Liahona
Stap Faenem Laet blong Sevya insaed long Buk blong Momon.
Jenuware 2024

“Stap Faenem Laet blong Sevya insaed long Buk blong Momon,” Liahona, Jenuware 2024.

Blong Ol Papa mo Mama

Stap Faenem Laet blong Sevya insaed long Buk blong Momon.

Pikja
famli we i stap rid tugeta

Ol Dia Papa mo Mama,

Kam Folem Mi blong manis ia i givim ol tingting abaot Buk blong Momon olsem kurikulom blong 2024. Ol stori andanit i tokbaot ol ki blong stap faenem laet mo trutok long wan wol we i oltaem fulap wetem tudak mo tingting i fasfas.

Ol Toktok Raon blong Gospel

Stap Lukaotem Laet Bong Sevya

Tingting blong stap serem wetem famli blong yu sam aedia we i kam long toktok blong Presiden Eyring long pej 4, mo toktok raon abaot wok we laet ia i mekem long laef blong yumi. Luklukbak long stori blong Kamryn abaot stap faenem Sevya insaed long tudak. ?Olsem wanem famli blong yu i save faenem laet blong Sevya tru long stadi blong Buk blong Momon long yia ia?

Ples blong Lukaotem Trutok

God i stamba blong evri trutok, mo yumi save lanem trutok blong Hem taem yumi stap traehad blong stap lukaotem trutok ia. Elda mo Sista Silva i nidim blong jusum wea ples blong stap long hem afta we tufala i kambak long wan misin, mekem se tufala i lukaotem help blong Lod (luk long pej 20). ?Wetaem nao Lod i bin givim yu gaed we yu nidim?

Luk Moa long Gospel Stadi blong Yu

Taem blong stap visitim wan art miusiom, ol pipol oli hariap blong luk evri samting we oli save luk, we i mekem olgeta i mestem blong luk naes blong art. Semmak long olgeta we oli ridim Buk blong Momon we oli save mestem ol impoten trutok sapos oli hariap blong stap rid. ?Wanem ol wei we i save helpem yumi tekem kea blong luk long skripja buk ia? Luk long pej 12 blong kasem sam aedia.

Kam Folem Mi Hapi Famli Taem

Rod Ia We I Stret mo I No Isi

1 Nifae 8; 11; 15

Stap kakae long frut blong tri blong laef i wan simbol blong stap jusum laef we i no save finis tru long Jisas Kraes (luk long 1 Nifae 15:36; Doktrin mo Ol Kavenan 14:7). Traem aktiviti ia blong lanem olsem wanem aean rod (toktok blong God) i lidim yumi i go long bigfala presen blong God.

  1. Putum wan pikja blong tri blong laef long wan wol blong haos.

  2. Fasem wan string (i ripresentem aean rod) andanit long pikja mo mekem wan i stanap narasaed rum wetem nara en blong string.

  3. Lukluk taem, i tekem hamas taem blong wan pikinini we oli fasem ae blong hem blong wokbaot stat long wan en blong rum i go kasem tri blong laef we hem i no holem string.

  4. Naoia lukluk taem, i tekem hamas taem blong wan pikinini we oli fasem ae blong hem blong wokbaot stat long wan en blong rum i go kasem tri blong laef we hem i holem string.

Toktok Raon: ?Wanem nao yumi save mekem blong holem taet aean rel mo neva lego?