Bes Ofring blong Mifala

Pikja

tempol wok

Tu wik bifo Wasington D.C Tempol bae oli dediketem bakegen long Ogis 2022, bos blong mi mo mi i luksave se wan long ol Yurop honbim tri we i stap lid i go long tempol i sik. Long medel i luk olsem bae i drae mo sam long ol branj blong hem tu oli bunbun.

Olsem man blong lukaotem tempol aotsaed, mi bin wari se naesfala ples aotsaed long tempol bae i rere be smol ples ia nomo i no luk gud. Tri ia i stap narasaed long wan smol pul blong wota we i stap ron, kolosap long get blong kam insaed blong tempol.

Mifala gat wan helti tri blong mekem jenis i stap gro kolosap, mo mifala i stap plan blong jenisim ples blong helti tri wetem hemia we i sik. Be faswan mifala i mas tekemaot ples blong wokbaot kolosap mo gras mo afta muvum ol smol paep we i stap sakem wota olbaot, mo ol laen blong lektrik we i stap long eria ia. Wanem we mi fraet moa long hem i we sapos mifala i pulumaot tri ia we i sik, mo planem bak tri we i helti i go long ples blong tri ia we i sik, mo nogat inaf taem blong mekem evri samting raon long tri ia i luk gud bifo oli dediketem tempol bakegen.

Taem mi talem long waef blong mi Carolyn, se maet bae mifala i muvum tri ia, hem i talem long mi: “Yufala i katemaot ol branj we i bunbun ia nomo, mo bae mi tekem ol skripja sista blong mi raon long kantri blong prea from tri ia. Ol tempol graon oli blong Lod. Bae Hem i blesem tri ia.”

Carolyn i gat wan grup blong ol sista we hem i singaotem olgeta ol skripja sista blong hem—ol memba blong Jos we long wan taem oli bin stap long semmak wod. Oli stadi Kam Folem Mi tugeta kasem taem evriwan i muvaot, be oli stap toktok yet wetem olgeta. Taem oli nidim wan prea, oli ringim olgeta.

Afta we Carolyn i talem long olgeta abaot tri ia we i sik, olgeta ia oli talem long ol pikinini blong olgeta mo ol narafala memba blong famli blong olgeta. Carolyn i no save se hamas oli bin prea from tri ia, be hem i gat fet se Papa long Heven bae i harem ol prea blong olgeta.

Sam dei afta nomo, tri ia i givim ol niu lif, i fulumap ples ia we i drae. Carolyn i talem, “Yes naoia i luk moa gud nao.” Hem i sendem ol pikja i go long ol skripja sista blong hem, i talemaot long olgeta, “!Luk olsem wanem Lod i ansarem yumi!”

Mi save se ol pipol oli stap prea from tri ia, mekem mi no sapraes tu. Mi save tu se bae i no longtaem Presiden Russell M. Nelson bae i blesem tempol mo tempol graon long taem blong prea blong dedikesen blong hem. Tri ia bae i ORAET.

Mifala i talem tangkyu we Lod givim ona long ofring mo fet blong mifala.