O Le Faapotopotoina o Isaraelu o Aso e Gata Ai

Faaali atu le faafanua “O le Eria o Niu Ioka, Penisilivania, ma Ohaio o le ISA” (Faafanua o le Talafaasolopito o le Ekalesia, nu. 3), e maua i tua o le Mataupu Faavae ma Feagaiga, po o se isi faafanua o lenei eria.

Ata

faafanua, matuisasae IS

Valaaulia tamaiti aoga, e faailoa mai ia nofoaga lautele o mea taua na tutupu i le Toefuataiga: le Uluai Faaaliga (Manaseta, Niu Ioka), le toefuataiga o le perisitua (Haramoni, Penisilivania), ma le faatulagaina o le Ekalesia (Feiete, Niu Ioka).

Ona fai atu lea i nai tamaiti aoga e feauauai i le faitauina leotele o le fuaitau lenei:

“O Sini Rikitone, o se faifeau muamua ma o se tagata fou faatoa liliu mai i le eria o Katelani, ma se uo e le lotu e suafa ia Eteuati Paterika, sa laua naunau e feiloai i le Perofeta ma aoao atili i aoaoga a le Ekalesia. Ia Tesema i le 1830, sa laua faimalaga ai e sili atu ma le 250 maila agai i Feiete, Niu Ioka, e asiasi ia Iosefa Samita. Sa laua fai atu ia te ia, e saili le finagalo o le Alii, e faatatau ia te i latou ma le Au Paia i Katelani. I le tali na tuuina mai, na faaali mai ai e le Alii e faapea, o le Au Paia o Niu Ioka e tatau ona ‘potopoto faatasi i Ohaio’ (MF&F 37:3). I le konafesi lona tolu ma le mulimuli a le Ekalesia i Niu Ioka, na faia i le faatoaga a le Au Uitimera i le aso 2 o Ianuari i le 1831, na toe aumaia ai e le Alii lana poloaiga [ua tatau ona agai atu tagata o le Ekalesia i Ohaio]. … O le valaau muamua lea i lenei tisipenisione, mo le Au Paia ia faapotopoto faatasi. …

“… E 68 nai tagata mai Kolesavile, na agai atu i Ohaio i le ogatotonu o Aperila i le 1831. I le tutusa ai i le usiusitai i le poloaiga a le Alii, e toa 80 le Au Paia mai le Paranesi o Feiete, ma le toa 50 mai le Paranesi o Maniseta, na tuua o latou aiga i le amataga o Me i le 1831. … E oo atu i le ogatotonu o Me, o paranesi uma o le Ekalesia mai Niu Ioka, ua mafai ona faimalaga mai e ala i vaa na kolosia le Vaituloto o Iri, agai i le Uafu o Feafoti, Ohaio, lea na latou feiloai ai ma le Au Paia, ma auina atu ai i nofoaga i Katelani ma taulaga o Tomasone. Ua amataina le faapotopotoina maoae o Isaraelu o aso e gata ai” (O lo Tatou Tupuaga: O se Talafaasolopito Otooto o Le Ekalesia a Iesu Keriso o le Au Paia o Aso e Gata Ai [1996], 17–19).

Valaaulia se tamaitiiti aoga e faitau leotele le Mataupu Faavae ma Feagaiga 38:31-33. Fai i le vasega e mulimuli i le faitauga, ma faailoa mai auala o le a faamanuiaina ai le Au Paia, pe afai latou te usiusitai i le poloaiga e faapotopoto i Ohaio. E tatau ona faailoa mai e tamaiti aoga ia faamanuiaga e fa: (1) “ia mafai ona latou “sosola ese ai le mana o le fili”; (2) o le a latou “faapotopotoina i le [Atua] o se nuu amiotonu”; (3) o le a latou mauaina le tulafono a le Atua; ma (4) o le a latou “faae’eina i le mana mai luga.” Atonu e te manao e fautua atu i tamaiti aoga, ina ia faanumeraina nei faamanuiaga e fa i a latou tusitusiga paia. Manatua: O le faailoaina o lisi i tusitusiga paia, e mafai ai ona fesoasoani i tamaiti aoga ia iloa ai manatu autu, o loo faamamafa mai e le Alii po o le perofeta.)

Tusi le faaupuga lenei i luga o le laupapa: E faapotopotoina e le Alii Ona tagata, ina ia puipuia i latou ma faamalolosia i latou faaleagaga. Atonu e te manao e faasino atu e faapea i tusitusiga paia, o le a’oa’oga faavae o le faapotopotoina e masani ona fesootai ma le puipuiga. “O se so’otaga, o se faia po o se feso’otaiga i le va o manatu, tagata, mea faitino, po o mea e tutupu, ma o tusitusiga paia e tumu i feso’otaiga” (David A. Bednar, “A Reservoir of Living Water” (Faigalotu i le Iunivesite o Polika Iaga, Fep. 4, 2007), 4, speeches.byu.edu).

Faamatala atu e faapei lava ona aveina atu e le Alii Isaraelu anamua i le Mauga o Sinai, ma tuuina atu ia te i latou Ana tulafono, o lea foi na Ia faatonuina ai le Au Paia o Aso e Gata Ai, ina ia faapotopoto i Ohaio, ina ia latou maua ai Ana tulafono i lenei tisipenisione (tagai i le MF&F 38:32). I Ohaio, na amata ai ona faaali mai e le Alii Ana tulafono i le Ekalesia (tagai i le vaega o ulutala o le MF&F 42). Ona fesili atu lea:

• E faapefea ona fesoasoani le faapotopotoina faatasi ma i latou e tutusa o outou talitonuga ma tulaga faatauaina, ona puipuia outou mai le mana o Satani?

• E faapefea i lo tatou mauaina o tulafono a le Atua, ona fesoasoani e faamalolosia lo tatou faaleagaga?

• O le a sou manatu e uiga e faapea, o le Au Paia i Ohaio o le a “faae’eina i le mana mai luga”?

Faamatala atu o faamanuiaga folafolaina o le “faae’eina i le mana mai luga”, na amata ona faataunuuina ina ua maea le malumalu o Katelani, i le lima tausaga talu ona faapotopotoina le Au Paia i Ohaio. Na asiasi mai avefeau faalelagi ina ua maea le malumalu, e toefuatai mai ia Iosefa Samita ma Oliva Kaotui ki ma le pule e tatau ai, e faia ai sauniga paia. O faaaliga faaleagaga na liligi ifo i luga o le tele o le Au Paia, i le taimi o le faapaiaina o le malumalu. Ma e toaitiiti le aofai o le Au Paia, na mauaina mulumuluga ma faauuga o le malumalu, i totonu o le malumalu. I ni nai tausaga mulimuli ane i Navu, o le folafolaga o le faae’eina i le mana, na faalauteleina lona faataunuuina, ina ua faalauiloa atu i le Au Paia le sauniga o le faaeega paia o le malumalu. Faaali atu le saunoaga lenei na tuuina atu i Navu e le Perofeta o Iosefa Samita, ma fai i se tamaitiiti aoga e faitau leotele:

Ata

Perofeta o Iosefa Samita

“O le a le faamoemoe o le faapotopotoina o … tagata o le Atua i soo se tupulaga lava o le lalolagi? … O le faamoemoega autu o le fausiaina lea i le Alii o maota, lea e mafai ai ona Ia faaali mai i Lona nuu, sauniga o Lona maota ma mamalu o Lona malo, ma aoao i tagata le ala o le faaolataga” (Aoaoga a Peresitene o le Ekalesia: Iosefa Samita [2007], 444).

• O a ni auala na e matauina ai, e faamanuiaina e le Atua le Au Paia pe a latou faapotopoto, ma fausia malumalu e pei ona Ia faatonuina?

Faamatala atu e faapea, e lei umi ona faapotopotoina le Au Paia o Niu Ioka i Ohaio, ae tele loa faamatalaga o nusipepa ma tala feaveai pepelo, na faaseseina ai le vaai a tagata ma tauleagaina ai le lotu. I lena taimi, na mauaina ai e le Perofeta o Iosefa Samita se faaaliga, e uiga i se nofoaga o le faapotopotoina faapitoa o le filemu ma le saogalemu.

Valaaulia se tamaitiiti aoga e faitau leotele le Mataupu Faavae ma Feagaiga 45:62-67. Fai atu i le vasega e mulimuli i le faitauga, ma faailoa mai le faamoemoega o le Alii, na poloaiina ai le Au Paia e faapotopoto agai “i laueleele i sisifo” (MF&F 45:64). Mafaufau e fai atu fesili nei:

• O le a le mea na fetalai mai le Alii ua “i o outou faitotoa lava”? O le a le uiga o le fasi fuaitau ua “i o outou faitotoa lava” ia te oe?

• O le a le mea na finagalo le Alii e faia e le Au Paia, a o latou faapotopoto faatasi i laueleele i sisifo?

• Aisea na tatau ai ona latou faapotopoto a latou oa? (Faamatala atu o le upu tofi e faatatau i laueleele e tatau ona latou faatauina atu, e latou te nonofo ai ma tapuai ai i le Alii.)

• O le a le igoa o le a taua ai le laueleele o le tofi o le Au Paia?

Faamatala atu e faapea i tusitusiga paia, o le upu Siona e mafai ona tele ona uiga. O nisi taimi e faatatau i le nuu o Siona ma e faamatalaina ai i latou o e “loto mama” (MF&F 97:21). O isi nofoaga o Siona e faatatau i le Ekalesia atoa ma ona siteki (tagai i le MF&F 82:14). O le upu Siona e mafai foi ona faasino i tulaga faapitoa faalelaufanua. I le Mataupu Faavae ma Feagaiga 45:66–67, o Siona e faatatau i se aai faalelalolagi, o le a faatuina e le Au Paia ma faapotopoto i ai, o nisi taimi e taua o le Ierusalema Fou (tagai i le 3 Nifae 20:22; 21:23; Eteru 13:1–8; Bible Dictionary, “Zion”). Talanoaina fesili nei:

• Na faapefea ona faamatalaina e le Alii le Ierusalema Fou, po o le Siona? (E tatau ona faailoa mai e tamaiti aoga le aoaoga faavae lenei: O le Ierusalema Fou o le a avea o se nofoaga o le filemu, sulufaiga, ma le saogalemu, ma o le a i ai iina le mamalu o le Alii.)

• O a ni auala, ua avea ai oe ma tagata o le Ekalesia, e saunia ai mo oe se nofoaga o le saogalemu ma le filemu o loo maua i Siona?

Faamatala atu e faapea, i le faaiuga o le konafesi lona fa a le Ekalesia, sa faia ia Iuni, 1831, i Katelani, Ohaio, na poloaiina ai e le Alii Iosefa Samita ma isi toeaina, e malaga taitoalua e tusa ma le 900 maila agai i Misuri, ma talai atu i le ala (tagai i le MF&F 52, otootoga o le fuaiupu). Ina ua latou taunuu, na mauaina e le Perofeta se faaaliga, e faailoa mai ai o Misuri ua avea o se “laueleele o le folafolaga, ma o le nofoaga mo le aai o Siona” ma o Initipene, Misuri, na faailoaina mai o le “nofoaga tutotonu” (MF&F 57:1–3). I nai isi tausaga mulimuli ane, e selau isi Au Paia o Aso e Gata Ai, na naunau e fausia Siona, ma malaga agai atu i le eria o le Itumalo o Siakisone i Misuri. Ae paga lea, na faateleina fete’enaiga i va o tagata o le Ekalesia ma isi tagatanuu o le eria, ma na faasolo ai ina matautia le tulaga na i ai. Sa faamalosia le Au Paia e tuua o latou aiga i le Itumalo o Siakisone, ia Novema ma Tesema o le 1833.

Ina ia faamalamalamaina taumafaiga a le Au Paia, ina ia faapotopotoina i nofoaga faaopoopo o le saogalemu ma le filemu, faaali atu le faafanua “O le Gasolo Atu i Sisifo o le Ekalesia” (Faafanua o le Talafaasolopito o le Ekalesia, nu. 6), o loo maua i tua o le Mataupu Faavae ma Feagaiga.

Ata

faafanua, o le Gasolo Atu i Sisifo o le Ekalesia

Faamatala atu e faapea, o le Au Paia na iu lava ina faamalosia e tuua Katelani, Ohaio, e faapena foi i nofoaga i Misuri i sisifo. I le 1839, na amata ai ona faapotopotoina le Au Paia i Navu, Ilinoi, lea na latou faatuina ai se aai tele. Ae ina ua faatoa maea le maliu o le Perofeta o Iosefa Samita, o tagata o le Ekalesia ua toe faamalosia e tuua o latou aiga. Na latou agai atu i Mauga o le Vavau ma faatuina ni nofoaga i le salafa o Amerika i Matu i le itu i sisifo, ma faatuina nofoaga autu o le Ekalesia i le Aai o Sate Leki.

Valaaulia tamaiti aoga e faitau le Mataupu Faavae ma Feagaiga 115:5-6. Ona fesili atu lea:

• E tusa ai ma nei fuaiupu, o a faamanuiaga ua folafolaina ia i latou e faapotopotoina i siteki o Siona? (O tali e tatau ona aofia ai le upumoni lenei: Tatou te faapotopoto i siteki o Siona mo se puipuiga ma se saogalemu mai le tiapolo.)

• O a auala e mafai ai e siteki o Siona ona saunia tagata o le Ekalesia, mo le puipuiga ma le saogalemu i o latou lava atunuu moni?

• O anafea na e lagona ai le malosiaga ma le puipuiga, a o e faapotopoto ma le Au Paia i lau lava uarota po o le paranesi?

Ina ia fesoasoani i tamaiti aoga ia malamalama atili e uiga i aso nei mo tagata o le Ekalesia, ina ia faapotopoto i siteki o Siona, faaali atu le saunoaga lenei a Elder Dallin H. Oaks o le Korama a Aposetolo e Toasefululua, ma valaaulia se tamaitiiti aoga e faitau leotele:

Ata

Elder Dallin H. Oaks

“I le popofou o lenei augatupulaga mulimuli, sa aofia ai nuu eseese i le Iunaite Setete i le faapotopotoina o Siona: i Katelani, i Misuri, o Navu, ma tumutumu o mauga. O taimi uma lava, o potopotoga uma nei e fai i mea e fai ai malumalu. O le faatuina o siteki ma le fausiaina o malumalu i le tele o atunuu, ma le faitau aofai tele o le au faatuatua, o le poloaiga i le taimi nei, ia le potopoto i se nuu e tasi ae ia potopoto i siteki o o tatou lava laueleele. O iina o le a mafai ai ona olioli le au faatuatua, i faamanuiaga atoatoa o le faavavau i se Maota o le Alii. … O lena tulaga, o le a avea ai siteki o Siona ma “olo ma sulufa’iga mai le afa, ma le ita pe a liligi ifo e le faafefiloia i le lalolagi atoa”(D&C 115:6)” (“Sauniuniga mo le Afio Mai Faalua,” Ensign po o le Liahona, Me 2004, 8).

Valaaulia se tamaitiiti aoga e faitau leotele le faamatalaga lenei a Peresitene Spencer W. Kimball: (1895–1985):

Ata

Peresitene Spencer W. Kimball

“O lenei, o le faapotopotoina o Isaraelu e aofia ai le auai i le ekalesia moni, ma lo latou o mai i se malamalama i le Atua moni. … O le mea lea, o soo se tagata lava, e na te taliaina le talalelei toefuataiina, ma ua saili nei e tapuai i le Alii i lana lava gagana, ma faatasi ma le Au Paia i le atunuu o loo ia nofo ai, ua usitaia le tulafono o le faapotopotoina o Isaraelu, ma ua avea ma suli e mauaina faamanuiaga uma ua folafolaina mo le Au Paia i nei aso mulimuli” (The Teachings of Spencer W. Kimball, lol. Edward L. Kimball [1982], 439).

• O le a le mea ua e vaaia ua tupu i le aofaiga o malumalu ua fausia e le Ekalesia i le taimi o lou olaga?

• Ua faapefea ona faamanuiaina oe i le avea ai ma se tasi o se siteki po o se itu o Siona? Ua faapefea ona faamanuiaina oe e le malumalu paia?

Faaiu i le fai atu i tamaiti aoga, e mafaufau i mea e mafai ona latou faia, e fesoasoani ai i isi ia latou maua le puipuiga ma le malosi faaleagaga, lea e oo mai ona o le auai faamaoni i siteki o Siona ma tapuai i le malumalu paia. Valaaulia tamaiti aoga e usitai i uunaiga a le Agaga, atonu ua uma ona latou mauaina.