I le talafaasolopito atoa, na faaiuina e le Tama Faalelagi vaitaimi o le liliuese i le valaauina o perofeta, o e mauaina le pule paia e toefuatai ai le atoatoaga o le talalelei ma faatuina le Ekalesia a Iesu Keriso. O Iosefa Samita o le perofeta lea i la tatou tisipenisione. O le malamalama i le ala e taitai ai e le Atua Lona nuu ma faatuina Lana Ekalesia e ala mai i perofeta, o le a fesoasoani i tamaiti aoga e atiina ae se agaga faafetai e sili atu le loloto mo le manaomia o se Toefuataiga ma se malosiaga sili atu e aoao ai isi e uiga i le Toefuataiga.
O le Liliuese Tele ma le manaomia o le Toefuataiga
Amata le lesona i le tusiina o mea nei i le laupapa:
Oge =
Valaaulia se tamaitiiti aoga e faitau leotele le Amosa 8:11–12. Fai i tamaiti aoga e mulimuli i le faitauga, ma faailoa mai pe o faapefea ona faaaoga le upu oge o se faatusa.
O le a le ituaiga o oge na valoia e Amosa o le a tupu? (Tusi tali a tamaiti aoga i le laupapa i talaane o le “Oge =”.)
O le a le mea na valoia e Amosa o le a faia e tagata ona o le oge?
O a ni faamaoniga ua e vaaia i le lalolagi, e iloa ai na i ai se oge o le “faalogologo i afioga a Ieova”? (Amosa 8:11).
Faamatala atu e faapea e ui lava o le valoaga i le Amosa 8:11–12 e foliga mai na faataunuuina i le tele o taimi i le talafaasolopito atoa, o se tasi o faataunuuga taua ua iloaina o le Liliuese Tele. Atonu e te manao e fautua atu i tamaiti aoga e tusi le Liliuese, e aofia ai le Liliuese Tele i le laina i talaane o a latou tusitusiga paia e sosoo ma le Amosa 8:11–12.
Faaali atu le fuaitau lenei ma valaaulia se tamaitiiti aoga e faitau leotele: Fai i tamaiti aoga e vaai mo ni mea moni na mafua ai le Liliuese Tele.
“Ina ua mavae le maliu o Iesu Keriso, sa sauaina e tagata amioleaga ia Aposetolo ma tagata o le Ekalesia ma fasiotia le toatele o i latou. Faatasi ai ma le maliliu o Aposetolo, o ki o le perisitua ma le pule o le perisitua e pulefaamalumalu ai, ua aveeseina mai i le lalolagi. Sa tausia pea e Aposetolo aoaoga faavae manino o le talalelei, ma tausia pea le faatulagaga ma tulaga faatonuina o le agavaa mo tagata o le Ekalesia. Ina ua leai ni Aposetolo, sa faasolo ina faaleagaina ia aoaoga faavae, ma sa faia ni suiga e le’i faatagaina i le faatulagaga o le Ekalesia faapea ma sauniga o le perisitua, e pei o le papatisoga ma le tuuina atu o le meaalofa o le Agaga Paia.
I le leai o ni faaaliga ma le pule o le perisitua, sa faalagolago tagata i le atamai faaletagata e faaliliuina ai tusitusiga paia ma mataupu faavae ma sauniga o le talalelei a Iesu Keriso. O manatu sese na aoaoina o ni upumoni. O le tele o le malamalamaaga i le uiga ma le natura moni o le Atua le Tama, o Lona Alo o Iesu Keriso, ma le Agaga Paia na leiloloa. O aoaoga faavae o le faatuatua ia Iesu Keriso, salamo, papatisoga, ma le meaalofa o le Agaga Paia sa faanenefu pe ua faagaloina. O le pule o le Perisitua sa tuuina atu i Aposetolo a Keriso ua le toe i ai i le lalolagi (Talai Lau Talalelei: O se Taiala mo le Galuega Faafaifeautalai [2004], 35).
E tusa ai ma lenei faamatalaga, o a nisi o mea moni na mafua ai le Liliuese Tele?
Aisea e taua ai lo tatou malamalama e faapea na tupu moni lava le Liliuese Tele? (Atonu e mafai ona faaaoga e tamaiti aoga ni upu eseese, ae ia mautinoa latou te faailoa mai le mataupu faavae lenei: O le iloaina na i ai se Liliuese Tele, e mafai ona fesoasoani ai ia i tatou e iloa ai le manaomia o le Toefuataiga o le talalelei.
Faamatala atu e faapea i le vaitaimi lenei o le liliuese, na faaauauina ai e le Tama Faalelagi ona faaaogaina Lana faatosinaga i le lalolagi e ala i le Malamalama o Keriso, lea ua “tuuina mai i tagata taitoatasi” (Moronae 7:16), ma e ala mai i le mana o le Agaga Paia, lea e molimau mai e moni le talalelei (tagai i le Taiala i Tusitusiga Paia, “Agaga Paia,” scriptures.lds.org. Na Ia uunaia alii ma tamaitai i le tele o aganuu na latou sailia Lana fesoasoani i lena taimi. O Kerisiano na toefaatulagaina mataupu taulotu e pei o Matini Luteru ma Viliamu Tinitale, na galulue e fesoasoani i Kerisiano ia ola latalata atili i mataupu moni na latou maua i le Tusi Paia. O taumafaiga a le au toefaatulaga, filosofia, ma na oo lava i taitai faalemalo i Europa ma Amerika i Matu na taitaia atu i se faateleina o le faamamafa i le taua faaletagata ma le saolotoga i mataupu faalelotu i le tele o vaega o le lalolagi. E ui lava i nei atiina ae taua, e lei toefuataiina atoatoa mai lava e le Atua Lana Ekalesia. (Tagai i le Talai Lau Talalelei, 45–46.)
Faaali atu le fuaitau lenei mai ia Peresitene Gordon B. Hinckley (1910–2008), ma valaaulia se tamaitiiti aoga e faitau leotele:
Ata
Peresitene Gordon B. Hinckley
“Ua tele seneturi o tapunia le lagi. E anoanoai—e le toalaiti alii ma tamaitai lelei—o tagata maoae ma le ofoofogia sa taumafai e faasa’o, faamalosi, ma faaleleia a latou polokalama o tapuaiga ma a latou aoaoga faavae. Ou te avatu ia i latou na le faamalo ma le faaaloalo. Ua sili atu ona lelei le lalolagi ona o lo latou lototetele. E ui ina ou talitonu sa musuia la latou galuega, ae lei tatalaina ai le lagi, ae faaali mai ai le Atua.(“O le Faavae Ofoofogia o lo Tatou Faatuatuaga,” Ensign, Nov. 2002, 80).
Faamanatu i tamaiti aoga e faapea, i le 1820 na saili ai le alii talavaou o Iosefa Samita mo le Ekalesia moni ae na te lei mauaina. Valaaulia tamaiti aoga e faitau le leoa le Iosefa Samita—Talafaasolopito 1:5–10, ma vaai mo fuaitau o loo faamatala ai luitau na mafua ai le Liliuese Tele.
O a nisi o fuaitau na faaaoga e Iosefa Samita e faatatau i luitau faaleagaga o ona aso?
Na faapefea ona faamatalaina e Iosefa, ona lagona sa mauaina o se taunuuga o le vevesi i mataupu faalelotu na siomia ai o ia?
Faamanatu i tamaiti aoga e faapea na saili Iosefa Samita mo le upumoni, lea na taunuu i le Uluai Faaaliga ma lona valaauliaina e avea o se perofeta. (O nei mea o le a talanoaina i le isi lesona.) Faasino atu o le valaauga o le Perofeta o Iosefa Samita ma le Toefuataiga o le talalelei, na mulimuli i se mamanu na faatuina e le Atua lea na tupu pea lava pea i le talafaasolopito atoa. Mo se faataitaiga, o le valaauga o Enoka (tagai i le Mose 6:26–32) ma Noa (tagai i le Mose 8:17–20) na mulimuli i lenei mamanu. Faaali atu le faamatalaga lenei o lenei mamanu, ma valaaulia se tamaitiiti aoga e faitau leotele:
“O loo tusia i le talafaasolopito faale-Tusi Paia le tele o taimi sa tulei saunoa mai ai le Atua i perofeta, ma o loo taua mai ai foi taimi o le liliuese. Ina ia faamutaina vaitau taitasi o le liliuese tele, sa faaalia ai foi e le Atua Lona alofa i Ana fanau e ala lea i le tofiaina o se isi perofeta ma tuuina atu ia te ia le pule o le perisitua, e toefuatai ma aoao atu ai le talalelei a Iesu Keriso. O lona uiga, o le perofeta sa galue o se leoleo e vaaia le malo o le Atua i le fogaeleele. O na vaitau o taimi sa taitaia e matafaioi faaleperofeta, e ta’ua o tisipenisione” (Talai Lau Talalelei,33; tagai foi i le Taiala i Tusitusiga Paia“Tisipenisione”).
E faapefea e le Toefuataiga o le talalelei e ala mai ia Iosefa Samita ona mulimuli i se mamanu na vaaia i tisipenisione muamua? (Atonu e faaaoga e tamaiti aoga ni upu eseese, ae ia mautinoa ua latou faailoa mai le aoaoga faavae lenei: Ina ua mavae ni vaitaimi o liliuese masani, na valaauina e le Atua perofeta ma tuuina atu ia tei i latou le pule e toefuatai ai ma toe talai atu le talalelei. E tatau foi i tamaiti aoga ona malamalama i lenei aoaoga faavae: Na valaauina Iosefa Samita e le Atua e toefuatai le talalelei i lo tatou tisipenisione.)
E mafai faapefea e le malamalama i lenei mamanu, ona fesoasoani ia te oe e faamatalaina le Toefuataiga o le talalelei i se tasi o se isi lotu?
Faamamafa atu e faapea i le Uluai Faaaliga, na aoaoina ai e Iosefa Samita le leai o se Ekalesia moni i le lalolagi, ma o le atoatoaga o le talalelei a Keriso na manaomia le toefuataiina. E ui lava o loo i ai i le Tusi Paia valoaga o le Liliuese Tele, o le faamaoniga sili ona taua na tupu i lenei liliuese, o le mea moni e faapea o Iosefa Samita na valaauina e avea ma se perofeta ma o le atoatoaga o le talalelei na toefuataiina.
O le Toefuataiga o le talalelei o “se galuega taua ma le ofoofogia”
Faamatala atu e faapea, o tusitusiga paia o loo tuuina mai ai nisi o mafuaaga a le Alii mo le toefuataiina o Lana talalelei i le lalolagi i aso e gata ai.
Valaaulia tamaiti aoga e faitau le leoa le valoaga a Isaia o le Toefuataiga o loo maua i le 2 Nifae 27:25–26, ma vaai mo le faamatalaina e le Alii o le tulaga faaleagaga o le lalolagi i le taimi o le Toefuataiga. Atonu e te manao e fautuaina tamaiti aoga e faailoga upu ma fuaitau o loo faamatalaina ai nei tulaga faaleagaga. (Manatua: O se tasi o auala e sili ona aoga mo tamaiti aoga, e maua ma faatumauina ai mea latou te aoaoina mai tusitusiga paia, o le faailoga lea o upu ma fuaitau taua.) A maea se taimi talafeagai, fai i tamaiti aoga e faasoa mai mea na latou maua.
Aisea e te manatu ai ua ta’ua ai le Toefuataiga o le talalelei o se “galuega taua ma le ofoofogia”?
O le a se mea ua e mauaina e “taua” ma “ofoofogia” e uiga i le Toefuataiga? (A o tali mai tamaiti aoga, faasino atu o le Toefuataiga o le talalelei i le avea ai o se “galuega taua ma le ofoofogia o se faataitaiga o se autu e ta’ua soo i le Mataupu Faavae ma Feagaiga. “O autu o uiga po o manatu e taua, e ta’ua soo, ma e tutusa” [David A. Bednar, “A Reservoir of Living Water” (Faigalotu o le Iunivesite a Polika Iaga, Fep. 4, 2007), 6, speeches.byu.edu].)
Valaaulia le afa o le vasega e suesue le Mataupu Faavae ma Feagaiga 1:12–17, ma vaai mo mafuaaga na tuuina atu e le Alii mo le aumaia o le Toefuataiga o le talalelei. Valaaulia le isi afa o le vasega e suesue le Mataupu Faavae ma Feagaiga 1:18-30, ma vaai mo auala o le a faamanuiaina ai e le Toefuataiga o le talalelei fanau a le Atua. (Faamatalaga: Mataupu Faavae ma Feagaiga 1:30 o le a suesueina auiliili atili i le lesona 6.)
A maea se taimi talafeagai, valaaulia tamaiti aoga e faasoa mai mea na latou aoaoina. Ia mautinoa ua malamalama tamaiti aoga i le upumoni lenei: O le Toefuataiga o le talalelei e fesoasoani ai ia i latou o e talitonu ia Keriso ia faateleina i le faatuatua ma manumalo i faigata o aso amuli.
Faitau leotele le saunoaga lenei a le Perofeta o Iosefa Samita (1805–1844):
Ata
Perofeta o Iosefa Samita
“[O perofeta] na tulimatai atu ma le naunautaiga fiafia i aso o loo tatou ola ai; ma le musuia i le fiafia ma le naunautaiga faalelagi, ua latou pepese ma tusia, ma valoia ai lo tatou taimi lenei”;(Aoaoga a Peresitene o le Ekalesia: Iosefa Samita [2007], 186).
Aisea na ono taulai mai ai i luma le vaai a perofeta ua tuanai i o tatou aso? (O le tasi manatu e ono faailoa mai e tamaiti aoga o le Toefuataiga o le a salalau atu i le kelope ma saunia ai le lalolagi mo le Afio Faalua Mai o Iesu Keriso. )
Faaali atu le saunoaga lenei a Peresitene Gordon B. Hinckley, ma fai atu i nai tamaiti aoga e feauauai i le faitauga leotele:
Ata
Peresitene Gordon B. Hinckley
“Ou uso e ma tuafafine, pe ua outou silafia ea mea ua ia te i tatou? Pe ua outou silafia ea lo tatou tulaga i le talafaasolopito sili o le tagata? O le taimi lenei na tulimatai mai i ai mea uma ua mavae. …
“… O le galuega a le Silisili ese i aso e gata ai, lea na tautala i ai i latou anamua, lea ua valoia e perofeta ma aposetolo anamua, ua oo mai. Ua i ai iinei. Ua i ai ni mafuaaga tatou te le iloa, ae o le atamai o le Atua, ua faamanuiaina ai i tatou e o mai i le fogaeleele i lenei augatupulaga viia. …
“I le tuuina atu o mea ua tatou maua ma mea ua tatou iloa, e tatau ona sili atu o tatou tagata nai lo le mea o tatou i ai nei. E tatau ona tatou avea atili e faapei o Keriso, ia saga maua le loto faamagalo, ia saga maua le loto fesoasoani ma manatu i isi tagata o loo siomia ai i tatou.
“Ua tatou ola i tami aupito sili, ua faaatuatuvaleina i se tulaga sili ma le paia i le talafaasolopito. O le tisipenisione mulimuli lenei na faasino mai i ai i le taimi ua mavae. Ou te tuuina atu lau molimau e faamaonia ai le moni ma le sao o nei mea” (“I le Faatumutumuga o Tausaga o le Soifua,” Liahona, Nov. 1999, 89).
O a manatu ma lagona o loo i le fuaitau “ua tatou i ai nei i le faatumutumuga o tausaga o le soifua” ua faaosoina i totonu ia te oe?
Afai e le patino tele, faasoa mai se aafiaga mai i lou olaga, na faamalosia ai lau molimau o le talalelei toefuataiina a Iesu Keriso.
O le a se mea e mafai ona tatou faia, e faaali ai lo tatou agaga faafetai mo le Toefuataiga o le talalelei?