“Laet blong Yumi long Waelples,” Liahona, Jenuware 2024.
Laet blong Yumi long Waelples
Olgeta we oli ridim Buk blong Momon wetem wan tru hat, laef folem ol tijing blong hem, mo prea abaot trutok blong hem, bae oli filim Tabu Spirit mo mekem fet mo testemoni blong olgeta i kam moa strong long Sevya.
Pikja blong brata blong Jared wetem ol ston we oli stap saen i kam long Normandy Poulter
Taem mi yang boe finis, mi bin gat wan testemoni abaot Buk blong Momon. Stori blong brata blong Jared mo wokbaot blong olgeta wetem ol pipol blong hem i go long “wan graon blong promes,” i pulum tingting blong mi fulap (Ita 2:9).
Taem oli fesem jalenj ia blong travel long ol sip we i nogat laet long hem, brata blong Jared i askem, “Luk, O Lod, ?bae yu letem se bae mifala i krosem bigfala wota ia long tudak?” Lod i ansa mo talem, “?Wanem nao yu wantem se mi mas mekem blong yufala i save gat laet insaed long ol sip blong yufala?” (Ita 2:22, 23).
Brata blong Jared i save se Lod i gat evri paoa. Hem i save se Lod i stamba blong evri laet. Hem i save se Lod i givim komanmen long ol pipol blong hem blong singaot long Lod taem oli stap long nid. Mekem se, brata blong Jared i yusum fet blong hem mo i rere long 16 smol ston. Yu tingbaot se afta, hem i askem Lod blong tajem ol ston ia wetem fingga blong Hem, “blong oli save saen long tudak” (Ita 3:4).
Pikja blong Lod we i stap tajem ol ston ia i bin stak i stap long maen blong mi stat long fas taem we mi bin ridim stori ia. Mi save luk taem ia olsem se i stap hapen long fored blong ol ae blong mi. Maet, hem i from pikja blong laet we i ronemaot tudak, i tru long mi.
Taem mi no filim Tabu Spirit, blong smol taem mi stap aot long Spirit blong Lod, mi filim tudak. Be taem mi ridim Buk blong Momon, laet ia i kambak. Long mi, Buk blong Momon i olsem wan ston we i saen we Lod i bin tajem. Hem i bin saenem wokbaot blong mi tru long laef.
Wan Laet blong Oltaem
Olsem olgeta we, tru long han blong Lod, oli bin kam long ol Amerika blong bifo, yumi evriwan i go tru ol strong win mo ol dei we i tudak long taem blong wokbaot blong yumi i go long promes graon blong kam olsem wan god. Be Lod bae i mekem long yumi wanem Hem i bin mekem blong Ol man blong Jared mo Ol man blong Nifae. Bae Hem i lidim yumi mo saenem rod blong yumi—sapos yumi obei long Hem, yusum fet blong yumi long Hem, mo askem strong help blong Hem.
Lod i bin talem long Nifae, “Bae mi stap olsem laet blong yufala long waelples, mo bae mi mekem rere rod bifo long yufala, sapos i olsem se yufala i holem ol komanmen blong mi; taswe, i semmak olsem we bae yufala i holem ol komanmen blong mi, bae mi lidim yufala i go long promes graon; mo bae yufala i save se, i tru long mi, we Lod i lidim yufala” (1 Nifae 17:13).
Lod i bin talem long brata blong Nifae Jekob se, “Bae mi olsem wan laet oltaem long olgeta we oli harem ol toktok blong mi.” (2 Nifae 10:14).
Profet Abinadae i bin witnesem hemia abaot Sevya, “Hem i laet mo laef blong wol; yes, wan laet we i no gat en, we i no save kam tudak” (Mosaea 16:9).
Sevya i testifae hemia abaot Hemwan, “Mi mi laet mo laef blong wol.” Hem i ademap se, “Luk mi mi laet; mi bin mekem wan eksampol blong yufala” (3 Nifae 9:18; 18:16).
Stap Filim Laet
Mi lavem profet blong yumi, Presiden Russell M. Nelson. Mi gat blesing ia blong givim seves long saed blong hem. Taem hem i wokbaot i kam insaed long wan rum, kwiktaem i filim olsem se rum i saen moa. Hem i karem Laet blong Kraes wetem hem.
Laet blong Kraes i tru. Hem i “tabu paoa o filing ia we i kam long God tru long Kraes mo i givim laef mo laet long evri samting.” Hem i wan presen long saed blong spirit we i gat bigfala valiu, we i save lidim ol pikinini blong God i go long Tabu Spirit mo gospel blong Jisas Kraes.1 Stap Ridim Buk blong Momon i mekem Laet ia i strong moa.
Samtaem yumi nidim blong lukluk i gobak long laef blong yumi mo tingbaot olsem wanem oli bin helpem yumi long wokbaot blong yumi. Taem yumi lukluk i gobak, yumi save filim paoa blong Sevya bakegen. Taem ol skripja oli talem, “Tingbaot, tingbaot” (Hileman 5:12), mi ting se oli stap talem long yumi se, “No tingbaot nomo wanem we yu bin save o filim long wan taem; be blong filim laet ia bakegen.”
Long sam, i moa isi blong stap filim laet long saed blong spirit. Long ol narawan, i save had blong filim laet long saed blong spirit from ol hadtaem blong olgetawan o ol samting blong wol we i stap pulum tingting blong olgeta. Be sapos yumi stap fetful, laet ia bae i kam—long samtaem, long ol wei we yumi no ting se bae i olsem.
Presiden Nelson, we i bin givim kaonsel long yumi blong “stadi long Buk blong Momon wetem prea evri dei,”2 i bin serem sam wei we Buk blong Momon i save karem yumi kam moa kolosap long Sevya mo helpem yumi blong filim laet blong gospel, holemtaet ol trutok blong gospel, mo laef folem ol tijing blong gospel.
Taem yumi stap ridim Buk blong Momon, Presiden Nelson i talem se, andastaning blong yumi mo tangkyu blong yumi from Atonmen blong Jisas Kraes, bae i gro.
Bae yumi filim wan strong filing ia blong “bon bakegen” (Mosaea 27:25) taem buk ia i helpem yumi blong eksperiensem wan jenis blong hat (luk long Mosaea 5:2).
Taem yumi stap ridim mo stadi long ol tijing blong Buk blong Momon abaot Isrel we i stap kam tugeta, bae yumi gat wan filing we i kam moa strong blong lukaotem olgeta we oli ded mo mekem ol odinens blong olgeta long saed blong fasin blong sevem man mo kam olsem wan god, insaed long tempol.
Bae yumi filim laet ia taem yumi kasem ol ansa long ol kwestin blong yumi, kasem gaed long ol desisen we yumi stap mekem, mo paoa blong sakem sin mo stanap agensem nogud fasin.
Mo taem yumi ridim ol trutok we yumi faenem insaed long Buk blong Momon, bae yumi filim hiling, kamfot, restoresen, sapot, paoa, mo hapi long sol blong yumi.3
“O afta, ?samting ia i no tru?” Alma i bin askem abaot sid blong trutok we i stap kam bigwan mo gro, save, mo testemoni. “Mi talem long yufala, Yes, from we hemia i laet; mo eni samting we i laet, hem i gud, from we oli save luksave, from hemia, yufala i mas save se hem i gud” (Alma 32:35).
Pikja blong Kraes, i kam long Heinrich Hofmann
Faenem Sevya long Tudak
Taem fren blong Kamryn i gat 10 yia, hem i kasem wan sik blong ae we bae i stap fogud mo i spolem kornea blong raet ae blong hem.4 Samtaem, taem soa blong ae ia i kam strong mo oltaem, ae blong Kamryn i no save tekem eni laet. Papa mo mama blong hem i wari se bae hem i nomo save lukluk, mo bae tufala i mekem ol windo blong rum blong hem i tudak blong traem blong givim kamfot long hem. Mama blong Kamryn, Janna, i tingbaot:
“Samples fo manis afta we oli faenem sik blong Kamryn, mi bin wokbaot i go insaed long rum blong hem we i tudak. Taem ae blong mi i stap traem blong lukluk long tudak, mi save luk Kamryn i benem hem olsem wan bebi long bel blong mama, long bed blong hem. Hem i stap filim soa i tumas mekem se hem i no muv o iven krae taem hem i harem mi kam insaed. Hem i stap silip nomo i stap wetem tugeta ae blong hem we i solap tumas mo i sat i stap.
“Mi nildaon long saed blong bed blong hem, tekem han blong hem long han blong mi, mo skwisim tri taem—sikret kod blong mitufala we i minim ‘mi lavem yu.’ Plante taem bae hem i skwisim bak han blong mi fo taem we i minim ‘mi lavem yu moa,’ be hem i no ansa bak. Hem i stap filim soa i tumas. Wetem wota blong ae i stap foldaon long ol jik blong mi, mi lukluk 10 yia pikinini blong mi we i bin hapi mo stap muvmuv olbaot, i silip olsem wan balong. Hat blong mi i brok.”
Janna i talem wan prea long hat blong hem.
“Mi talem long Papa long Heven se mi save se Hem i save wanem i bes, be mi prea se, ‘Plis helpem hem.’ Taem mi stap sidaon mo prea, wan wom filing i kavremap mi. Mi filim kwaet taem wan tingting abaot Sevya Jisas Kraes i kam long maen blong mi: ‘Hem i laet ia. Faenem Hem long tudak.’”
Janna i leftemap hed blong hem mo talem slo long sora blong Kamryn: “Yu mas faenem Sevya insaed long tudak.”
Afta long hemia, Kamryn i silip taem hem i stap lisin long ol hym mo skripja long Jos laebri ap.
Taem soa long ae blong hem i go bigwan tumas, Kamryn i faenem Sevya long tudak.
Famli blong Kamryn i givim raet long pikja ia
Plante taem, sik blong Kamryn i stap silip nomo i stap, be taem i wekap mo i soa bigwan, Janna mo hasban blong hem Darrin, i givim kamfot long Kamryn mo putum ol blangket kavremap ol windo long rum blong hem bakegen. Long ol taem ia we soa i tumas, Kamryn i talem se, “Mi stap traem blong faenem Sevya nomo long tudak.”5
Taem laef i luk olsem i “wan dak mo sore waelples” (1 Nifae 8:4), yumi tu yumi nidim blong faenem Sevya long tudak. Mi testifae se Buk blong Momon, wetem witnes blong hem se “Jisas Hem i Kraes, God Ia We I No Save Finis”6 bae i lidim yumi go long Hem. Mi save se olgeta we oli ridim Buk blong Momon wetem wan tru hat, laef folem ol tijing blong hem, mo prea abaot trutok blong hem, bae oli filim Tabu Spirit mo mekem fet mo testemoni blong olgeta i kam strong long Sevya .
Letem yumi soem tangkyu blong yumi from buk ia we i “moa stret”7 taem yumi stap ridim, holemtaet gud, mo stap yusum blong mekem fet blong yumi mo ol narawan oli kam moa strong long Laet blong Wol ia.