អែលឌើរ អាឡិចហ្សានដឺ ឌូស្សគូ

ពួកចិតសិបនាក់ដែលមានសិទ្ធិអំណាចទូទៅ

ឪពុកម្តាយរបស់អែលឌើរ អាឡិចហ្សានដឺ ឌូស្សគូ បានចូលរួមក្នុងសាសនាចក្រនៅទីក្រុង បូស្តុន រដ្ឋ ម៉ាសាឈូសេត សហរដ្ឋអាមេរិក បន្ទាប់ពីបានទៅទស្សនាការតាំងពិព័រណ៍ពិភពលោកនៅទីក្រុង ញូវ យ៉ក ក្នុងឆ្នាំ ១៩៦៤ ។ ឪពុករបស់លោកបានរំភើបខាងវិញ្ញាណ ដោយសារអ្វីដែលគាត់បានរៀនអំពីដំណឹងល្អនៅក្នុងត្រសាលដែលបានឧបត្ថម្ភដោយសាសនាចក្រ ហើយគាត់បានអញ្ជើញពួកអ្នកផ្សព្វផ្សាយសាសនាឲ្យមកបង្រៀនគាត់ និងអនាគតភរិយារបស់គាត់ ។

ឪពុកម្ដាយរបស់លោកគឺជាសមាជិកថ្មីនៅក្នុងសាសនាចក្រ នៅពេលលោកកើត ប៉ុន្តែអែលឌើរ ឌូស្សគូ បាននិយាយថា លោកតែងតែដឹងថា លោកនឹងទៅបម្រើបេសកកម្ម ។

អែលឌើរ ឌូស្សគូ ដែលបានបម្រើនៅក្នុងបេសកកម្ម ព័រទុយហ្គាល់ លីសបោន ពីឆ្នាំ ១៩៨៦ ដល់ឆ្នាំ ១៩៨៨ បានថ្លែងថា « វាមិនបានយល់ច្បាស់ទេ រហូតដល់ខ្ញុំបានទៅបេសកកម្មរបស់ខ្ញុំ ទើបខ្ញុំចាប់ផ្តើមយល់យ៉ាងពិតប្រាកដអំពីសិរីល្អនៃកិច្ចការផ្សព្វផ្សាយសាសនា ហើយថាតើវាអាចមានអានុភាពខ្លាំងប៉ុណ្ណានោះ ។ វាបើកភ្នែកខ្ញុំយ៉ាងច្បាស់ទែងឲ្យដឹងពីនគរព្រះ ព្រមទាំងអត្ថន័យនៃការណ៍នេះ » ។

អែលឌើរ ឌូស្សគូ ជឿថា សមាជិកភាពក្នុងសាសនាចក្រមានសក្តានុពលដ៏អស្ចារ្យដើម្បីធ្វើឲ្យមានភាពខុសគ្នានៅក្នុងពិភពលោកនេះ ។

លោកបានពោលថា « ខណៈដែលចំនួនសមាជិកភាពរបស់យើងអាចនៅតិចនៅឡើយ ប៉ុន្ដែចំនួននេះមានអត្ថន័យ និងអានុភាពយ៉ាងខ្លាំង ។ យើងដើរជាមួយព្រះគ្រីស្ទ ដោយដៃកាន់ជាប់គ្នា ។ ហើយបន្ទាប់មក យើងដើរជាមួយគ្នា ។ ខ្លួនយើងផ្ទាល់នឹងក្លាយជាព្រះហស្ដ និងព្រះសូរសៀងរបស់ព្រះអម្ចាស់ក្នុងការលើកស្ទួយ និងពង្រឹងដល់អ្នកដទៃ » ។

លោក អាឡិចហ្សានដឺ ឌូស្សគូ បានកើតនៅថ្ងៃទី ១៧ ខែ វិច្ឆិកា ឆ្នាំ ១៩៦៦ ជាកូនប្រុសរបស់លោក នីកូឡាស និងលោកស្រី ដូណា លី ឌូស្សគូ នៅទីក្រុង ហ្វែរហ្វៀល រដ្ឋកាលីហ្វ័រញ៉ា សហរដ្ឋអាមេរិក ។ អែលឌើរ ឌូស្សគូ បានរៀបការជាមួយ ជេនីហ្វឺ ប៊ឺនហាំ នៅឆ្នាំ ១៩៨៨ នៅក្នុងព្រះវិហារបរិសុទ្ធ សលត៍ លេក ។ ពួកលោកមានកូនប្រាំបីនាក់ និងចៅប្រាំបួននាក់ ។

អែលឌើរ ឌូស្សគូ បានបញ្ចប់ការសិក្សាថ្នាក់បរិញ្ញាបត្រផ្នែកសេដ្ឋកិច្ចមកពីសាកលវិទ្យាល័យ ព្រិកហាំ យ៉ង់ ក្នុងឆ្នាំ ១៩៩០ ។ លោកបានទទួលសញ្ញាបត្រថ្នាក់បណ្ឌិតផ្នែកយុត្តាធិការមកពីសាលាច្បាប់ ចេ រ៉ូប៊ីន ក្លាក នៃសាកលវិទ្យាល័យ ប៊ី.វ៉ាយ.យូ. នៅឆ្នាំ ១៩៩៣ ។ លោកបានធ្វើការឲ្យក្រុមហ៊ុនច្បាប់ដែលបម្រើដល់ផលប្រយោជន៍សាធារណៈថ្នាក់ជាតិមួយ និងបានធ្វើជាក្រឡាបញ្ជីនៅតុលាការឧទ្ធរណ៍សហរដ្ឋអាមេរិកសម្រាប់ Seventh Circuit មុនពេលការងារចុងក្រោយបំផុតរបស់លោកជាមួយនឹងក្រុមហ៊ុនច្បាប់ Kirton McConkie នៅទីក្រុង សលត៍ លេក ដែលជាកន្លែងដែលលោកផ្តោតលើវិសោធនកម្មលើកទីមួយនៃរដ្ឋធម្មនុញ្ញ និងសេរីភាពខាងសាសនារបស់សហរដ្ឋអាមេរិក ។

អែលឌើរ ឌូស្សគូ កំពុងបម្រើជាប្រធានស្តេក នៅពេលលោកត្រូវបានហៅឲ្យបម្រើក្នុងការហៅរបស់លោក ។ លោកក៏បានបម្រើជាប៊ីស្សព ទីប្រឹក្សាជាន់ខ្ពស់ ទីប្រឹក្សាគណៈប៊ីស្សព និងជាប្រធានកូរ៉ុមអែលឌើរផងដែរ ។