Tokanikai man Mamaaran ara Kantaninga n te Maiu n Tamnei—Teraa ae N na Karaoia Ngkai?

Inanon te tai ae tiaki ataia bwa ti na tan nakea ke tera ae ti na karekea, I ataia bwa kariiri n te aonaaba aei e kona ni baiti n taonanako bwaai aika bwain te tamnei. Sister Recca L. Craven, Kauoman ni Kauntira n te Beretitentii ni Kabuta n te Bootaki n Ataeinaine, e taku, “E korakora te kariiri n te aonaaba aei are e kona naba ni mwamwanaia riki aika tia n rineaki, ni karaoia bwa a na tei raroa man aia berita aika tabu.”¹

I a tia n nooria kairake n ikawai ake a teimatoa n rootaki ma aia koaua i mwiin okia ni mitinare. I a tia naba n noria bwa a kanga babaire ake atia ni koro nanoia n aron reken te beeba man te uniwetiri ke ni mareaki ao n tokina a kairaki nako man bwaai ake a rangi ni kakawaki ngkana aki karekea nen ana euangkerio Iesu Kristo i nanon maiuia.

I a tia naba n rinanon te maiu ni kekeiaki n te maiu n tamnei. E kangaanga n tabetai reken te unganano ao n aki taningaroti ni bwain te tamnei, riki ngkana aki roko taian kakabwaia n te tai are I kaantaningaia iai. I aki toki n tangiria bwa N na tabe n rikirake n taainako—I aki tangiria bwa N na taniingaroti ni bwain te tamnei. Ma n tabetai I namakinna bwa I a bon ira naba te bwai ae e karaoaki n aki ataa raoi bukina.

Irarikina, ngkana I kaonota te tai ibukin Tamara are i Karawa ao Iesu Kristo ni katoa bong, riki n te kawai ae uarereke man bebete (taraa Aramwa 37:6), I namakina te rau ao te teimatoa are e reke man Ana euangkerio, riki ngkana e aaki nakoraoi te aonaaba.

E taku Beretitenti Russell M. Nelson: “I bubuti ngkami bwa kam na karimoaa te Atua inanon maiumi. Anganna ami tai ae bati. Ngkana kam karaoa aei, kam na nora keeraken marurungin tamneimi.”² Ngkana I rineia raoi ni karekea teonimaki iroun Iesu Kristo ni katoa bong ao ni karekea au tai ibukin anua ni maiu ake N na boraoi iai ma Ngaia, I uringii taai aika a nakoraoi ni maiun tamneiu ao n namakin kabouan te kantaninga,kaantaningaan baika a raraoi n taai aika na roko, ao te onimaki.

Te tai teuana are I namakina iai te mamaara n te iango bon tain au kabanea n ririkin te uniwetiri. Te maiu e rangi ni kangaanga. Bon tain raoi te buti n te aoraki n te aonaaba, ao I rangi ni korakai ngke I titiku ni mweengau ni katiai au bwai n reirei. Iai teutana nakobuakan kawaiu ao te reitaki inanon maiu.

Riki I bon korakai naba ma te taromauri n te tai aio. Angin te tai I teirake man au kainiwene ma oneau ni matu ao n ongora nakon te bootaki n toa iaon te intanete ibukina bwa tii anne kaungaau are I kona n reitai ma te tabo n taromauri.

Inanon taai ni karawawata aikai, I baireia bwa N na nakoia au utu ao raoraou ao n tibwa nakoia te bwai ae I a tia n namakinna ni kaineti ma mamaaran au iango. Akea au namakin bwa N na bongana n nakon taai aika na roko ao n aki ataia bwa a na kanga n nakoraoi bwaai. Ao mai ikanne a tuangai bwa a na tataro ibukiu ao ni boutokaai e ngae ngke a bon mena n te tabo ae raroa nako.

Ngke I kawariia ake I rangi n tatangiriia ake a rangi ni korakora aia onimaki ao ngke I tataro nakon Tamara are i Karawa ma teutana te ungannano n tamnei, I namakina te boutoka ni kamatoakiao te tangira.

I noria bwa ngkana I rang katuua-au taratara iaon au kantaninga aika a tuai koro nanoia, au nanokokoraki, ke korakaiu, au onimaki e a rikirake ni mangaongao. I kabwaka ni kinai kakabwaia i nanon maiu. Man teimatoau ni katobibiai ni bwaai aika raraoi man warekan au kakabwaia n tamanuea, kakauongo nakon reirei man te maungatabu ni kabuta, ao ni kabanea au tai ma aomata aika anganganai te kaunganano ibukin te tamaroa, I manga karaua raoi n taraa te kaokoro n te kakai are reke ni maiu n ana euangkerio Iesu Kristo.

E ngae ngkana ko tuai kona n noora raoi kawaim ke bwaai aaki rinanon are e kantaningaaki, e bon rangi ni mwaiti bwaai aika a tamaroa n maium ao ni mwaiti tibwanga aika a tauraoi ibukim bwa e na buokiko n rikirake ni waakinao ni kawain te berita ae tabu. A rangi ni mwaiti baika a riai n reiakinaki ao ni karikirakeaki, riki n te maiu n tamnei. Bubutiia Tamam are i Karawa ibukin te kairiiri. E na buokiko n ukora ao ni kunei kairiri ao tibwanga aika a tamaroa ibukin karikirakean ao reiakinan bwaai ake a katobibiiko (taraa Taekan te Onimaki 1:13).

Tamnei

te ataeinnaine ae ikawai ae bwennarina

Keiaki Kataia

Ara kekeiaki ni maiura n tamnei e kona n tabetai n riki kanga ai aron te nao—are e birirake ao ni bwaka. Ti kona n namakina te matoa n ara onimaki ao te kimwareirei n te euangkerio. Ao n tabetai, ti kona ni manga korakai ni kan ataia bwa ti na nakea imwiina. Ti na bon korakai ngkana a roko kakaewenako, n titiraki aika a tabekaki, ke iremwen rokon taian kakabwaia, riki ngkana ti rangi ni kabanea ara kona ni maiuakina te euangkerio. I nanon taai ni kangaanga aikai, I kona n nooriaaomata bwa a toua uoua te kawai: are teuana bon te kawai ike a na roko iroun te Tia Kamaiu, ao are teuana bon tiaki kawain te TIa Kamaiu.

N tabetai ao I kabotaui taai aikai ma karakinan Moote ao te naeta ae buraati (taraa Warekaia Iteraera 21:8­9). Ngke a kainnanoa kamaiuaia tibun Iteraera i mwiin tenaruakiia irouia naeta aika a kamamate, e angania Mote te kawai ae rangi ni bebete ibukin kamaiuakiia: a na tii taraa te naeta ae te buraati are tei ibukin Iehova. Anne te bwai ae a riai ni karaoia. Ti teuana taraakina ao a kamaiuaki naba. Ao a bon mate naake a rineia bwa na aki taraia. (Taraa 1 Nibwaai 17:41.)

E reke n au iango n te karaki aei bwa tera arora ni uouoti kamamaten te rawawata aika a reke man te bwarannano ao nanobuaka ibukin aki reken bwaai ake ti tangiria bwa a reke n taina, ngke e mena te bwainaoraki imatara!

Te kiing ibukin karekean te kaantaninga, te rau, ao te onimaki ibukin taai aika na roko e na reke bon ti man nooran Iesu Kristo inanon maiura (taraa Ereman 8:14­15; Ioane 3:14­17).

I aki toki n rangi ni matoatoa n aron tarakiu ngkana I karaoa te kaairua . Ma ibukina bwa I a tia ni kataia ni keiaki n reiakina taekan ao ni kakoaua Tamara are i Karawa ao Iesu Kristo, I ataia bwa I kona ni katuka au onimaki Irouia ibukin kabwarakin au bure, rikirakeu, ao kamaiuakiu inanon taai ni kangaanga. I ataia bwa ngkana I rairaki Nakoia inanon te tataro, kamatebwaian Nakomai, Iriirai, kabanea au tai n te tembora, ao ni kakaonimaki ni weteakiu, I namakina te kakaitau iai ao te bitaki.

Ngkai I tabe n Ukoukouriia, I noora ana euangkerio Iesu Kristo: te tabo ni katantan are anganiira iai te mweraoi, te kamanoaki, ao te kamarurungaki man taian naeta n te aonaaba aei.

Unimwaane Jeffrey R. Holland man te Kooram n te Tengaun ma Uoman e kakoaua bwa: “‘Te kaantaninga ae tamaroa ma ni kororaoi,’ e bungiaki ma tangiran te Atua ma aomata ni kabane—anne ae ti tangiria ibukim. … N raonaki ma te kaantaninga anne bon te wirikiriki ae koaua ae e tangiriko te Atua, te Kristo anne bon am Tia Ibuobuoki, ae e koaua te euangkerio. Otana e na kauringko bwa iai i nanon te euangkerio n tainako—ni katoabong, ni katoa aoa—te tai ae boou, te maiu ae boou, te ririki ae boou. Bon te kakai ae tamaroa! Bon te bwaintangira! Ao ibukin ana bwai n tituaraoi Kristo, ao te kabanea ni bwai ae tamaroa i nanon maiura bon ara bwai ngkana ti teimatoa ni kakoaua ao ni kataia ni kekeiaki ao n teimatoa ni kantaninga irouna.”³

A uota te bitaki ae mwaiti kairake n ikawai, te nano uoua ae bati, ao, eng, karekean bwaai ake aki kantaningaia inanon maiuia. Ma ana euangkerio Iesu Kristo e teimatoa n koaua ao ni matoa n taainako. Ao Ana berita ma Tamara are i Karawa a bon koaua ngkana ti reitinako ni kawain te berita ae tabu. E kona te aonaaba n tabetai ni karikia bwa e na kangaanga kabotoan ara taratara Iaona. Ma anaan te mwaneka ni waerake ae ngaia ae e uotiira Nakoina ae bon waki nako. Ngkana ti tabe ni kaan ma Kristo, ti na bon aki kona n karekea te mamaara n ara iango—ti waakinakoi nakon te kaantaninga, te rau, ao te kimwareirei.