“? From Wanem God I No Stap Jenisim Laef Blong Mi?,” Liahona, Jenuware 2024.
Ol Yang Adalt
?From Wanem God I No Stap Jenisim Laef Blong Mi.
Taem mared blong mi i tanem i go long wan nogud taem, mi lanem abaot paoa blong fridom blong joes.
Taem mi gat 23 yia, mi bin sil insaed long tempol wetem man we mi bin drim from. Mi no save tingbaot wan dei we mi hapi moa long laef blong mi.
Be evri samting we mi oltaem ting se bae oli olsem long laef blong mi, i stat blong go nogud kwik taem. Hasban blong mi i abiusum mi moa long saed blong bodi mo filing.
Mi stap konfius mo harem nogud. Mi no andastanem from wanem strong fet blong mi i no mekem wan defren insaed mared blong mi. Mi bin go long wan fultaem misin, kipim ol kavenan blong mi, folem ol komanmen mo iven givim seves olsem wan tempol wok man. Be i nomata hamas mi traem blong kam kolosap long Jisas Kraes, mared blong mi i kam moa had nomo.
Mi lukluk bak, mi luksave se iven mi prea mo tingting sapos mi mas maredem hasban blong mi mo gat fet se bae mitufala i save winim ol problem, mi no bin tekem series long ol saen blong ol problem we bae oli kam afta long mared blong mitufala.
Stap Faenem Ol Ansa
Afta long faef yia blong harem nogud mo abius, rilesensip blong mi wetem Papa long Heven mo Jisas Kraes i bin safa tumas. Ol tingting blong laef blong mi oli nomo hapen mo nogud.
Mi filim se mi brokbrok.
Taem i kam klia se hasban blong mi i no wantem blong jenis, mi stat blong askem God blong sevem mi aot long situesen blong mi o blong soem mi stret rod blong folem. Be taem ol ansa we mi nidim oli no kam, mi stat blong blemem Papa long Heven olsem risen blong harem nogud blong mi.
Mi gohed blong go long jos mo kipim ol kavenan blong mi, be hat blong mi i fulap long kros from i nogat rod blong folem.
Afta wan dei mi luksave se mi gat ansa blong situesen blong mi—mi mas yusum fridom blong joes blong mi blong mekem mo jenisim situesen blong mi. Mo mi save wanem desisen bae i stret blong mi mekem wetem gol blong mi long en blong gobak long Papa long Heven.
Mi jusum blong tekem wan step i go fored: mi toktok long hasban blong mi mo i bin hapen se mitufala i endem gud rilesensip blong mitufala.
Paoa blong Jusum
Had eksperiens ia i helpem mi blong lanem abaot paoa mo hamas presen blong fridom blong mekem joes we God blong yumi i givim.
Presiden Dallin H. Oaks, Fas Kaonsela blong Fas Presidensi i tijim: “Taem yumi lukluk i gobak, yumi save luk olsem wanem sam long ol joes we yumi stap mekem long laef blong yumi, oli mekem samting i defren. Yumi mekem ol moa gud joes mo desisen sapos yumi luk long ol defren kaen joes we oli stap, mo tingting hevi se bae oli lidim yumi i go wea. Taem yumi mekem olsem, bambae yumi stap folem kaonsel blong Presiden Russell M. Nelson blong stat wetem en long maen. Long yumi, en ia, olsem i oltaem i stap long kavenan rod ia i gotru long tempol i go kasem laef we i no save finis, we i presen blong God we i moa bigwan olgeta.”1
Mi luksave se Papa long Heven i no save stopem wan long fridom blong joes blong hem—Hem i letem mi blong mekem desisen blong miwan blong maredem hasban blong mi. Hem i no save fosem hasban blong mi tu blong jenis, iven we mi stap kipim ol kavenan blong mi, from mared we i no save finis i tekem efot long saed blong spirit mo long saed blong wol long tugeta man mo woman taem tufala i folem Jisas Kraes.
Taem yumi fesem ol jalenj, yumi save yusum fridom blong joes blong yumi blong jenisim ol situesen, fasin blong yumi mo iven yumiwan. Hemia i tabu presen blong fridom blong joes. Papa long Heven i wantem yumi blong lukaotem Hem mo Spirit mo afta trastem yumiwan blong mekem ol bes desisen blong laef blong yumi.
Stap Tanem i go long Sevya.
Fastaem, mi bin stap ting se bae mi kam oraet mo muv i go fored kwik taem aot long abius mared blong mi, be proses i bin slo mo i had. Tru long ol tul we oli help, stap lisin long ol mesej blong ol profet, ridim ol skripja, prea mo filim lav mo sapot blong ol fren mo famli, mi filim hop blong wan fiuja we i gud moa. Taem mi yusum fridom blong joes blong mi blong faenem hiling, mi luk fored from wan laef we i gat fasin blong fogiv mo rilesensip we i naes wetem ol narawan, i tekem tu Sevya.
Wetem moa andastaning blong olsem wanem blong yusum fridom blong joes long laef blong mi, kros blong mi long God i tanem i kam long andastaning, mo rilesensip blong mi wetem Hem i bin save kam gud.
Hemia i wanem gospel hem i abaot—stap mekem ol joes blong kam long Kraes, stap folem kaonsel blong ol profet we oli leftemap tingting blong yumi blong yusum fridom blong joes blong yumi blong trastem Lod, mo krietem wan naes laef we i fulap wetem fet.
Olsem Sista Camille N. Johnson, Jeneral Rilif Sosaeti Presiden i tijim: “Naesfala samting abaot fasin blong jus, i letem yumi blong raetem stori blong yumiwan. Be Jisas Kraes i stanap rere blong yusum yumi olsem ol tabu tul blong raetem wan bigfala pikja sapos yumi gat fet blong letem Hem, sapos yumi letem Hem blong raetem stori blong yumi.2
Blong endem mared blong mi i wan long ol eksperiens we i soa tumas we mi mas fesem. Be mi lanem se taem yumi fesem ol tes blong laef we yumi no ting se bae i olsem, yumi save lukaotem gaed blong spirit mo mekem ol desisen we bae i muvum yumi i go fored long kavenan rod. Blong stap folem Papa long Heven mo Jisas Kraes, yumi save gat hop long ol gud samting we bae i kam mo long promes blesing blong pis mo glad blong Tufala
Man ia we i raet i stap long Jili