Opisyal Na Pahayag 1 at ang Patuloy na Pagsulong ng Gawain sa Templo

Sabihin sa mga estudyante na magbanggit ng mabubuting tao sa mga banal na kasulatan na dinakip o ibinilanggo dahil sa ginawa nila ang iniutos ng Diyos. (Maaaring kasama sa mga sagot sina Daniel, Abinadi, Pedro, Joseph Smith, at ang Tagapagligtas.)

Ipaliwanag na maraming Banal sa mga Huling Araw ang dinakip at ibinilanggo dahil patuloy nilang sinunod ang utos na mag-asawa nang higit sa isa matapos magpasa ng mga batas ang pamahalaan na nagsasaad na ilegal ang gawaing ito. May mga kababaihan ding dinakip, kadalasan ay sa dahilang hindi nila ibinubunyag ang kinaroroonan ng kanilang mga asawa, na nagsipagtago upang hindi madakip.

Sabihin sa mga estudyante na ibuod kung paano nagsimula ang pag-aasawa nang higit sa isa sa mga miyembro ng Ang Simbahan ni Jesucristo ng mga Banal sa mga Huling Araw. (Tumanggap si Propetang Joseph Smith ng paghahayag tungkol sa alituntunin ng pag-aasawa nang higit sa isa, at ang pag-aasawa nang higit sa isa ay sinimulan sa mga miyembro ng Simbahan noong mga unang taon ng 1840s bilang tugon sa utos ng Panginoon [tingnan sa D at T 132].)

Ipabasa nang malakas sa isang estudyante ang sumusunod na talata. Sabihin sa klase na pakinggan ang mga dinanas na hirap ng mga miyembro ng Simbahan nang sundin nila ang utos ng Panginoon na mag-asawa nang higit sa isa.

Noong Agosto 1852, bilang bahagi ng isang kumperensya sa Salt Lake City, ipinaalam ni Elder Orson Pratt sa publiko na bilang pagsunod sa utos ng Diyos, ang ilang miyembro ng Simbahan ay nag-aasawa nang higit sa isa. Ibinigay ni Elder Pratt ang pahayag na ito sa tagubilin ni Pangulong Brigham Young. Maraming pinuno ng relihiyon at pulitika sa Estados Unidos ang sumalungat sa sistemang ito ng pag-aasawa, na itinuturing nilang imoral at hindi gawain ng sibilisadong tao. Ang mga Banal sa mga Huling Araw ay binatikos sa mga talumpating pampubliko, aklat, magasin, at pahayagan. Nagpalabas ang Kongreso ng Estados Unidos ng mga batas na naghigpit sa kalayaan ng mga Banal sa mga Huling Araw at pinahirapan ang kabuhayan ng Simbahan sa pamamagitan ng paglilimita sa dami ng ari-ariang maaaring ariin ng Simbahan. Dahil sa mga batas na ito dinakip at ibinilanggo ang mga lalaking higit sa isa ang asawa. Ipinagkait sa mga lalaking ito “ang karapatang bumoto, ang karapatan ng kasarinlan [privacy] sa kanilang mga tahanan, at ang pagtamasa sa iba pang mga karapatang pangsibiko” (Ang Ating Pamana: Isang Maikling Kasaysayan ng Ang Simbahan ni Jesucristo ng mga Banal sa mga Huling Araw [1996], 118–19). Pagsapit ng 1890, daan-daang Banal sa mga Huling Araw ang nabilanggo. Ang iba ay nagsipagtago upang hindi madakip at mabilanggo. Dahil sa mga kalagayang ito, maraming pamilya ang dumanas ng pagkabalisa, pagdadalamhati, paghihirap, at pagkagutom.

Matapos ang pahayag noong 1852, lalong dumami ang nag-asawa nang higit sa isa, at libu-libong kalalakihan at kababaihan ang ibinuklod sa isa’t isa sa maramihang pagpapakasal sa ilalim ng pamamahala ng mga lider ng priesthood. Bagama’t binatikos sila ng mundo dahil sa pagkakaroon ng maraming asawa, ipinagtanggol ng maraming matatapat na Banal sa mga Huling Araw ang gawaing ito at nagpatotoo na alam nilang inihayag ito ng Diyos sa pamamagitan ni Propetang Joseph Smith.

• Paano ninyo ibubuod ang mga paghihirap ng mga naunang Banal sa mga Huling Araw dahil sinunod nila ang utos ng Panginoon na mag-asawa nang higit sa isa?

Larawan

Pangulong Wilford Woodruff

Ipaliwanag na ang mahihirap na kalagayang ito ang nagbunsod kay Pangulong Wilford Woodruff na manalangin na gabayan siya ng Panginoon hinggil sa pag-aasawa ng nga Banal nang higit sa isa. Noong 1889, itinuro ni Pangulong Woodruff sa mga lider ng Simbahan na huwag nang ituloy ang pagtuturo ng alituntunin ng pag-aasawa nang higit sa isa. Noong 1890, iilan na lamang ang nag-asawa nang higit sa isa, at ginawa ang mga ito salungat sa tagubilin ni Pangulong Woodruff. Gayunpaman, may mga tao pa ring naglathala ng mga balita na ginagawa pa rin ng Simbahan ang maramihang pagpapakasal. Ang mga balitang ito ay lalong nagpatindi ng pagsalungat sa Simbahan. Noong Setyembre 1890, naglabas si Pangulong Woodruff ng isang Manipesto, na kilala ngayon bilang Opisyal Na Pahayag 1 sa Doktrina at mga Tipan.

Ibuod ang unang tatlong talata ng Opisyal Na Pahayag 1 na ipinapaliwanag na sinabi ni Pangulong Woodruff na ang mga balita na di umano’y hinihikayat pa rin ng Simbahan ang pagsasagawa ng maramihang pagpapakasal ay hindi tumpak. Pagkatapos ay anyayahan ang tatlong estudyante na magsalitan sa pagbasa nang malakas ng ikaapat at ikalimang talata ng Opisyal Na Pahayag 1 (simula sa “Yayamang ang Kongreso ay nagpasa ng mga batas”) at ang kasunod na pahayag ni Pangulong Lorenzo Snow, na noon ay Pangulo ng Korum ng Labindalawang Apostol. Sabihin sa klase na tahimik na sumabay sa pagbasa at alamin ang iniutos ni Pangulong Woodruff na gawin ng mga Banal.

• Ano ang iniutos sa mga Banal? (Tumigil sa pakikipagkasundo sa anumang maramihang pagpapakasal.)

• Ayon sa pahayag ni Pangulong Lorenzo Snow, bakit mahalagang magmula sa Pangulo ng Simbahan ang tagubilin na tumigil sa pakikipagkasundo sa anumang iba pang maramihang pagpapakasal? (Dahil siya lamang ang tanging tao sa mundo na may hawak ng mga susi ng kapangyarihang magbuklod. Maaari mong ipaalala sa mga estudyante na ang pag-aasawa nang higit sa isa ay mapapahintulutan lamang sa pamamagitan ng mga susi ng priesthood na ibinigay sa Pangulo ng Simbahan [tingnan sa D at T 132:7, 48].)

Ipabasa nang malakas sa isang estudyante ang unang talata ng “Mga Hango Mula sa Tatlong Talumpati ni Pangulong Wilford Woodruff Tungkol sa Pahayag,” na sumusunod sa teksto ng Manipesto. Sabihin sa klase na tahimik na sumabay sa pagbasa at alamin ang alituntunin na itinuro ni Pangulong Woodruff sa mga Banal.

• Ano ang itinuro ni Pangulong Woodruff sa mga Banal? (Matapos sumagot ang mga estudyante, isulat sa pisara ang sumusunod na doktrina: Hindi pahihintulutan ng Panginoon kailanman ang Pangulo ng Simbahan na iligaw ang Simbahan. Maaari mong sabihin sa mga estudyante na markahan ang mga salita o parirala sa kanilang banal na kasulatan na nagtuturo ng doktrinang ito.)

• Paano tayo matutulungan ng alituntuning ito ngayon?

Ipaliwanag na nagtaka ang ilang miyembro ng Simbahan kung bakit iniutos sa kanila na ipamuhay ang alituntunin ng pag-aasawa nang higit sa isa ngunit pagkatapos ay ipinatigil ito. Iniutos ng Panginoon kay Pangulong Woodruff na tanungin ang mga Banal. Sabihin sa tatlong estudyante na magsalitan sa pagbasa nang malakas ng ikatlo, ikaapat at ikalimang talata ng “Mga Hango Mula sa Tatlong Talumpati ni Pangulong Wilford Woodruff” (simula sa “Ako ay nagkaroon ng ilang paghahayag”). Sabihin sa klase na tahimik na sumabay sa pagbasa at alamin ang itinanong ni Pangulong Woodruff sa mga Banal.

• Paano ninyo ibubuod ang tanong na nainspirasyunan si Pangulong Woodruff na itanong sa mga Banal?

Ipaliwanag na nanganib na mawala sa mga Banal ang St. George Utah Temple, ang Logan Utah Temple, ang Manti Utah Temple, at ang halos matatapos nang Salt Lake Temple. (Kung maaari, magdispley ng mga larawan ng mga templong ito.)

• Anong mahalagang gawain ang mahihinto kapag nakumpiska ang mga templo?

Ipabasa nang malakas sa isang estudyante ang ikapitong talata ng “Mga Hango Mula sa Tatlong Talumpati ni Pangulong Wilford Woodruff” (simula sa “Nakita ko kung ano ang tiyak”). Sabihin sa klase na tahimik na sumabay sa pagbasa at alamin ang maaaring nagawa ni Pangulong Woodruff kung hindi iniutos sa kanya ng Panginoon na sabihan ang mga lider ng Simbahan na ihinto ang pagpapakasal nang higit sa isa.

• Ano ang tiyak sanang nagawa ni Pangulong Woodruff?

• Ano ang matututuhan natin sa pahayag ni Pangulong Woodruff na, “Isinulat ko ang anumang sabihin sa akin ng Panginoon na isulat”? (Matapos sumagot ang mga estudyante, maaari mong isulat sa pisara ang sumusunod na doktrina: Pinamamahalaan ng Panginoon ang Kanyang Simbahan sa pamamagitan ng paghahayag sa Pangulo ng Simbahan.)

• Paano nakaimpluwensya sa inyo ang doktrinang ito?

Anyayahan ang mga estudyante na ibahagi ang kanilang mga patotoo hinggil sa mga katotohanang isinulat mo sa pisara. Maaari ka ring magbahagi ng sarili mong patotoo.

Larawan

Pangulong Joseph F. Smith

Ipaliwanag na may iilan pang mga Banal sa mga Huling Araw ang patuloy na nag-asawa nang higit sa isa kahit naibigay na ang Manipesto. Noong 1904, ipinahayag ni Pangulong Joseph F. Smith “na lahat ng pagpapakasal [nang higit sa isa] ay ipinagbabawal, at kung sinumang opisyal o miyembro ng Simbahan ang gagawa ng gayong pagpapakasal ay … ititiwalag” (sa Conference Report, Abr. 1904, 75). Patuloy pa rin hanggang ngayon ang tuntuning ito.

• Batay sa natutuhan ninyo, ano ang isasagot ninyo kapag may nagtanong sa inyo kung nag-aasawa pa rin nang higit sa isa ang mga Banal sa mga Huling Araw? (Tulungan ang mga estudyante na maunawaan na may panahong nag-asawa nang higit sa isa ang mga miyembro ng Simbahan bilang pagsunod sa utos ng Panginoon, ngunit matagal nang itinigil ito, dahil iniutos rin ng Panginoon. Ang kasal sa pagitan ng isang lalaki at isang babae ay pamantayan ng Diyos para sa kasal maliban kung iba ang ipahayag Niya [tingnan sa Jacob 2:27, 30].)

Ipaliwanag na matapos ibigay ang Manipesto, ang bantang pagkumpiska ng pamahalaan ng pederal sa mga templo at ari-arian ng Simbahan ay natigil na. Dahil wala na ang pangambang iyon, mas nakapagtuon na ang mga Banal sa gawain sa templo. Noong Abril 6, 1893, apatnapung taon matapos mailatag ang mga panulok na bato ng Salt Lake Temple, inilaan ni Pangulong Wilford Woodruff ang templong iyon, ang pang-apat sa kabuuang bilang noon ng mga nagagamit na templo.

Noong Abril 1894, isang taon matapos ang paglalaan ng Salt Lake Temple, ipinaalam ni Pangulong Woodruff na nakatanggap siya ng paghahayag. Bago ang paghahayag na ito, ang mga miyembro ng Simbahan, na kumikilos ayon sa kaalamang mayroon sila, ay karaniwang nagpapabuklod, o “nagpapaampon” sa mga lider ng Simbahan, gaya ni Joseph Smith o ni Brigham Young, sa halip na sa kanilang sariling mga magulang. Ngunit nalaman ni Pangulong Woodruff sa paghahayag na dapat niyang iutos sa mga Banal na “saliksikin … ang kanilang mga talaangkanan hangga’t makakaya nila, at mabuklod sa kanilang mga ama at ina. Ibuklod ang mga anak sa kanilang mga magulang, at ipagpatuloy ang gawaing ito hanggang sa abot ng makakaya ninyo. … Ito ang kalooban ng Panginoon sa kanyang mga anak” (sa James R. Clark, comp., Messages of the First Presidency of The Church of Jesus Christ of Latter-day Saints, 6 tomo [1965–75], 3:256–257; tingnan din sa Mga Turo ng mga Pangulo ng Simbahan: Wilford Woodruff [2005], xxxviii).

• Kanino tayo maaaring mabuklod sa pamamagitan ng ordenansa ng pagbubuklod? (Matapos sumagot ang mga estudyante, isulat sa pisara ang sumusunod na katotohanan: Maaari tayong mabuklod sa mga miyembro ng ating pamilya, kabilang na ang mga nauna sa atin at mga susunod sa atin, sa pamamagitan ng kapangyarihang magbuklod.)

• Ano ang pakiramdam ninyo na alam ninyong maibubuklod kayo sa mga miyembro ng inyong pamilya?

Tapusin ang lesson sa pagpapatotoo sa kapangyarihang magbuklod at sa kahalagahan ng pag-uugnay sa ating sarili sa mga henerasyon ng ating pamilya sa pamamagitan ng mga ordenansa sa templo.