្វើ ។
ប៉ុន្តែការនៅទីនេះ និងថ្លែងជាសាក្សីក្នុងនាមជាសិស្ស ដូចពួកសាវកបានធ្វើនៅសម័យបុរាណដែរនោះ វាគឺជាអ្វីមួយដែលធ្វើឲ្យចិត្តខ្ញុំកក់ក្ដៅ ហើយលើកខ្ញុំឡើងទៅក្នុងមជ្ឈដ្ឋានមួយ ដែលមិនអាចនឹកស្មានដល់ ។ ហើយដោយមានអារម្មណ៍បន្ទាបខ្លួនយ៉ាងខ្លាំង ខ្ញុំមានអារម្មណ៍ថា ព្រះអម្ចាស់ទុកចិត្តខ្ញុំឲ្យធ្វើជាសាក្សីម្នាក់សម្រាប់ទ្រង់ និងព្រះនាមរបស់ទ្រង់ ។ ឱ វាជាអំណរណាស់ដើម្បីដើរនៅកន្លែងដែលពួកសាវករបស់យើងបានរស់នៅ និងបានដើរដែរ » ។
អែលឌើរ ដេវីឌ អេ បែដណា បានឧទ្ទិសឆ្លងផ្ទះដែលបានស្តារឡើងវិញរបស់ យ៉ូសែប និង អិមម៉ា ស្ម៊ីធ នៅទីក្រុង ខឺតឡង់ រដ្ឋអូហៃអូ នៅថ្ងៃទី ២៦ ខែ សីហា ។ អែលឌើរ បែដណា បានប្រាប់ក្រុមមនុស្សប្រហែល ៣០០ នាក់ រួមទាំងថា្នក់ដឹកនាំជាកិត្តិយសក្នុងសហគមន៍ និងថ្នាក់ដឹកនាំសាសនាថា « ផ្ទះនេះគឺលើសពីអគារមួយដែលទាក់ទាញចំណាប់អារម្មណ៍ក្នុងប្រវត្តិសាស្ដ្រទៅទៀត ។ ផ្ទះនេះគឺពិតជាផ្ទះមួយរបស់ យ៉ូសែប និង អិមម៉ា ស្ម៊ីធ មែន—ជាកន្លែងដែលពួកលោកបានរស់នៅជាមួយគ្នាយូរបំផុត មុនមរណភាពរបស់ យ៉ូសែប » ។
អែលឌើរ ឃ្វីនថិន អិល ឃុក បានឡើងថ្លែងសុន្ទរកថានៅសន្និសីទសាកលវិទ្យាល័យប្រចាំឆ្នាំរបស់សាកលវិទ្យាល័យ ព្រិកហាំ យ៉ង់ នៅខែសីហា ។ លោកបានកត់សម្គាល់ថា ក្រុមអ្នកជំនាញខាងភាពចាស់ទុំផ្លូវចិត្តបានលើកឡើងថា ការបម្រើបេសកកម្មផ្ដល់នូវដំណើរការនៃភាពចាស់ទុំសម្រាប់ការរៀនសូត្រ ដែលជាការរៀបចំខ្លួនមួយសម្រាប់ការអប់រំកម្រិតឧត្តម ។
អែលឌើរ ឃុក បាននិយាយថា ជាងពីរភាគបីនៃនិស្សិតនៅ ប៊ី.វ៉ាយ.យូ. បានបម្រើបេសកកម្ម ។ « អាស្រ័យទៅលើឆមាស យើងមានអ្នកត្រឡប់មកពីបេសកកម្មវិញលើសពី ២១,០០០ នាក់ ។ សូមគិតអំពីកម្លាំងដែលនិស្សិត ប៊ី.វ៉ាយ.យូ. ទាំងនេះបានធ្វើនៅទូទាំងពិភពលោក ។ ជាថ្នូរមកវិញ សូមពិចារណាអំពីរបៀបដែលបទពិសោធន៍បេសកកម្មរបស់ពួកគេបានពង្រឹងដល់មជ្ឈដ្ឋានរៀនសូត្រនៅក្នុងបរិវេណនេះ » ។
ក្នុងអំឡុងពេលធ្វើទស្សនកិច្ចនៅប្រទេសនូវវែលសេឡង់ និងប្រទេសអូស្ត្រាលីកាលពីខែ ឧសភា អែលឌើរ ឌី ថត គ្រីស្តូហ្វឺសិន បានអញ្ជើញពួកបរិសុទ្ធថ្ងៃចុងក្រោយនៅក្នុងប្រទេសនូវវែលសេឡង់ ឲ្យរៀបចំខ្លួនសម្រាប់ការឧទ្ទិសឆ្លងព្រះវិហារបរិសុទ្ធ អូកលែន នៅឆ្នាំ ២០២៤ ដោយការកាន់តែមានភាពបរិសុទ្ធ និងដូចជាព្រះគ្រីស្ទខ្លាំងឡើង ។
លោកបានអញ្ជើញពួកគេឲ្យសួរខ្លួនឯងថា « តើខ្ញុំអាចធ្វើអ្វីខ្លះ ដែលនឹងធ្វើឲ្យខ្ញុំក្លាយជាមនុស្សកាន់តែបរិសុទ្ធ អំណោយដ៏ប្រសើរអ្វីពីខ្លួនខ្ញុំដើម្បីថ្វាយដល់ព្រះអម្ចាស់នៅថ្ងៃឧទ្ទិសឆ្លងនោះ ? »
អែលឌើរ នែល អិល អាន់ឌើរសិន បានថ្លែងទីបន្ទាល់អំពីព្រះយេស៊ូវគ្រីស្ទក្នុងអំឡុងការចាត់តាំងមួយទៅកាន់ទ្វីបអាស៊ីនៅខែ កញ្ញា ។ លោកបានថ្លែងថា « បទពិសោធន៍របស់ខ្ញុំក្នុងនាមជាសាវករបស់ព្រះអម្ចាស់បានផ្តល់ឲ្យខ្ញុំនូវសាក្សីមួយថា ព្រះយេស៊ូវគឺជាព្រះគ្រីស្ទ ហើយថាទ្រង់ដឹកនាំកិច្ចការរបស់ទ្រង់នៅលើផែនដីនេះតាមរយៈព្យាការីរបស់ទ្រង់ និងតាមរយៈពួកសាវករបស់ទ្រង់ » ។ អែលឌើរ អាន់ឌើរសិន បានបម្រើក្នុងសាសនាចក្រនៅតំបន់អាស៊ីខាងជើងដើម្បីជួបជាមួយ និងផ្ដល់ការងារបម្រើដល់ពួកបរិសុទ្ធថ្ងៃចុងក្រោយនៅប្រទេសកូរ៉េ ម៉ុងហ្គោលី និងជប៉ុន ។
នៅថ្ងៃទី ២២ ខែ មេសា អែលឌើរ រ៉ូណល អេ រ៉ាសបាន បានជួបជាមួយអនុប្រធាននៃប្រទេសអាហ្វ្រិកខាងត្បូង លោក ផល ម៉ាសហាធីល ដែលជាមេបញ្ជាការទីពីររបស់ប្រធានាធិបតីប្រទេសអាហ្វ្រិកខាងត្បូង ។ នេះគឺជាលើកដំបូងដែលអ្នកដឹកនាំសាសនាចក្របានជួបជាមួយមន្ត្រីរដ្ឋាភិបាលដែលមានឋានៈខ្ពស់បែបនេះនៅប្រទេសអាហ្វ្រិកខាងត្បូង ។
ថ្នាក់ដឹកនាំបានឆ្លុះបញ្ចាំងពីវិធីមួយចំនួន ដែលសាសនាចក្របានជួយសម្រាលទុក្ខរបស់មនុស្ស និងពង្រឹងដល់ប្រជាជននៅអាហ្វ្រិកខាងត្បូង ដែលជំនួយនេះមានទឹកប្រាក់ចំនួន ២៤០ លាន ( ជាង ១៣ លានដុល្លារអាមេរិក ) ចាប់តាំងពីឆ្នាំ ២០១៨ មក ។ ការបរិច្ចាគមានតាំងពីការជួយសង្គ្រោះគ្រោះមហន្តរាយ ការគាំទ្រដល់ការផ្តួចផ្តើមធ្វើការងាររបស់យុវវ័យ កម្មវិធីកសិកម្មចិញ្ចឹមជីវិត និងការធ្វើអន្តរាគមន៍អំពើហិង្សាលើផ្លូវភេទជាដើម ។
អែលឌើរ រ៉ាសបាន បាននិយាយថា លោកសង្ឃឹមថា កិច្ចខិតខំប្រឹងប្រែងទាំងនេះបានបង្ហាញថា សាសនាចក្រគឺមក « ទីនេះក្នុងរយៈពេលយូរអង្វែង ។ យើងធ្វើការណ៍នេះ ដើម្បីធ្វើតាមបទបញ្ញត្តិធំពីររបស់ព្រះអម្ចាស់ ៖ គឺស្រឡាញ់ព្រះ និងស្រឡាញ់មនុស្សជាតិរបស់យើង » ។
ក្នុងដំណើរទស្សនកិច្ចនៅខែ កញ្ញា ទៅកាន់ប្រទេសអ៊ីស្លង់ ស្កុតឡង់ និងអង់គ្លេស អែលឌើរ ហ្គែរី អ៊ី ស្ទីវ៉ែនសុន បានសង្កត់ធ្ងន់លើតម្រូវការដើម្បីឲ្យពួកបរិសុទ្ធថ្ងៃចុងក្រោយមាន « ចិត្តតែមួយ និងគំនិតតែមួយ » ( ម៉ូសេ ៧:១៨ ) ដោយ « រស់នៅផ្ដោតលើព្រះយេស៊ូវគ្រីស្ទ » ហើយធ្វើអ្វីៗគ្រប់យ៉ាងដែលយើងអាចធ្វើបានដើម្បីធ្វើតាមទ្រង់ ។ អមដំណើរដោយភរិយារបស់លោក លីសា អែលឌើរ ស្ទីវ៉ែនសុន បានទៅធ្វើទស្សនកិច្ចនៅទីក្រុង រ៉ៃក្យាវិក ប្រទេសអ៊ីស្លង់ នៅថ្ងៃទី ៧ ខែ កញ្ញា មុនពេលបន្ដទៅទីក្រុង អេឌិនប៊ឺក ប្រទេសស្កុតឡង់ និងទីក្រុង ណតហេមថុន ប្រទេសអង់គ្លេស នៅថ្ងៃទី ៩–១០ ខែ កញ្ញា ។
នៅក្នុងការប្រជុំធម្មនិដ្ឋានមួយនៅមជ្ឈមណ្ឌលម៉ារីអុតក្នុងអំឡុងសប្តាហ៍អប់រំរបស់សាកលវិទ្យាល័យ ព្រិកហាំ យ៉ង់ នៅថ្ងៃទី ២២ ខែ សីហា អែលឌើរ ឌែល ជី រិនឡាន់ បានធ្វើទេសនកថាដ៏ស៊ីជម្រៅមួយអំពីរបៀបដែលការសង្កេតមើល ហេតុផល និងសេចក្ដីជំនឿធ្វើការរួមគ្នាដើម្បីសម្របសម្រួលឲ្យមានវិវរណៈ ។ អែលឌើរ រិនឡាន់ បានបង្រៀនថា បើមានតែម្នាក់ៗឯង នោះការសង្កេតមើល ហេតុផល និងសេចក្ដីជំនឿគឺមិនគួរឲ្យទុកចិត្តបានឡើយ ។ ចំណុចទាំងបីនេះត្រូវតែធ្វើការរួមគ្នា ។
« សេចក្តីជំនឿ ‹ ដែលឥតមានការប្រព្រឹត្តតាម › [ យ៉ាកុប ២:២០ ] នឹងមិនរឹងមាំឡើយ ។ សេចក្ដីជំនឿនឹងរីកចម្រើនឡើងបាន តែតាមរយៈការសង្កេតមើល និងការមានហេតុផល ដោយគួបផ្សំគ្នាជាមួយនឹងកិច្ចការខាងវិញ្ញាណផ្សេងទៀតតែប៉ុណ្ណោះ ។ លើសពីនេះទៅទៀត ជារឿយៗ ការសង្កេតមើល ហេតុផល និងសេចក្ដីជំនឿតែងតែជាកិច្ចតម្រូវជាមុន មិនត្រឹមតែដើម្បីទទួលបានវិវរណៈផ្ទាល់ខ្លួនប៉ុណ្ណោះទេ តែក៏ដើម្បីយល់ពីវិវរណៈនោះផងដែរ » ។
នៅថ្ងៃទី ១៥ ខែ មិថុនា អែលឌើរ ហ្គើរីត ដបុលយូ ហ្គង បានជួបជាមួយលោក អេមីណិមស៍ សេក អូសមេន នូហ៊ូ ស្សារូប៊ូធូ ដែលជាលោកសង្ឃចាមធំថ្នាក់ជាតិ និងជាចៅក្រមច្បាប់សាសនាមូស្លីមធំនៃសាធារណរដ្ឋហ្គាណា ។ កិច្ចប្រជុំនេះបានធ្វើឡើងនៅលំនៅដ្ឋានរបស់ចៅក្រមច្បាប់សាសនាមូស្លីមធំរូបនេះនៅទីក្រុង អាក្រា ។
អែលឌើរ ហ្គង បានចែកចាយអំពីរបៀបដែលសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ឲ្យតម្លៃដល់ឪពុកម្ដាយទីមួយរបស់យើងគឺ លោកអ័ដាម និងនាងអេវ៉ា ដូចជាពួកមូស្លីមដែរ ៖ « យើងក៏ជឿដែរថា យើងកើតពីឪពុកម្ដាយដូចគ្នា ហើយគួរតែរស់នៅដោយសុខដុមនឹងគ្នាជាគ្រួសារមួយ » ។ អែលឌើរ ហ្គង បានកត់សម្គាល់ថា យើងត្រូវបានដឹកនាំដោយព្យាការីនៃព្រះ គឺប្រធាន រ័សុល អិម ណិលសុន ដែលផ្ដល់ការបង្រៀនស្រដៀងគ្នាទៅនឹងការបង្រៀនរបស់លោកសង្ឃចាមដែរ ។ « ព្យាការីរបស់យើងបង្រៀនយើងឲ្យទុកឲ្យព្រះឈ្នះ លោកបង្រៀនថា យើងទាំងអស់គ្នាគួរតែធ្វើជាអ្នកផ្សះផ្សាគេ លោកបង្រៀនថា យើងគួរតែជួយយុវវ័យរបស់យើងឲ្យទទួលបានការអប់រំ និងការបំពាក់បំប៉ន ដើម្បីឲ្យពួកគេអាចទទួលបានជោគជ័យក្នុងជីវិត ហើយលោកបង្រៀនយើងឲ្យពង្រឹងស្ដ្រី និងជំនាន់កំពុងពេញវ័យរបស់យើង ។ ទាំងនេះគឺជារឿងទាំងអស់ ដែលខ្ញុំបានស្ដាប់ឮពីលោកនៅថ្ងៃនេះ » ។
អែលឌើរ អូលីសេស សូរ៉េស បានធ្វើដំណើរ ១០ ថ្ងៃទៅកាន់ប្រទេស ស៊ីលី អ៊ុយរូហ្គាយ និងអាហ្សង់ទីន កាលពីខែ មិថុនា ។ ពេលវេលារបស់លោកនៅប្រទេសអាហ្សង់ទីនរួមមាន ការពិភាក្សាមួយនៅក្នុងសន្និសីទអន្តរជំនឿ បទសម្ភាសន៍ជាមួយអ្នកកាសែតអាហ្សង់ទីនដ៏ល្បីល្បាញម្នាក់ និងការងារបម្រើដល់សមាជិកនៃសាសនាចក្រ ។
អែលឌើរ សូរ៉េស បានប្រាប់អ្នកដែលបានជួបជុំគ្នាទាំងនោះនៅក្នុងការប្រជុំសភាអន្ដរជំនឿទូទាំងពិភពលោក និងការសន្ទនាអន្ដរវប្បធម៌នៅក្នុងទីក្រុង ប៊ុយណូស៊ែ ថា « សេចក្ដីសុខសាន្ដចាប់ផ្ដើមដោយការគោរពដល់ភាពពិសេសរបស់បុគ្គលម្នាក់ៗ ។ គោលគំនិតនៃភាពថ្លៃថ្នូររបស់មនុស្សអាចមានភាពខុសគ្នាពីវប្បធម៌មួយទៅវប្បធម៌មួយ ប៉ុន្តែវាមានភាពថេរក្នុងពិភពលោកមួយដែលមានចលាចល និងការផ្លាស់ប្ដូរ ។ សិទ្ធិមនុស្សដកចេញនូវការមិនមានតុល្យភាពនៃឯកសិទ្ធិ ទ្រព្យសម្បត្តិ និងឱកាស ។ ហើយសិទ្ធិទាំងនោះត្រូវតែអនុវត្តជាសកល » ។