E Aera Ngkai Eaki Ibita Maiu te Atua?

Te Ara e tauaki

Ngke e a rotaki au mare n te kangaanga, I reiakina te mwaaka n te inaomata n rinerine.

Tamnei

te bai ae taua te kai ni koroboki ao ni koroboki inanon te boki ae tangaina

Ngke 23 au ririki ni maiu ao I a kabaeaki n te tembora ma teuaare e bane nanou irouna. I aki kona n uringa riki te bong ae moan te kakukurei inanon maiu.

Ma I ataia bwa bwaai ni kabane ake I tangiria bwa N na karekea inanon maiu a bon bane n aki koro nanoia. E a tabe n rikirake ni bwainikiriinai kainnabau n te aro are e roota rabwatau ma au namakin.

I namakina te maraki ma te aki raoi koaua. I aki raoi ataia bwa e aera au kakaonimaki e taraa n ae e aki karekea te bitaki n au mare. I a tia ni beku n au tai ae e bwanin n te mition, ni kawakin au berita aika tabu, toui mwiin tua, ao ni beku bwa te tia mwakuri n te tembora. E ngae ngke I rang n kataia ni kaaniai ma Iesu Kristo, e tabe n rikirake ni buakaka au mare.

I ururing rikaaki, ao I kunea bwa e ngae ngke I rang kabanea au tai n tataro ao n iangoia bwa I riai ni mareaki ma buu ao ni iai ara onimaki are ti na kona ni mwakuri korakora rinanon taian kangaanga, I tia n aki tabeakin kanikinaean kangaanga man te konabwai are rimwi ea rikirake inanon aramare.

Kakaeai Kaeka

I mwiin nimaua te ririki n tiku ma te maroa ao ni bwainikirinaki, e rootaki aron au reitaki ma Tamau are i Karawa ma Iesu Kristo. Bwaai ake I kaantaningai ibukin nakoraoin maiu a bon aki koro nanoia ao ni uotai rikaaki.

I namakina te uruaki n nano.

Ngke I a kunea raoi bwa e a bon aki kan bitaki nanon kainnabau, I moana au bubuti nakon te Atua bwa e na kaotinakoai man te kangaanga ke ni kaota nakoiu te kawai ae N na riai n toua. Ma ngke e aki kaekaki au bubuti aikai, ao I a bukina Tamau are i Karawa bwa bon ngaia ae karika rawawatau.

I teimatoa n roroko ni botakin te Ekaretia ao ni kawakin au berita aika tabu, ma nanou e onrake n te nanobuakaibukin au taratara ae memeere.

Ao n te bong teuana I namakinna bwa bon iai te kaeka nakon au kangaanga—I riai ni kabongana inaomatau n rinerine ao ni bitaki man au kangaanga. Ao I ataia bwa tera au kabanea n tamaroa ni babaire are e na kakoroa nanon au kouru bwa N na okira Tamau are i Karawa.

I iangoia bwa N nang riai ni waaki nako, I marooro ma kainnabau, ao te kamimi, bwa ti motika ara tangira ma te uaia n nakoraoi.

Te Mwaaka n Rinerine

Te bwai ae I a tia n rinanona aio e anganai te reirei ae bati i aon mwaakan ao kakannaton te inaomata n rinerine ae e anganiira Atuara.

E reirei Beretitenti Dallin H. Oaks, Te Moan Kauntira n te Moan Beretitentii: “Ngkana ti rairaki, ao ti kona n noora te bitaki ae korakora man karaoan tabeua ara rinerine i nanon maiura. Ti karaoi rinerine ao babaire aika a raraoi ngkana ti tarai anga tabeua ao ni iangoia raoi bwa a na kairiira nakea. Ngkana ti karaoi, ti na kona ni ira ana reirei Beretitenti Russell M. Nelson ni moana karaoan te bwai n ataia bwa teraa mwina. Iroura, te toki boni iaon kawain te berita ae tabu rinanon te tembora n te maiu are akea tokina, te kabanea ni kakawaki mai ibuakon ana bwaintangira te Atua.”¹

I a ataia raoi bwa ngaia Tamara are i Karawa e bon aki kona ni karinna ma inaomataia aomata n rinerine—E anganai te inaomata n karaoi au babaire n au mare ma kainnabau. E bon aki naba imanonoa kainnabau bwa e na bitaki, e ngae ngke I rang kaawakini ni kabane au berita aika tabu, ibukina bwa te mare ae akea tokina e tangira ara kekeiaki n te maiu n rabwata ao n tamnei ao n riki bwa taan iriira Iesu Kristo.

Ngkana ti kaaitara ma taian korakai, ti kona ni kabongana inaomatara n rinerine n tarai bwaai aika a kakawaki, anuan maiura, ao ai bon ngaira n tatabemaniira. Anne bon te bwai n tangira mai karawa ni kaineti ma inaomatara n rinerine. E tangiria Tamara are i Karawa bwa ti na ukoria ma Tamneina ao n onimakiniira i bon iroura bwa ti kona ni karaoi babaire aika a rianako tamaroaia ibukin maiura.

Rairaki nakon te Tia Kamaiu

N te moan I tangiria bwa N na kamwaingaki ao n waaki nako ni waekoa man au mare ae I bwainikiriinakiu iai, mwakuriana e rang aau ao man kangaanga. Rinanon te bwai n ibuobuoki ibukin te kamarurung, ongoraa nakon aia rongorongo burabeti, wareware ni booki aika tabu, tataro, ao namakinan te tangira ao te boutoka mai irouia au utu ao raoraou, I namakinna bwa iai te kaantaninga ibukiu nakon taai aika na roko. Ngkai I kabongana inaomatau n rinerine ni kakaea kamaiuakiu, I kaingaa nanou nakon te maiu are iai inanona te ikakabwarabure ao te reitaki ae tamaroa ma ake tabeman, n ikotaki ma te Tia Kamaiu.

Te wanawana are reke irou ibukin kabonganaan te inaomata n rinerine inanon maiu, au ngurengure nakon te Atua e bon karekea nakoiu te ota ae bati, ao au reitaki ma Ngaia e teimatoa n nene.

Aio raoi bukin te Euangkerio—karaoan ara rinerine i bon iroura bwa ti na nakon Kristo, karaoi banna man aia reirei burabeti ake aki toki n kaungaira bwa ti na kabongana inaomatara n rinerine n onimakina te Uea, ao n unika wakaan ara onimaki aika raraoi, n te maiu aei.

N aron are e reireia Titita Camille N. Johnson, Te Beretitenti ni Kabuta n te Bootaki n Aine: “Te kantaninga i aon te moan tua n taekan te rinerine, e kariaira bwa ti na korea oin ara karaki. … Ma Iesu Kristo e tei irarikira ao man kabonganaira bwa ana bwai ni mwakuri … ni korei bwaai aika a rianako tamaroana … ngkana [ti] katuka te onimaki Iaona, ngkana [ti] kariaia bwa E na korei [ara] karaki.²

Katokakin au reitaki ma kainnabau bon teuana te kabanea ni kamaraki n taneiai are I a tia ni kaaitara ma ngaia. Ma I reiakinna bwa ngkana I kaaitaraki ma kataaki aika aki kantaningaaki n te maiu aei, ti kona n ukera ana kairiiri tetamnei ao ni karaoi ara babaire ake a na uotiirarake n waaki nako iaon kawain te berita ae tabu. Man iriirakin Tamara are i karawa ao Iesu Kristo, ti nkona ni karekea te kaantaninga ni bwaai aika raoiroi ao ni karekea te kakabwaia n te rau ma te kimwareirei.

E maeka te tia korokaraki i Chile.