“Te Aomata ae Boboto Iaona Ana Boki Moomon,” Riaona, Tianuare. 2024.
Kam Butimwaeaki Nakon te Beeba ni Kaongora Aei
Te Aomata ae Boboto Iaona Ana Boki Moomon
N ririki aika bwakanako, ao a kaoai taari mwaane aika taan ibuobuoki bwa N na taua ma nanou ni kamatebwaia ana Boki Moomon. Ngke a anganai te kakao aei, I ataia ae, e ngae ngke I bon wawareware teutana n ana Boki Moomon ni katoa bong, I bon aki kona n taua ma nanou ni kamatebwaia raoi.
A tibwaua nakoiu teuana te berita ae nako mairoun Beretitenti Ezra Taft Benson: “Iai mwaakan te boki [Ana Boki Moomon] are e na moanna ni bwaro nako nanon maium n te tai are ko taua ma nanom ni kamatebwaia te boki. Are ko na kunea te mwaaka ae korakora n tokanikai man te kariiri … n totokoa te mwakuri ni mwamwanaaki … n tiku iaon te kawai ae e eti man irariki” (Teachings of Presidents of the Church: Ezra Taft Benson [2014], 141).
I butimwaea aia kakao, ao inanon tabeua namwakaina I nooria bwa a bon kakoroaki nanon aia berita. E a tia ni bita maiu.
Oin raoi bukin ana Boki Moomon bwa e anganiira kakorakoraan maiura n tamnei bwa e uotiira ni kaniira nakon Iesu Kristo. N ana rongorongo Beretitenti Henry B. Eyring n iteraniba 4, e koroboki, “Naake a wawareware ni koaua n ana Boki Moomon, maiuakini reirei mai iai, ao n tataro ibukin karekean uaana aika raraoi a na bon namakina te Tamnei ae Raoiroi ao ni kakorakoraki riki aia onimaki, ma aia koaua iroun, te Tia Kamaiu.”
Iesu Kristo Bon ngaia boton te rongorongo n ana Boki Moomon. Ngkai bon raou n korea te rongorongo, Madison Sinclair, ao I tibwaia n ara rongorongo “Iesu Kristo inanon ana Boki Moomon” (iteraniba 10), e raka iaon 7,000 kakoaua ibukin te Tia Kamaiu inanon ana Boki Moomon.
I ataia bwa ngkana ti kamatebwai n ana Boki Moomon n te ririki aei ma Nakomai, Iriirai, ti na bon kaan riki nakon Iesu Kristo.
Ma te tangira,
John Hilton III
Te Burobeetia ibukin Reirein te Ekaretia, Brigham Young Iuniwetiri
Kamataata n te tamnei iroun J. Kirk Richards