“Boni Ngai te tia ‘Beibeti n te ran’ ke te tia ‘Tebo inanon te ran’?,” Riaona, Tianuare 2024.
Nakomai, Iriirai
Boni Ngai te tia “Beitbeti n te ran” ke te tia “Tebo inanon te ran”?
Ni miin Riaai i aon te kai ni kamaiu (taraa 1 Nibwaai 8), n am iango bukin tera ngkai tabeman aomata a kiitana te kai ni kamaiu ao tabemwaang a tiku i rarikin te aroka bwa a na katoonga uaana? Tabeman aomata ake a tia ni katoonga uaan te kai a manga bwaka, a maamaa irouia aomata ake a ngareakiniia mai i nanon te kateitei ae korakora man mwawaawa. Teuana te oi ae kaokoro imarenaia kurubu aikai bon te bwai ae a tia n rinanona ngkoa i mwaain ae a roko ikekei: aroia ni kamatoai baia n taua te kai te biti—ana taeka te Atua.
Tinetine ke n Taua ni Kamatoaa
Ao e nooria Riaai aomata ake a “waaki nako … n taua te kai te biti” ao naake “a kamatoaia ni waaki nako mooa, n teimatoa n taua te kai te biti” (1 Nibwaai 8:24, 30; e kairaki ma katuruturuana).
Unimwaane David A. Bednar man te Kooram n Abotoro n te Tengaun ma Uoman e taekinna bwa teniua te kurubu aika a waaki i aon te kawai, ma ti uoua kurubu aika a reitinako n taua te kai te biti:
“[Te Kauoua ni Kurubu]” a bon karekei naba kakabwaia man te kai te biti, ao a bon teimatoa n taua! … E mwaiti reirei ake I karekei man tauakin te kai te biti are e ‘kaungaai’ bwa N na riai ni karaoa au kamatebwai ni katoa tai nakon ae i ti iangoa naba arou bwa N na teimatoa, ao ni kabanea nanou n ana taeka te Atua. …
E teimatoa naba te kateniua ni kurubu ni waaki nako moa ma te onimaki ao te nanomatoa; e ngae n anne, bon akea kakoauana ae a kitana te kawai. … Tao te kateniua ni kurubu n aomata aikai a teimatoa ni wareware ao ni kamatebwai ao n ukoukori koroboki aika tabu. … Aio te kurubu ae Ngai ao ngkoe ti na kataia ni kainna.”1
Tao ngaira taan “beibeti n te ran” ke taan “tebo inanon te ran” ngkana ti a rinanon ana taeka te Atua? Taan beibeti inanon te ran ao taan tebo inanon te ran a bon kaai ni mwaimwai, ma taan tebo inanon te ran a kona riki n inako inanon te ran ao ni kunea riki te taneiai ae bati are e reitanako ae e kona n uota te kukurei.