Mulimuli i le Perofeta Soifua

Fesili i tamaiti aoga po o a igoa e tatou te faaigoaina ai i nisi taimi le Peresitene o le Ekalesia. Tusi tali a tamaiti aoga i le laupapa. Ona valaaulia lea o se tamaitiiti aoga e faitau leotele le Mataupu Faavae ma Feagaiga 21:1 a o mulimuli i ai le vasega. Lisi nisi igoa faaopoopo i le laupapa. Ona fesili atu lea:

• E faapefea e igoa taitasi i lenei fuaiupu ona faamatalaina le galuega a le Peresitene o le Ekalesia?

Fesoasoani i tamaiti aoga ia malamalama i le anotusi o le Mataupu Faavae ma Feagaiga 21 i le faamatalaina o le faaaliga, o loo faamaumauina ai na faaali mai i le aso na faatulagaina ai le Ekalesia. (Manatua: Pe a aoao tamaiti aoga ia malamalama i le anotusi o se mau, o le a sili atu ona latou malamalama i le uiga ma le taua o se mea na latou faitauina.) Ona fesili atu lea:

• Aisea na taua ai mo tagata i le popofou o le Ekalesia, ona iloa o le valaauga o Iosefa Samita o se perofeta e matuai ese lava mai i matafaioi a taitai o isi lotu?

Valaaulia se tamaitiiti aoga e faitau leotele le Mataupu Faavae ma Feagaiga 21:4-5, a o mulimuli le vasega i le faitauga. Ona talanoaina lea o mea nei:

• Aisea e manaomia ai i nisi taimi le avea o le onosai ma le faatuatua, e usitai ai i fautuaga a le perofeta?

Pe a manaomia, mafaufau e faasoa atu le saunoaga lenei mai ia Peresitene Harold B. Lee (1899–1973) faatasi ma le vasega:

Ata

Peresitene Harold B. Lee

“E ao ona tatou aoao e gauai i upu ma poloaiga, o le a tuuina mai e le Alii e ala mai i Lana perofeta. … Atonu o le a e le fiafia i le mea e sau mai le pulega o le Ekalesia. E ono feteenai ma ou taofi faapolokiki. E ono feteenai ma ou taofi faalefegalegaleaiga. E ono faalavelave i nisi o ituaiga olaga o loo e ola ai. Ae afai e te faalogo i nei mea, e pei o loo tuuina mai i le fofoga o le Alii lava Ia, faatasi ai ma le onosai ma le faatuatua, o le folafolaga e faapea, ‘o le a lē manumalo faitotoa o seoli ia te outou; ioe, ma o le a faamatu’u ese ai e le Alii le Atua mana o le pouliuli mai i o outou luma, ma faia ia luluina le lagi mo lo outou lelei, ma le mamalu o lona suafa’ (MF&F 21:6)” (Aoaoga a Peresitene o le Ekalesia: Harold B. Lee [2000], 84).

A o uunaia e le Agaga, e mafai ona e faamatalaina mea nei:

1. I le avea ai ma Au Paia o Aso e Gata Ai, tatou te le talitonu o perofeta o ni tagata atoatoa. Ae ui i lea, o le a le faatagaina lava e le Alii i latou e taitaiseseina le Ekalesia (tagai i le Folafolaga Aloaia 1, “O ni vaega mai ni Lauga se Tolu a Peresitene Uilifoti Uitilafi e faatatau i le Mataupu”).

2. Matou te talitonu ma olioli i faaaliga faifai pea. Sa i ai taimi i le talafaasolopito o le Ekalesia, na faamanino mai ai e se perofeta se fautuaga talu ai faaleperofeta, na faailoa mai ai ni aoaoga po o ni faatinoga sa taliaina faalauaitele muamua, ae na mulimuli ane manaomia le suia. Mo se faataitaiga, i aso o le popofou o le Ekalesia, na uunaia tagata e faapotopoto i se nofoaga autu e tasi, e pei o Katelani, Ohaio, po o le Itumalo o Siakisone, Misuri. I aso nei, ua uunaia tagata o le Ekalesia e faapotopoto i o latou lava siteki po o itu.

Valaaulia se tamaitiiti aoga e faitau leotele le Mataupu Faavae ma Feagaiga 21:6. Fai i le vasega e mulimuli i le faitauga, ma faailoa mai folafolaga ua tuuina atu ia te i latou o e usiusitai i upu a le perofeta. Atonu e te manao e fautuaina tamaiti aoga e faailoga mea ua latou maua. Ona fesili atu lea:

• E faapefea ona e aoteleina folafolaga, ua tuuina mai ia i latou o e usiusitai i upu a le perofeta? (E ui atonu latou te faaaogaina upu eseese, e tatau i tamaiti aoga ona latou faailoa mai le mataupu faavae lenei: Afai tatou te usiusitai i upu a le perofeta, o le a puipuia i tatou mai le fili. A o tali mai tamaiti aoga, atonu e te manao e faamatala atu o se tasi o uiga o le luluina o le faate‘a ese po o le faamatu’u o se mea mai se lagolago po o se koneteina. O lea la, o le tasi faaliliuga o le fuaiupu 6 e mafai ona faapea, pe a luluina le lagi “mo lo [tatou] lelei,” o faaaliga ma faamanuiaga e “faamatu’uina” ma liligi mai i luga o i tatou.)

Faaali atu le saunoaga lenei a Peresitene Henry B. Eyring o le Au Peresitene Sili, ma fai i se tamaitiiti aoga e faitau leotele:

Ata

Peresitene Henry B. Eyring

“O le saili atu i le ala i le saogalemu, e ala i fautuaga a perofeta e talafeagai lelei lea ia i latou e malolosi faatuatua. A saunoa se perofeta, o i latou e itiiti le faatuatua e mafai ona latou manatu ane ua latou faalogo i se tagata poto o loo tuuina mai se fautuaga. …

“… Ae o le filifiliga e aua nei taliaina fautuaga faaperofetaga ua suia ai le tulaga ua tatou i ai. O le a matuai sili lava ona leaga. O le toilalo e taliaina fautuaga a perofeta e faaitiitia ai lo tatou malosiaga e taliaina ai fautuaga musuia i le lumanai” (“Mauaina o le Saogalemu i Fautuaga,” Liahona, Iulai 1997, 28).

• Aisea o le a “sili atu ai ona matautia” “le mea tonu lava o loo tatou tutu ai” pe a tatou teena le fautuaga a perofeta? O a ni faataitaiga e faaalia ai le moni o lenei mea?

• O anafea na faamanuiaina ai oe po o se tasi e te iloa ona o le usiusitai i fautuaga a perofeta soifua?

• E mafai faapefea e le mataupu faavae o le usiusitai i fautuaga faaperofeta, ona faaaogaina i fesili faalelotu, ola mama, ma fesili faaagafesootai o o tatou aso?

U’unai tamaiti aoga e mafaufau loloto i mea e mafai ona latou faia, e maua ai faamanuiaga ua folafolaina mai i le Mataupu Faavae ma Feagaiga 21:6. Faamautinoa i a te i latou, a o latou naunautai e usiusitai i upu a perofeta soifua, o le a latou maua faamanuiaga silisili i le taimi nei ma i le faavavau. Faamatala atu o le usiusitai i fautuaga a perofeta, e le faapea o le a tatou usiusitai ma le tauaso ia latou upu.

Faitau leotele le saunoaga lenei a Peresitene Harold B. Lee:

Ata

Peresitene Harold B. Lee

“E le lava mo i tatou le na o le avea ma Au Paia o Aso e Gata Ai, le mulimuli i o tatou taitai ma taliaina a latou fautuaga, ae ua ia i tatou se matafaioi sili atu, o lo tatou mauaina lea o se molimau e le faamaluelueina i tofiga paia o nei alii ma le molimau e faapea, o mea ua latou ta’uina mai ia te i tatou o le finagalo lava lea o lo tatou Tama Faalelagi” (Aoaoga: Harold B. Lee, 45).

Faamatala atu ina ua faatoa uma ona faatulagaina le Ekalesia, o nisi tagata o le Ekalesia na faaseseina i taumafaiga a le fili, e saunia ai ni taitaiga faaperofetaga taufaasese. Valaaulia se tamaitiiti aoga e faitau leotele le vaega o le ulutala o le Mataupu Faavae ma Feagaiga 28 a o mulimuli le vasega i le faitauga (tagai foi i le Jeffrey G. Cannon, “All Things Must Be Done in Order: MF&F 28, 43,” Revelations in Context series, Ape. 4, 2013, history.lds.org). Ona fesili atu lea:

• Afai na faaauau pea e tagata o le Ekalesia ona talitonu i faaaliga sese mai ia Hiram Page, o a ni faafitauli semanu e tutupu mai?

Tuu atu i tamaiti aoga se taimi e suesue ai le Mataupu Faavae ma Feagaiga 28:2, 6–7. Ona fesili atu lea:

• Na faapefea e lenei savali mai le Alii ona faamanino mai le matafaioi a le Peresitene o le Ekalesia? (E tatau ona malamalama tamaiti aoga i le aoaoga faavae lenei: O le Peresitene o le Ekalesia e umiaina ki, e maua ai faaaliga mo le Ekalesia.

Ina ia fesoasoani i tamaiti aoga ia faateleina lo latou malamalama i lenei aoaoga faavae, fai i se tamaitiiti aoga e faitau leotele le Mataupu Faavae ma Feagaiga 43:

Ia Fepuari 1831, na sau ai se fafine e igoa ia Mrs. Hubble i le Au Paia i Katelani, Ohaio. Sa ia fai mai o ia o se perofeta fafine, sa ia mauaina faaaliga mo le Ekalesia, sa ia iloaina o le Tusi a Mamona e moni, ma e tatau ona avea o ia ma se faiaoga i le Ekalesia. Sa mafai ona ia faaseseina nisi o le Au Paia. Sa popole Iosefa Samita ma isi i lana faatosinaga ma e uiga i isi foi faaaliga sese i le Au Paia. Na filifili e le perofeta e na te fesili atu i le Alii e uiga i le mea e tatau ona fai, ma na ia mauaina se faaaliga, o loo faamaumauina nei i le Mataupu Faavae ma Feagaiga 43 (tagai i le Documents, Volume 1: July 1828–June 1831, vol. 1 of the Documents series of The Joseph Smith Papers [2013], 257).

Valaaulia tamaiti aoga e faitau le leoa le Mataupu Faavae ma Feagaiga 43:1-7, ma vaai mo aoaoga faavae na tuuina mai e le Alii i lena taimi. Atonu e te manao e fautuaina tamaiti aoga e faailoga mea ua latou maua. E mafai foi ona e fautuaina latou te faafesootai nei fuaiupu i le Mataupu Faavae ma Feagaiga 28:2. Faasino atu e faapea o le faaaliga o loo faamaumauina i le vaega e 28 sa tuuina atu i le Au Paia i Niu Ioka, ma o le faaaliga ua faamaumauina i le vaega e 43 sa tuuina atu i le Au Paia i Katelani. Ona fesili atu lea:

• I le taimi na tuuina mai ai le faaaliga o loo faamaumauina i le Mataupu Faavae ma Feagaiga e 43, o ai na tofiaina e maua poloaiga ma faaaliga mo le Ekalesia atoa?

• O a ni aoaoga faavae e mafai ona tatou aoao mai i nei fuaiupu? (E mafai e tamaiti aoga ona faaaoga ni upu eseese, ae tatau ona latou faailoa mai aoaoga faavae nei: Ua na o le tasi le tagata ua tofiaina i lea taimi e na te mauaina faaaliga mo le Ekalesia atoa. O i latou e usiusitai i le Peresitene o le Ekalesia o le a le faaseseina lava.

Mafaufau e faasoa atu le saunoaga lenei a Elder L. Tom Perry o le Korama a Aposetolo e Toasefululua:

Ata

Elder L. Tom Perry

“E i ai le faatulagaga i le auala e faaali mai ai e le Alii Lona finagalo i tagata. Ua ia i tatou uma le aia tatau tatou te ole atu ai i le Alii ma maua mai ai musumusuga e ala i Lona Agaga e faatatau i vaega o loo aofia ai i totonu o la tatou tausiga. E mafai ona maua e matua ia faaaliga mo o latou lava aiga, o se epikopo mo lana aulotu ua tofia i ai o ia, ma e faapena foi i le Au Peresitene Sili mo le Ekalesia aoao. … Ua folafola mai e le Perofeta o Iosefa Samita:

‘“E matuai feteenai lava ma fuafuaga a le Atua le mauaina e soo se tagata o le Ekalesia, po o soo se isi lava tagata, ia faatonuga mo i latou o loo pule e maualuga atu nai lo i latou’[Aoaoga a Peresitene o le Ekalesia: Iosefa Samita (2007), 197–98]” (“Matou te Talitonu i Mea Uma Lava ua Faaalia Mai e le Atua,” Ensign po o le Liahona, Nov. 2003, 85–86).

• E faapefea ona e iloaina e faapea, o faaaliga mai le Atua e oo mai i taimi uma lava, e ala mai i faasologa faamaonia o le perisitua ona fesoasoani ia te oe, e aloese mai le faaseseina? E mafai faapefea e lenei malamalama ona aumaia le filemu i lou olaga?

• E faapefea e le mamanu a le Alii o faaaliga ona faatumauina le faatulagaga sao i le Ekalesia?

Faamatala atu e faapea, a o faatupulaia le Ekalesia, na faatonuina e le Alii le Perofeta o Iosefa Samita i le faatulagaina o le perisitua ma le auai i le Ekalesia.

Faitau leotele po o le aoteleina le fuaitau lenei:

“Ao faatupulaia le auai o tagata i le Ekalesia, sa faaauauina ona maua e le Perofeta faaaliga e uiga i tofiga o le perisitua. E pei ona faatonuina mai e le Alii, sa ia faatulagaina le Au Peresitene Sili, faia e aofia ai o ia lava o le Peresitene ma Sini Rikitone ma Frederick G. Williams o ni fesoasoani. Sa ia fatulagaina foi le Korama a Aposetolo e Toasefululua ma le Korama Muamua a le Au Fitugafulu. Sa ia valaauina ma faauuina Epikopo ma o latou fesoasoani, faitaulaga sili, peteriaka, fautua maualuga, fitugafulu, ma toeaina. Sa ia faatulagaina le uluai siteki o le Ekalesia” (O lo Tatou Tupuaga: O se Talafaasolopito Otooto o le Ekalesia a Iesu Keriso o le Au Paia o Aso e Gata Ai[ [1996], 26).

Faamatala atu e faapea, o le Au Peresitene Sili e latou te umiaina se tulaga faapitoa i le Ekalesia. Valaaulia tamaiti aoga e suesue leMataupu Faavae ma Feagaiga 90:1–6 ma faailoa mai tiute faapitoa o le Au Peresitene Sili. (O le Au Peresitene Sili e “umia[ina] ki o le malo” [fuaiupu 2] ma o le uiga e ala i le “tuuina atu o faaaliga” i le Ekalesia [fuaiupu 4]). A o tali mai tamaiti aoga, atonu e te manao e faamatala atu e faapea o le upu “faaaliga” e faatatau i faaaliga mai i le Atua e tuuina atu e ala i Ana perofeta.

Valaaulia se tamaitiiti aoga e faitau leotele le saunoaga a Elder D. Todd Christofferson o le Korama a Aposetolo e Toasefululua. Fai i le vasega e faalogologo mo ni auala eseese se lua o lo o faatuina ai le aoaoga faavae i le Ekalesia.

Ata

Elder D. Todd Christofferson

“I le 1954, o Peresitene J. Reuben Clark Jr., a o avea ai ma se fesoasoani i le Au Peresitene Sili, le auala e faalauiloa ai mataupu faavae i le Ekalesia ma le matafaioi silisili a le Peresitene o le Ekalesia. A o talanoa ai e uiga i uso o le Au Peresitene Sili ma le Korama a Aposetolo e Toasefululua, sa ia ta’ua ai: “E tatau ona [tatou] manatuaina o nisi o le Au Pulega Aoao ua uma ona atofa atu ia i latou se valaauga faapitoa; ua latou umia se meaalofa faapitoa; ua lagolagoina i latou o perofeta, tagatavaai, ma talifaaaliga, lea ua tuu atu ai ia i latou se faamanuiaga faapitoa faaleagaga e fesootai ma lo latou aoaoina o tagata. Ua ia i latou le aia tatau, le mana, ma le pule e tautino atu ai le mafaufau ma le finagalo o le Atua i lona nuu, e faalagolago lea i le mana ma le pule aoao o le Peresitene o le Ekalesia. …

“… Atonu e faasilasila mai pe faaliliu e le Peresitene o le Ekalesia ni aoaoga faavae e tusa ai ma faaaliga e oo atu ia te ia (tagai, mo se faataitaiga, i le, MF&F 138). O le faamatalaina o aoaoga faavae e mafai foi ona oo mai le tuufaatasia o le aufono a le Au Peresitene Sili ma le Korama a Aposetolo e Toasefululua (tagai, mo se faataitaiga, Folafolaga Aloaia 2)” (“O le Mataupu Faavae a Keriso,” Ensign po o Liahona, Me 2012, 86–88).

• Aisea e taua ai le manatuaina po o ai e i ai le pule e folafola atu ai le “manatu ma le finagalo o le Atua” i le lalolagi?

Faaiu i le fai atu i tamaiti aoga, e mafaufau i mea na latou aoaoina mai savali a perofeta ma aposetolo soifua. Valaaulia tamaiti aoga e faasoa atu a latou molimau, i le ala na faamanuiaina ai i latou e nei savali.