“Taian Reirei n te Riki n Toronibwai: Kairekerekean te Mwane nakon Koaua n te Euangkerio,” Riaona, Tianuare. 2024.
Reirei iaon Te Riki n-Toronibwai: Kairekerekean te Mwane nakon Koaua n te Euangkerio
Ana reirei te Ekaretia iaon te riki n toronibwai e bon buokiia ake a reirei mai iai ni uota te nonoori n te tamnei are e kaineti ma te mwane.
Tabeua kaetieti rimoa mairoun te Uea nakoia Natina bon taekan te mwakuri ao te Toronibwai I bon Iroum. N te O Tetemanti, e tuanga Atam ao Ewa, “Ko na amwarake n te amwarake ma maononi moam” (Karikani Bwaai 3:19). Ao nakoia tibun Iteraera, E taku, “Onobong am bong ni mwakuri” (Te Otinako 20:9).
Ni boong aikai, bootaki ni kabutaa te aonaaba are e mwanenii te Ekaretia ibukin te riki n toronibwai a bane ni buokiia natin te Atua ni karikirakea te atatai n te reirei, te konaa ni waekoa n tokanikai n te namakin, kakaeakin mwakuri aika tamaroa, moana katean karikirake, ao—n aron taneiai akana a kaotaki—tamaroan aron tararuaan te mwane.
Kabwakakin te Kabwianibwai n am Karekemwane aika Aki Tau
N ana tai n iein, Deborah, mai Michigan, USA, bon akea ana kangaanga n tararuaan ana mwane. Ma i mwiin te tai are ngaia ma kainnabana a maenako, e a rangi ni matoatoa aron kaitaraan kabwaraan taarau. E ngae ngke Deborah e kukurei n roroko nakon te tembora, e moanna ni korakai ma kakabwakaan ana kabwianibwai ao n toki rorokona nakon te tembora.
E kakaea buokana mairoun ana bitiobi, ike e a tuangnga iai taekan te Reirei i aon te riki n toronibwai i aon tararuaan te mwane i bon iroum, are e waakinaki n ana titeiki. E motikia Deborah bwa e na iria, ma n te moan tai ao e bon aki noora bukina moa bwa tera kakawakina ngkai e nang iria naba: “Ni koauana raoi, I taetae i nanou, ‘I aki ata bukin rokou ikai. I ataa arou n kataumanea au mwane. I a tia naba ni kataumanea aron maiu ni kabane.’”
E kaitiboo Deborah ma kain te kurubu ao te tia reirei. I nanon uoua te aoa ni katoa wiiki, a reiakina taekan koaua tabeua ake a kanakoraoa te babaire i aon te mwane (n aron barongaan raoi te kataumane) ao ai koaua n te maiu n tamnei i aon kanakoraoan babaire iaon te mwane (n aron te riki bwa te tia tararua ae kakaonimaki i aon am karekemwane). “I bon aki kairekerekei bwaai aika uoua aikai n aron ae karaoia te kiraati n ikotakiia,” e taetae Deborah.
E namakinna Deborah bwa reitakina ma Tamana are i Karawa n ana berita aika tabu e buokia n reireinna arona ni kanga ni karina te Uea inanon ana babaire iaon te mane. “Tamau are i Karawa e aki toki ni memena ikekei ibukiu. … I riai ni Karinna inanon au waaki ni kabane.”
Ngke Deborah e mwakuri iaon te wirikiriki ao kairiiri ake e karekei mairouia kain ana kurubu n reirei iaon te toronibwai, e a tibwa kona ni katukui mane ibukin ana kabwianibwai, kabwaraan ana taarau, ao riki ni kawakina ana mwane, ni kabane n aki karaka ana karekemwane.
Beretitenti Heber J. Grant (18561945,) e kakoaua bwa e mwaiti te bwai ae kona ni karaoaki man nikiran kareke mwane i mwiin kabwakakin kabwianibwai nakon kabonganakin are mwaitina ae bwanin i mwain kabwakaan am kabwianibwai: “I kaota au koaua … bwa mwaane ao aine ake a tia ni bwaina te koaua ma te Atua, naake a tia ni kabwakai kabwian aia bwai … a kakoauaa … bwa te Atua e a tia n anganiia te wanawana, n te aro are a na kona ni kabonganaa nikiran are te katebwina, ao e rangi ni korakora mwaitina irouia, ao a bon tia ni karaoa ae mwaiti riki mai iai nakon are a na aki bwaina te koaua nakon te Uea.”1
Deborah e karekei taian kakabwaia “ibukin te maiu n tamnei ao n rabwata” (Motiaea 2:41) ngkai e kawakina tuan te kabwianibwai ao ni kamwakura ana moan tua te euangkerio nakon ana kataumwane. Kawai ake a tia ni kaotaki nakoina irouia kain ana kurubu n reirei n te riki n toronibwai ao kairiiri mai iroun te Tamnei ae Raoiroi e bon katauraoa kawaina ni karekea ana kariaia nakon te tembora. ao n oki nakon te tembora. “Bwaai ni kabane ake I taku bwa I aki kona ni karaoi, E tuangai bwa I kona ni karaoia ao ni karaka riki,” e taku. “Tera ae ko karaoia n te bong aei e kamatoa katauraoam nakon taai aika i mwain, ao I tangiria bwa n taai aika na roko ao N na nakonako i nanon te Detroit Tembora ao ni moana au mwakuri n ibuobuoki ibukiia au bakatibu.”
Tamnei man aia kariaia Berry ao Light Chu
Otinako man te Taarau
Berry Chu mai Taipei Titeiki i Taiwan e kainanoa te rabakau are iaona riki ana atatai imwiin karaoan ana karikirake are aki nakoraoi mwiina, are e katukua ma ana taarau ae koro tirana. Te kangaanga are karika mamaran Berry ao n aki kan waaki nako. Ma e kananorinanoa Berry ao e ukora Tamana are i Karawa n ana tataro. Man ana tataro anne, ao e karekea te unga n nano n tuanga kainnabana te bwai are e a tia n riki. Ma te karaurau ao ni karau nano, kainnaban Berry, Light Tsai, e kaeka ni kakoaua raoi bwa a na kakaea te anga are a na kona n tokanikai man aia taarau. A ikotaki, Light ao Berry n tataro n ukora ana kairiiri te Uea.
A namakinna Berry ao Light bwa e na mwaiti te bwai ae a na karekea man ana reirei te Ekaretia i aon te riki n toronibwai n irekereke ma kabonganaan te mwane. N aki tarai rianakon aia taarau, a karaoa aia babaire i aon kabwarakin aia taarau. Man te ibuobuoki n aia reirei, a reiakinna bwa a na “moan bwaia moa kabwakaakin aia kabwianibwai … bwa aonga ni kona ni babaronga aia mwane n ana kawai te Atua,” e taku Berry. “Ti reiakina naba karaoan ara kataumwane ao ni moani bwaia ara kabane mwane i aon baika a bongana riki.”
Aki ti karekea Berry ao Light te reirei i aon kataumwaneakin aia karekemwane, ma raoia n reirei a kaunga Berry bwa e nang riai n ibita ana tabo ni mwakuri. Te bitaki are e na kairia nakon ana bwakabwai riki ae bubura, are e na kona iai ni kakabwara ana taarau.
A uaia n tii teuana n aia kouru, Berry ao Light bwa a nang kabonganai ni kabane rakan booia, karikirake, ao rakan aia karekemwane man aia mwakuri ni kabwara iai ana taarau Berry. Man ana ibuobuoki te Uea, e bane ni bwara ni kabane aia taarau, ao, ae kakawaki riki, bwa a teimatoa ni kabwaka aia kabwianibwai ao angabwai riki tabeua.
E taku te Uea: “Bon au kantaninga bwa N na katauraoi kainnanoia au aomata Aika Itiaki. … Ma e riai ni karaoaki n oin au kawai” (Reirei ao Berita aika Tabu 104:15–16). Utu ao aomata n Tatatabemaniia nako n te aonaaba a na kona n kunea bwa E kangaa ni katauraoa te kawai ibukiia ngkana a anai reirei man te riki n toronibwai ni kaineti ma te mwane ao ni maiuakinna inanon maiuia.
Reirei iaon ae “Kanga,” Tiaki ti iaon “Teraa”
Curtis ao Pshaunda Scott, mai Texas, USA, a uaia n tangiria bwa a na bubura aia atatai iaon kabonganaan aia mwane, ma a tuai man boraaoi iaona bwa e na kanga arona. E ataia Psahaunda bwa a kainnanoa te intuarenti ibukin bwainaoraki, ma Curtis e taku bwa aki kona ni karekea. E ngae ngke a rang tangiriia i bon imarenaia, te kangaanga iaon aia taratara n te mwane e bon kanakobuaka aia mare. “Ngkana e a roko n te iango iaon te mwane,” e ururing Pshaunda, “Irou ti bon tuai man karekea te uaia n boraoi n iango iaon aei, ni iango n ti teuana.”
E kakoauaa aei Curtis. “Te mwane bon te bwai ae rangi ni kabwara nano iangoana, ao a mwaiti bwaai aika ti riai ni marooroakin iaon baika ti tuai man uaia ni marooro i aona.”
Aia bitiobi e tuangiia Pshaunda ao Curtis bwa a riai ni kakaea te reirei i aon te riki n toronibwai are e kakaraoaki n aia titeiki.
E kubanako Curtis bwa n te moan kabwarabwara n aia kiraati e a bon kaineti naba raoi ma te kangaanga are irouna. E reke ana tai n kabwarabwara bwaai ake e a tia n rinanona ao ni karekei tabeua iango ma irouia raona n reirei ake a oota n te bwai ae riki n ana utu. Te marooro n te kurubu e buoka Curtis ni kunea ae tiaki tii moan tuan reirei n te euangkerio ma ngaia bon arora naba ni kamwakura te reirei anne ni maiura. Onoua te ririki imwiin te tai are bwabetitooaki iai, E reiakinaki Curtis bwa e riai ni karikirakea ana onimaki, kekeiaki n tataro, ao ni kaaniia ma te Tia Kamaiu, ma e namakinna bwa te reirei iaon te riki n toronibwai e reireinna arona bwa e na kanga ni katamaroaii mwakuri aikanne.
Ngke e a reiakina arona Curtis ni kamwakura moan tua n reirein te euangkerio ma kabonganan ana mwane i nanon mwengana ao n ana bitineti, e a tibwa kunea ana tangira te Uea ae korakora ibukina. “E bon kakorakoraaki au koaua ao wanawanau n ana tararua ao ana tabeaianga ibukira Tamara are i Karawa,” e taku.
E namakinna Pshaunda bwa koaua n tamnei man te reirei i aon te riki n toronibwai e bon buokia n oota bwa a bon bane n nakoraoi ni kabane kataumwane n ana babaronga te Atua. “E kakorakoraaki au koaua iaon … mwaneka i mwin mwaneka, teutana imwiin teutana”
N raonaki ma ana angareirei te Uea ma aia kabanea ni babaire iaon aia mwane e uota te boraoi n iango imarenan Curtis ao Pshaunda. “Ti a riki bwa ti teuana te tiim,” e taku Pshaunda. “I aki kangai bwa tao ti ag kaubwai ke ni karekea riki ara mwane ae mwaiti, ma ti ataia raoi bwa ti a waakii aon te kawai ae eti”