Blong Presem Olgeta we Oli Stap Protektem Man

Mi ting se wan nara risen we naes taem ia i stap wetem mi blong longtaem, i wanem i defren wetem sam fasin blong tedei. Long plante sosaeti raon long wol, evri samting, oli sakem nomo. Taem wan samting i stat blong brok, o i olfala—o iven taem yumi taed long hem—yumi sakem, mo yumi riplesem wetem wan samting we i moa gud—i moa niu, mo i saen moa.

Yumi mekem hemia wetem ol mobaelfon, ol klos, ol trak—mo, sore tumas, wetem ol rilesensip tu.

Nomata se i gud blong kliarem laef blong yumi long ol samting blong wol we yumi nomo nidim, taem i kam long ol samting we i impoten blong taem we i no save finis—mared, famli mo standet blong yumi—fasin blong riplesem wanem i stap fastaem wetem wan blong tedei, i save mekem yumi harem nogud.

Mi glad tumas se mi blong wan jos we i tekem mared mo famli i impoten. Ol memba blong Jos blong Jisas Kraes blong Ol Lata-dei Sent, oli save olgeta raon long wol from oli gat ol mared mo famli we oli gud tumas. Mi biliv se hem i olsem from impoten trutok we Josef Smit i putumbak se mared mo famli oli blong taem we i no save finis. Ol famli oli no blong mekem laef i go gud long wol, mo blong yumi sakem i go taem yumi kasem heven. Be, hem i oda blong heven. I soem wan selestial fasin mo wan eksampol blong famli blong God we i no save finis.

Be ol strong mared mo famli rilesensip oli no hapen from se yumi ol memba blong Jos. Oli nidim blong yumi wok oltaem wetem tingting. Doktrin blong ol famli we oli no save finis i mas givim insperesen long yumi blong putum evri hadwok blong yumi blong sevem mo mekem ol mared mo famli blong yumi oli rij. Mi laekem tumas mo klapem han long olgeta ia we oli stap holemtaet mo gogohed long ol rilesensip ia we oli impoten mo no save finis.

Tedei, mi wantem presem olgeta we oli protektem famli blong man.

Ova long ol yia, mi bin mekem siling odinens blong plante yang kapol fulap long hop mo lav. Mi neva mitim wan we, taem oli lukluk long tufala ova long olta, se bae oli divos o gat hat i brok.

Sore tumas, sam yes.

Be, taem plante dei i pas mo kala blong naes lav ia i jenis, i gat sam we, sloslo, oli stop blong tingting long hapines blong narawan mo stat blong luk ol smol rong. Long kaen taem olsem, sam oli foldaon long trik mo ting se waef o hasban blong olgeta i no smat inaf, i no naes inaf, i no fani inaf, o i no yang inaf. Mo oli gat tingting ia se hemia i wan gud risen blong stat lukluk long nara ples.

Ol brata. Sapos hemia i tokbaot yu, mi wonem yu se yu stap long wan rod we i go long brokbrok mared, brokbrok hom, mo brokbrok hat. Mi plis long yu blong yu stop naoia, yu tanem raon mo yu kambak long sef rod blong tru fasin mo fasin blong stap tru long ol kavenan. Mo yes, ol semfala prinsipol ia i go long ol dia sista blong yumi.

Naoia, wan toktok i go long ol singgel brata we oli folem giaman tingting ia se, oli mas faenem “woman ia we i stret gud” bifo oli save stat blong fren o mared.

Ol brata we mi lavem yufala. ?Mi save mekem yufala i tingbaot se, sapos i gat wan woman we i stret gud, yufala i ting se bae hem i gat intres long yu?

Long plan blong stap hapi we God i putum, i no tumas blong stap lukaotem wan we i stret gud, be wan we, blong wan ful laef, bae yutufala i joenem han blong krietem wan rilesensip we i gat lav, i stap longtaem mo i moa stret gud. Hemia nao gol.

Ol brata. Olgeta we oli stap protektem ol mared blong olgeta, oli andastanem se rod ia i tekem taem, fasin blong save wet, mo antap long evri samting, ol blesing blong Atonmen blong Jisas Kraes. I nidim yu blong stap kaen, no stap jalus, no wantem samting, no kros kwik, no tingting nogud, glad long trutok. Long nara toktok, i nidim jareti, stret lav blong Kraes.¹

Evri samting ia bae oli no hapen long wantaem nomo. Ol strong mared, oli bildim wan brikis afta wan brikis, dei afta dei blong wan ful laef.

Mo hemia i wan gud nius.

From se nomata se rilesensip blong yu i flat naoia, sapos yu gohed blong ademap ol smol ston blong kaen fasin, lav mo sore, fasin blong stap lisin, sakrifaes, andastaning, mo fasin we i no selfis, long en, wan bigfala piramid i stat blong gro.

Sapos yu luk se i tekem longtaem, tingbaot: !ol hapi mared, oli blong stap blong oltaem! So, “yufala i no taed blong mekem gud samting, from we yufala i stap putum fandesen blong wan bigfala [mared]. Mo aot long ol smol samting, ol samting we oli bigwan oli kamaot.”²

Wok i go sloslo, be i no nid blong stap harem nogud long hem. Be, bae mi traem talem nomo wanem i tru, divos i no hapen tumas taem, hasban mo waef, tufala i hapi.

So !Yufala i mas hapi!

Mo ol brata, mekem sapraes long waef blong yu taem yu mekem ol samting we i mekem hem i hapi.

Olgeta we oli sevem mared blong olgeta, oli jusum hapines. I tru se sam kaen sik long tingting i nidim spesel tritmen, mo mi laekem waes tingting blong Ebraham Linkon: “Plante pipol oli hapi taem oli mekem tingting blong olgeta blong stap hapi.” I go gud wetem skripja fren blong hem: “Lukaot mo bae yu faenem.”³

Sapos yu stap lukaotem ol samting we oli no stret tumas long waef o hasban blong yu, o stap lukaotem faet long mared blong yu, bambae yu faenem, from se evriwan i gat hemia. Be long nara han, sapos yu lukaotem gud samting, bambae yu faenem tu, from se evriwan i gat fulap gudfala kwaliti tu.

Olgeta we oli protektem mared, oli tekemaot ol rabis gras mo oli wotarem flaoa. Oli selebretem ol smol aksen blong gladhat we i givim kaen filing blong jareti. Olgeta we oli protektem mared, oli sevem ol fiuja jeneresen.

Ol brata. Tingbaot se from wanem yu lavem hem long fas ples.

Wok evri dei blong mekem mared blong yu i kam moa strong mo moa hapi.

Ol gud fren blong mi. Bae yumi mekem evri samting blong oli kaontem yumi long medel blong olgeta sol ia we oli tabu mo hapi we oli stap protektem mared blong olgeta.

Tedei, mi wantem presem tu olgeta we oli protektem rilesensip blong olgeta wetem famli blong olgeta. Evri famli i nidim wan blong protektem hem.

Nating we i naes tumas we oli save Jos ia from ol strong famli blong hem, plante taem, yumi filim se hemia i blong evri Lata-dei Sent famli, be i no famli blong yumi. Be wanem i tru, i we, i no gat famli we i stret gud.

Evri famli i gat ol taem we oli defren smol.

Olsem we taem papa mo mama i askem se bae yu tekem wan “selfi” blong tufala, o taem ol bigfala mami o anti oli stap wokem talem se yu singgel yet from yu flas tumas, o taem we tawi blong yu i ting se politik tingting blong hem i gospel tingting, o taem papa blong yu i mekem se bae oli tekem wan famli foto we evriwan i dresap olsem ol pipol long muvi we hem i laekem tumas.

Mo yu nao bae yu werem wan mekap klos we i kavremap gud yu.

Ol famli oli olsem.

Yumi gat semfala blad, be yumi no semmak. Wanwan i spesel. Eksperiens blong yumi i lidim yumi i go long ol defren rod. Mo wanwan long yumi i kamkamaot i defren from hemia.

Bae yumi no traem blong fosem evriwan long wan kaen sep we yumi mekem, be, yumi jusum blong selebretem ol samting ia we oli defdefren, mo yumi glad from olgeta from oli kam ademap ol sapraes we oli rij mo oli kam oltaem long laef blong yumi.

Be samtaem, ol memba blong famli oli mekem ol joes o mekem ol samting we oli no tingting long hem, oli mekem man i harem nogud mo oli no klin. ?Yumi mekem wanem long taem olsem?

I no gat wan ansa we i kavremap evri situesen. Olgeta we oli protektem ol famli blong olgeta oli gat sakses from se oli toktok wetem waef o hasban mo famli, oli lukaotem tingting blong Lod, mo oli lisin long ol kwaet toktok blong Tabu Spirit. Oli save se, wanem i stret long wan famli ia, maet i no stret long nara famli.

Be i gat wan samting we yumi save mekem, we i stret long evri kes.

Long Buk blong Momon, yumi lanem abaot wan pipol we oli bin faenem sikret blong stap hapi. Blong plante jeneresen “i no gat eni rao long graon … mo i tru we i no save gat wan pipol we i moa hapi long medel blong evri pipol we han blong God i mekem olgeta.” ?Olsem wanem nao oli mekem? “From lav blong God we i bin stap insaed long ol hat blong ol pipol.”⁴

Nomata wanem problem famli blong yu i fesem, wanem yu mekem blong stretem ol problem ia, stat mo en blong ansa i jareti, stret lav blong Kraes. Sapos i no gat lav ia, iven ol famli we oli luk stret evriwan, oli stap traehad. Wetem lav ia, iven ol famli wetem ol bigfala jalenj oli gat sakses.

“Bigfala lav i neva sot.”⁵

!Hemia i tru blong sevem ol mared! !Hemia i tru blong sevem famli!

Bigfala enemi blong jareti i hae tingting. Hae Tingting i wan long ol bigfala risen blong mared mo famli trabol. Hae tingting i mekem man i gat sot tingting, i no kaen mo i wantem evri samting. Hae tingting i mekem bigwan paoa blong yu mo i no wantem save long gud fasin blong nara man. Hae tingting i selfis mo mekem man i kros kwik. Hae tingting i mekem man i ting nogud long ples we i no gat, mo i haedem wiknes biaen long ol waes eskius. Hae tingting i mekem man i krangke, i no gat hop, i kros, i no save wet. Yes, sapos jareti i stret lav blong Kraes, nao hae tingting i stret fasin blong Setan.

Hae tingting i wan wiknes blong evri man. Be i no pat blong wanem God i givim long yumi, mo i no gat ples long medel blong olgeta we oli holem tabu prishud blong God.

Laef i sot ol brata. Ol rigret oli save stap blong longtaem—sam bae oli tekem i go kasem taem we i no save finis.

Wei we yu tritim waef blong yu o pikinini, o papa mo mama, o brata mo sista bae i lidim ol jeneresen we oli kam afta. ?Wanem fasin nao yu wantem livim long laen blong yu? ?Wan we i gat fasin blong givimbak, strong fasin, faet, kros, o fraet, o fasin blong go stap yuwan long wan ples? O ?yu wantem livim fasin blong wan we i gat lav, tingting i stap daon, fogivnes, lav mo sore, mo fasin blong gro long spirit mo yuniti?

Yumi evriwan i nidim blong tingbaot se “Sapos [Lod] i jajem ol man we oli no gat sore, bae hem i no gat sore long olgeta.”⁶

Blong gud blong famli rilesensip blong yufala, blong gud blong sol blong yufala, plis gat sore, from se “man we i gat sore, hem i no save fraet se God bambae i jajem hem.”⁷

Sakem hae tingting i stap long saed.

Blong talem sore wetem tru hat long ol pikinini blong yu, waef blong yu, famli blong yu, o fren blong yu, hemia i no wan saen se yu gat wiknes, be i saen se yu strong. ?Yu ting se blong yu yu raet i moa impoten bitim blong putum wan ples blong stap we famli i kasem kaekae, i kasem hiling mo i kasem lav?

Yufala i bildim ol brij, yufala i no brekemdaon olgeta.

Iven taem yu no rong—speseli taem yu no rong—letem lav i winim hae tingting.

Sapos yu mekem olsem, wanem samting i kam agens bae i pas i go, mo, from lav ia blong God we i stap insaed long hat blong yu, bae raorao i lus. Ol prinsipol ia blong protektem ol rilesensip oli blong yumi evriwan, nomata yumi mared, divos, wido o singgel. Yumi evriwan i save kam ol sevya blong ol strong famli.

Ol brata. Long ol hadwok blong yumi blong sevem mared mo famli blong yumi, mo long evri samting, bae yumi folem eksampol blong Wan ia we i sevem yumi. Sevya i winim “sol blong yumi wetem lav.”⁸ Jisas Kraes i Masta blong yumi. Wok blong Hem i wok blong yumi. I wok blong sevem man, mo i stat insaed long ol hom blong yumi.

Lav, insaed long plan blong fasin blong sevem man, i no selfis, mo i lukaotem gudlaef blong ol narawan. Hemia nao lav we Papa long Heven i gat long yumi.

Taem yumi mekem semmak folem lav blong Sevya, bae Hem i blesem yumi mo mekem yumi kam antap long ol hadwok blong yumi blong protektem ol mared mo mekem ol famli oli kam strong moa.

Bae Lod i blesem yu long hadwok blong yu we yu no taed long hem mo i stret mo gud, blong oli kaontem yu long medel blong olgeta we oli protektem man. Hemia i prea blong mi long nem blong Jisas Kraes, amen.