Stap Winim Plan We i No Gat long Saed blong Spirit—?Wanem Bae Mi Mekem Nao Ia?

Long taem ia we mi no save wea blong tanem mi i go afta o wanem blong kasem,mi luksave olsem wanem ol temtesen blong wol oli isi blong stat blong win ova long ol ting long saed blong spirit. Sista Rebecca L. Craven, Seken Kaonsela insaed long Yang Woman Jeneral Presidensi i talem, “Wol i fulap wetem ol temtesen we i save giaman iven long olgeta we oli jusumaot olgeta, blong mekem olgeta oli lego ol kavenan blong olgeta.”

Mi bin luk ol nara yang adalt oli fesem hadtaem wetem ol testemoni blong olgeta afta we oli kambak long ol misin blong olgeta. Mi bin luk sam tu we oli kasem stej olsem graduet long yunivesiti o kasem mared mo afta ol samting we oli moa impoten i spolem olgeta taem oli no letem rum blong gospel blong Jisas Kraes i kam niu rod blong folem.

Mi bin go tru ol gud mo nogud tu long saed blong spirit. I bin had long taem ia blong stap olsem insperesen mo no les taem i kam long saed blong ol samting blong spirit, speseli taem sam blesing oli no kam hariap olsem we mi hop from. Oltaem mi wantem blong kam antap gud mo kam gud—mi no wantem kam stak long saed blong spirit. Be samtaem mi filim olsem se mi stap go gud nomo be i no gat wan stamba tingting.

Be, taem mi givim taem blong Papa long Heven mo Jisas Kraes evri dei, speseli long ol smol mo simpol wei (luk long Alma 37:6), mi filim kamfot mo paoa we gospel blong Hem i givim long mi, iven taem wol i muvmuv.

Presiden Russell M.Nelson i talem “Mi plis long yu blong letem God i stap win insaed long laef blong yu. Givim Hem wan stret mo gudfala pat blong taem blong yu. Taem yu mekem olsem, tekem not long wanem i hapen long gud paoa blong faea blong spirit blong yu.”² Taem mi jusum blong save gat fet long Jisas Kraes evri dei mo mekem taem blong ol samting long saed blong spirit we i konektem mi wetem Hem, mi tingbaot taem blong paoa blong faea blong spirit blong mi mo mi filim wan niu stamba tingting, hop blong fiuja mo fet.

Long wan nara taem, taem mi filim se mi lusum hop long taem blong faenol yia blong yunivesiti blong mi. Laef i i bin had. Hem i long taem blong wol sik, mi bin harem nogud taem mi stap nomo long hom taem mi finisim ol klas. I no bin gat wan daereksen mo koneksen long laef blong mi.

Mi bin fesem had taem wetem jos long taem ia. Oltaem bae mi mas rolemaot mi long bed aot long ol klos blong silip blong mi mo lisin long sakramen miting onlaen from se hem ia nomo i miting we i givim insperesen long mi.

Long taem blong nogud taem ia, mi toktok long ol famli mo fren blong mi mo eksplenem long olgeta olsem wanem mi lusum hop mo harem nogud we mi filim. Mi no filim se mi gat eni hop from fiuja mo mi no save olsem wanem ol ting bae oli wok aot. Mo taem ia oli talem long mi se oli stap prea from mi mo sapotem mi iven we oli stap longwe long mi.

Taem mi toktok wetem olgeta we mi lavem mo we oli gat strong fet mo taem mi prea long Papa long Heven wetem wan stamba tingting long saed blong spirit, mi filim strong sapot mo lav.

Mi luksave se taem mi lukluk nomo long ol samting we mi no mekem i hapen, tu tingting, o hadtaem, fet blong mi i draon long tingting we i fasfas. Mi lusum ae blong ol blesing long laef blong mi. Be taem mi stap mekem gud samting mo ridim petriakel blesing blong mi, lisin long ol jeneral konfrens mesej, mo spenem taem wetem olgeta we mi lavem, oli givim insperesen gud long mi, mi lukluk bakegen long ol defren merikel we gospel blong Jisas Kraes i mekem long laef blong mi.

Nomata sapos yu nogat wan rod we i klia yet long fored blong yu long ol taem o ol samting oli no stap go long wei we yu plan from, i gat plante gudfala samting yet long laef blong yu mo fulap janis we i stap blong yu blong helpem yu gro long kavenan rod. Oltaem i gat moa blong lanem mo moa rum blong gro, speseli long saed blong spirit. Askem long Papa long Heven blong kasem rod ia blong folem. Bae Hem i helpem yu blong lukaotem mo faenem ol gud insperesen mo janis blong gro mo stap lan we i stap raon long yu (luk long Ol Toktok blong Bilif 1:13).

Pikja

yang adalt woman long kayak

Gohed blong Stap Traehad

Ol samting long saed blong spirit blong yumiwan samtaem i save muvmuv—go ia mo kam ia. Samtaem yumi save filim se fet mo glad blong yumi i strong long gospel. Be long nara taem, yumi save fesem jalenj blong save wea blong tanem yumi i go afta. Yumi save fesem hadtaem taem ol jalenj oli kam, ol kwestin oli kam antap, o ol blesing oli kam slo, speseli taem yumi stap mekem bes blong yumi blong laef folem gospel. Long ol hadtaem ia, oltaem mi luk ol pipol oli tekem wan long tufala rod ia: wan i we oli go long Sevya, mo wan we oli no go long Hem.

Samtaem mi komperem tufala taem ia long stori blong Moses mo aean snek (luk long Ol Namba 21:8–9). Taem ol pikinini blong Isrel oli wantem blong kam gud afta long posen blong ol snek we i bin kakae olgeta, Moses i givim long olgeta wan isi wei oli sevem olgeta: blong lukluk nomo long aean snek we i ripresentem Jehova. Hemia nomo wanem oli mas mekem. Blong lukluk nomo mo bae oli laef Be plante oli no bin jusum blong lukluk mo oli ded. (Luk long 1 Nifae 17:41.)

Stori ia i mekem mi tingbaot olsem wanem yumi karem hevi blong posen blong harem nogud mo kros from ol samting we i no hapen long taem, taem we meresin i stap long fored blong yumi.

Ki blong fulumap hop, pis mo fet from fiuja blong yumi i blong luk long Jisas Kraes (luk long Hilliman 8:14–15; Jon 3:14–17).

Oltaem mi no bin stap laekem miwan taem mi mekem ol mistek. Be from mi traehad tru blong lanem abaot mo biliv long Papa long Heven mo Jisas Kraes, mi save se oltaem mi save trastem Tufala from fogivnes, gro mo kam gud long ol hadtaem. Mi save se taem mi stap luk long Tufala tru long prea, stap stadi Kam Folem Mi, stap spendem taem long tempol, mo fulfilim koling blong mi, mi gat filing ia blong talem tangkyu mo kam niu bakegen.

Taem mi lukaotem Tufala, mi luk gospel blong Jisas Kraes long wanem we i stap: wan ples we i givim yumi kamfot, proteksen mo hiling aot long ol snek blong wol.

Elda Jeffrey R. Holland blong Kworom blong Olgeta Twelef Aposol i testifae wetem lav : “Wetem wan stret mo klin hop, bon long lav blong God mo evri man—hemia i wanem mifala i wantem long yu. … Blong stap gat stret hop ia wetem yu oltaem bae i no save stopem kwaet voes ia se God i lavem yu, se Kraes i Loya blong yu, se gospel i tru. Saen blong hem bae i rimaenem yu se tru long gospel, oltaem i gat—evri dei, evri aoa—wan niufala janis, wan niufala laef, wan niufala yia. !Wan merikel! !Wan presen! Mo from presen blong Kraes, ol nambawan samting long laef bae oli blong yumi sapos yumi gohed blong stap bilif, gohed blong stap traem mo gohed blong stap gat hop.”³

Yang adalt taem i gat fulap jenis, fulap tu tingting mo yes iven ol ting we i no hapen long ol taem. Be gospel blong Jisas Kraes i oltaem semmak mo oltaem stap. Mo ol promes blong Hem mo Papa long Heven i tru taem yumi gohed blong stap long kavenan rod. Wol i save mekem i moa had samtaem blong holem taet lukluk blong yumi long Hem. Be blong stap tekem sam step i go fored we i tekem yumi i go long Hem i stap gohed blong gro. Taem yumi stap muv i go fored long Kraes, neva se yumi no gat plan—yumi stap muv fored from hop, pis mo glad.