Jisas Kraes insaed long Buk blong Momon

Pikja

Jisas Kraes i givhan long ol pipol long Amerika.

?Huia nao bae yu talem se i mein man insaed long Buk blong Momon? Bae sam oli save talem se Nifae, Alma o Momon, be mein man i Jisas Kraes. Nifae i raetem:

From mifala i wok strong wetem strong tingting oltaem blong raet, blong winim tingting blong ol pikinini blong mifala… blong oli biliv long Kraes. …

“ Mo mifala i tokbaot Kraes, mifala i glad long Kraes, mifala i prij long saed blong Kraes, mifala i profesae long saed blong Kraes” (2 Nifae 25: 23, 26).

Long 1978 Susan Ward Easton i pablisim wan lanmak atikol, wetem namba we i soemaot se Jisas Kraes i mein man insaed long Buk blong Momon. Hem i poenemaot ol defren taetol blong Jisas Kraes mo soem se nem o taetol blong Hem oli talemaot 3925 taem insaed long Buk blong Momon, we i soemaot se oli talem 1.7 taem long ol ves

Stadi ia we i gat valiu i soemaot se Sevya i stap long medel insaed long Buk blong Momon, be, hem i minim oli no kaontem hamas we oli talem nem blong Kraes, hemia oli no tekem ol stret nem we i tokbaot Hem.

Be, namba blong ol nem we i tokbaot Jisas Kraes i no impoten samting blong lanem insaed long Buk blong Momon, be, wanwan long ol nem ia we i tokbaot Hem i save tijim yumi abaot tabu tingting mo misin blong Hem. Wetem kea mifala i lukluk gud Buk blong Momon, lukaotem evri nem, we oli tokbaot Jisas Kraes, we i tekem ol taetol mo ol stret gudfala nem. Mifala i faenem 7452 nem evriwan–wan haf namba blong moa long wan nem long evri ves. Ol taetol blong stori blong Kraes i kolosap 50 pesen blong ol nem blong Kraes insaed long Buk blong Momon, wetem olgeta we i stap olsem ol stret nem.

Blong stap lukaotem Jisas Kraes i givim wan spesel wei blong lanem abaot Hem. Tingting long olsem wanem ves ia i tokbaot Hem: “Stat blong biliv long Pikinini blong God, se bae [Hem] i kam blong pemaot ol pipol blong [Hem] mo se bae [Hem] i safa mo kasem ded blong pem praes blong ol sin blong olgeta; mo se bae [Hem] i girap bakegen long ded, se bae i mekem fasin blong laef bakegen long ded i hapen, blong mekem se evri man bae i stanap long fored blong [Hem], blong kasem jajmen long las mo jajmen dei, folem ol wok blong olgeta.”(Alma 33:22; oli ademap long italik).

Long stret stadi blong Sista Easton, ves ia oli kaontem olsem wan nem we i tokbaot Kraes i kam long taetol ia “Pikinini blong God.” Be, nem blong Sevya oli talem faef moa taem. Ves ia i no tokbaot nomo se Jisas Kraes i Pikinini blong God be tu se Hem i wan we i pemaot yumi tru long atonmen blong Hem we i no save finis mo Laef bakegen long ded mo bae Hem nao i jaj blong yumi.

Be wanem we i gat moa paoa, Kraes i tokbaot Hemwan long Buk blong Momon. Eksampol, yumi ridim Sevya i talem se, “Mo sapos ol man oli kam long [Mi], bae [Mi] soem long olgeta, wiknes blong olgeta. Mi givim wiknes long ol man blong mekem se oli save putum tingting blong olgeta i stap daon; mo gladhat blong [Mi] i naf blong evri man we i putum tingting blong olgeta i stap daon long fored blong [Mi]; from sapos oli putum tingting blong olgeta i stap daon long fored blong [Mi], mo gat fet long [Mi] nao ol samting ia we oli no strong long olgeta, bae [Mi] mekem olgeta oli winim mo kam strong long olgeta.”(Ita 12:27;oli ademap long italik). Nomata se nem blong Kraes i no kamaot long ves ia, Sevya i tokbaot Hemwan eit taem. Wok blong Hem oli tokbaot taem yumi stap lukaotem Sevya long ves ia.

Ol ves ia oli soemaot koneksen blong Sevya Hemwan we Hem i filim wetem wanwan man mo woman mo wanem yufala i filim abaot Hem.

“Girap mo kam fored long [Mi], blong yufala i save putum han blong yufala insaed long saed blong [Mi], mo tu, blong yufala i save filim ol mak blong ol nil long ol han blong [Mi] mo long ol leg blong [Mi] , blong yufala i save gat save se [Mi Mi] God blong Isrel, mo God blong ful wol, mo oli bin kilimded [Mi] from ol sin blong wol.

“… Se grup blong ol pipol ia oli go fored, mo oli putum han blong olgeta insaed long saed blong [Hem] mo oli filim ol mak blong ol nil long ol han blong [Hem] mo long ol leg blong [Hem]” (3 Nifae 11:14–15; oli ademap long italik).

Iven yumi no save filim ol Mak blong han blong Hem yet, tru long Buk blong Momon yumi save kasem witnes blong yumiwan abaot Jisas Kraes.

Ol nem we oli tokbaot Lod insaed long Buk blong Momon i helpem yumi blong luk se Hem i stap long medel blong tabu wok ia. Luksave Sevya insaed long Buk blong Momon: Wan Narafala Testeman blong Jisas Kraes i wan wei we i gat paoa blong kam moa kolosap long Hem.