Japta 11
Inos
Wan dei, Inos i stap lukaotem wael animol long bus. Hem i stap tingbaot ol tijing blong papa blong hem mo hem i wantem blong kasem fogivnes from ol sin blong hem.
Inos i nildaon mo i prea long God. Hem i prea ful dei mo hem i bin stap prea yet taem naet i kam.
God i talem long Inos se, from fet blong hem long Jisas Kraes, hem i kasem fogivnes from ol sin blong hem.
Mo afta Inos i bin wantem blong Lod i blesem Ol Man blong Nifae. Hem i prea from olgeta, mo Lod i talem se bae hem i blesem olgeta sapos oli obei long ol komanmen blong Hem.
Inos i wantem tu blong Lod i blesem Ol Man blong Leman. Hem i prea wetem bigfala fet, mo Lod i promes blong mekem wanem Inos i askem long Hem.
I nomata se Ol Man blong Leman oli faet agensem Ol Man blong Nifae mo traem blong prapa spolem gud ol rekod blong olgeta, Inos i prea from olgeta blong oli kam ol stret mo gud pipol.
Inos i bin prea se ol rekod we hem i stap kipim bae oli stap sef. Lod i promes se, wan dei, bae hem i givim long Ol Man blong Leman ol tijing ia we oli stap insaed long ol rekod ia.
Inos i stap prij long Ol Man blong Nifae Hem i wantem olgeta blong biliv long God mo kipim olgeta komanmen.
Ol Man blong Nifae oli traem blong tijim gospel long Ol Man blong Leman, be oli no wantem lisin. Ol Man blong Leman oli no laekem Ol Man blong Nifae.
Inos i spenem laef blong hem blong tijim ol pipol abaot Jisas mo gospel blong Hem. Hem i wok blong God mo hem i lavem Hem long evri dei long laef blong hem.