Potutusi
Faitalia

“Faitalia,” Autu ma Fesili (2023)

Ata
tamaitai o loo tu i luma o se auala maga

Taiala mo le Suesueina o le Talalelei

Faitalia

O le tomai e filifili ai ma faatino mo i tatou lava

Ae e te lei fanau mai, sa e ola o se atalii po o se afafine agaga o le Atua. Sa e aoao e uiga i le fuafuaga a le Tama Faalelagi mo oe e te alualu ai i luma ma avea e faapei o Ia. Na Ia tuuina atu ia te oe le meaalofa o le faitalia, o lona uiga ua ia te oe le saolotoga e mulimuli ai i le Atua ma Lana fuafuaga pe leai (tagai Mataupu Faavae ma Feagaiga 101:78). O le mataupu faavae o le faitalia e tuuina atu ia te oe le mana e galue ai mo oe lava (2 Nifae 2:16). O lona uiga foi e te tauaveina le tiutetauave mo au filifiliga (tagai i le Helamana 14:29–31).

I le muai olaga, sa “saili [Satani] e faaumatia le faitalia a le tagata” (Mose 4:3), ma e toatele na mulimuli atu ia te ia (tagai Mataupu Faavae ma Feagaiga 29:35–36). O le mea moni ua e i ai iinei i le lalolagi o lona uiga na e faaaogaina lou faitalia e talia ai le fuafuaga a le Atua ma mulimuli ia te Ia (tagai Aperaamo 3:24–26, 28). E ala i le taitaiga a le Agaga Paia, o le a faamalosia ai oe e le Atua i au taumafaiga e faaaoga le faitalia e mulimuli ai ia te Ia. A e filifili e amiotonu, o le a e iloa ai le filemu sili atu ma le olioli ma iu ai ina agavaa e maua le ola e faavavau.

O Le A Le Faitalia?

Ua tuuina mai e le Atua i Ana fanau le tomai ma le avanoa e “galulue ai mo i latou lava ae le faamalosia” (2 Nifae 2:26). O lona uiga e mafai ona tatou filifili pe usiusitai pe leai i poloaiga a le Atua. O le a tatou oo i taunuuga—lelei pe leaga—mo a tatou filifiliga. Sa faamatalaina e le Atua lenei meaalofa o le “faitalia” (Mataupu Faavae ma Feagaiga 101:78).

Vaaiga Aoao i le autu: Faitalia ma leTali Atu mo Oe Lava Ia

Taiala fesootai mo le suesueina o le talalelei: Fuafuaga o le Faaolataga, Muai Olaga, Olaga Faitino, Usiusitai 

Vaega 1

E Te Tali Atu mo Filifiliga E te Faia i Lenei Olaga

Ata
tamaitai o loo savali i luga o le auala

Tou te faia le faitau selau o filifiliga i aso uma i mea e te mafaufau i ai, tautala ai, ma faia. Na saunoa Peresitene Thomas S. Monson faapea, o nisi o a tatou faaiuga “o le a leai se eseesega i le fuafuaga e faavavau o mea, ma o isi o le a faia le eseesega atoa. ”1 Faatasi ai ma le fesoasoani a le Atua, e mafai ona e iloa po o fea filifiliga e sili ona taua.

O se tasi o mafuaaga ua auina mai ai e le Atua Ana fanau i le lalolagi e “faamaonia i latou … e vaai pe latou te faia mea uma o soo se mea e poloaiina ai i latou e le Alii lo latou Atua” (Aperaamo 3:25). I lenei lalolagi, tou te feagai ma “faafeagai o mea uma” (2 Nifae 2:11), o avanoa e le mafaitaulia e faaaoga ai lou faitalia. E i ai se aso, o le a faamasinoina ai oe mo ou mafaufauga, upu, ma galuega (tagai Mosaea 4:30). O le auala e te faaaogaina ai lou faitalia o le a mamanuina ai lou aafiaga i lenei olaga ma i le lalolagi a sau.

Mea e mafaufau i ai

  • Na faamatalaina e Elder David A. Bednar: “I le vaevaega ofoofogia o foafoaga uma a le Atua, e i ai mea e galue, atoa ma mea e galueaiina” (tagai 2 Nifae 2:13–14). … Ina ua faamanuiaina i le faitalia, o lea o oe ma au o sui, o lona uiga o oe ma au e tatau ona tatou galulue ae lē tau galueaina.”2 E faapefea ona faamanino e lenei faamatalaga le eseesega i le va o fanau a le Atua ma isi Ana foafoaga? Aisea e te manatu ai o le mataupu faavae o le faitalia o se vaega taua o le fuafuaga a le Atua mo le faaolataga o Ana fanau?

  • Mafaufau e faitau mea na aoao atu e Liae i lona atalii o Iakopo e uiga i le taua o le faitalia i le 2 Nifae 2:26–29. E faapefea ona e faamatalaina aafiaga o le saolotoga ma le nofopologa o loo ta’ua i lenei fuaitau? O le a se mea o aoao mai e lenei fuaitau ia te oe e uiga i le auala e “filifili ai le ola e faavavau”?

Gaoioiga mo le aoao faatasi ma isi

  • Matamata le vitio “The Ten Virgins” (1:40) pe faitau faatasi le faataoto i taupou e toasefulu i le Mataio 25:1–13. Talanoaina mea o loo aoao mai e lenei faataoto e uiga i le faitalia. Talanoa e uiga i auala e mafai ona e filifili ai e saunia e feiloai ma le Faaola.

Aoao atili

Vaega 2

Na Filifili Iesu Keriso e Faia le Finagalo o le Tama i Mea Uma

Ata
o le alii talavou o Iesu Keriso o loo aoao atu i ni alii

Ina ua 12 tausaga o Iesu, sa iloa e Maria ma Iosefa e le o i ai o Ia faatasi ma lo la aiga a o latou malaga atu i le fale mai Ierusalema. Sa la maua o Ia i le malumalu o taliina fesili mai ia i latou o e sa suesueina le tulafono a le Atua. Sa fesili atu Maria ia Iesu pe na Ia silafia sa la sailia o Ia. Na tali atu Iesu, “Lua te le [iloa] ea e tatau ona ou i le fale o lo’u Tama?” (Luka 2:49). Sa faia e Iesu i taimi uma faaiuga e faavae i le finagalo o Lona Tama (tagai Luka 22:42; 3 Nifae 11:11; 27:13). O Iesu Keriso o le faataitaiga atoatoa o le faaaogaina o le faitalia e filifili ai le amiotonu nai lo le manatu faapito ma le agasala.

Mea e mafaufau i ai

  • Sa feagai Iesu Keriso ma faaosoosoga i le taimi o Lona soifuaga faaletino, e pei lava ona tatou feagai (tagai Eperu 4:15; Mosaea 3:7; Alema 7:11). Faitau le Mataio 4:1–11. O le a se mea e mafai ona e aoao mai le tali a Iesu ina ua taumafai Satani e avatu o Ia e filifili ma le amioletonu?

  • I le lauga “Faatoilalo le Lalolagi ma Maua le Malologa,” na saunoa ai Peresitene Russell M. Nelson: “O le a le uiga o le faatoilaloina o le lalolagi? O lona uiga o le manumalo lea i le faaosoosoga ia popole atu i mea a le lalolagi nai lo mea a le Atua. O lona uiga o le faatuatuaina o le aoaoga faavae a Keriso e sili atu i lo filosofia a tagata. O lona uiga o le fiafia i le upumoni, ta’uleagaina le taufaasese, ma avea ma ‘soo lotomaualalalo o Keriso’ [2 Nifae 28:14]. O lona uiga o le filifili e ‘alo’ese mai soo se mea e alu’ese ai le Agaga. O lona uiga o le naunau e ‘lafoai ese’ e oo lava i a tatou agasala e fiafia i ai [Alema 22:18].”3 E faapefea e le mulimuli i le faataitaiga a Iesu Keriso ona taialaina au taumafaiga e faatoilalo le lalolagi?

  • O a nisi o mea e mafai ona taofia oe mai le gauai atu i le finagalo o le Tama? O le a se mea e mafai ona e faia e gauai atoatoa atu ai ia te Ia?

Gaoioiga mo le aoao faatasi ma isi

  • E masani lava o a tatou filifiliga e le o le va o le sa’o ma le sese po o le lelei ma le leaga. Faitau faatasi le saunoaga lenei a Peresitene Dallin H. Oaks: “A o tatou mafaufau i filifiliga eseese, e tatau ona tatou manatua e le lava le lelei o se mea. O nisi filifiliga e lelei tele, ae o isi e silisili ona lelei. E ui lava o se filifiliga faapitoa e sili atu ona taugata, ae o lona taua sili atu e ono avea ai ma filifiliga sili ona lelei.”4 Talanoa e uiga i nisi o mataupu faavae e mafai ona fesoasoani e taiala ai oe pe a filifili i le va o filifiliga e lelei, lelei tele, pe sili atu ona lelei. O le a se mea e mafai ona e aoao mai le faataitaiga a Iesu Keriso a o e faia na filifiliga?

Aoao atili

Vaega 3

Ia fFaamuamua le Atua i Lou Olaga

Na aoao mai Peresitene Russell M. Nelson: “E i ai uma a tatou faitalia. … E mafai ona tatou filifili e faamuamua le Atua i o tatou olaga, pe leai. E mafai ona tatou filifili e avea le Atua ma faatosinaga sili ona mamana i o tatou olaga, pe leai.”5 Pe a e filifili ma le naunautai e mulimuli i le Atua i filifiliga e te faia, ua e faaalia o Lana fuafuaga e manaomia ai le faamuamua i lou olaga.

O le filifili e talitonu o se tasi lea o laasaga muamua i le faaaogaina tatau o lou faitalia. O le talitonu ia Iesu Keriso e faateleina ai lou faatuatua ma le faalagolago ia te Ia. E finagalo foi Keriso ia e talitonu i Ana afioga na faaalia mai e ala mai i Ana perofeta a o faaauau pea le Toefuataiga o le atoatoaga o Lana talalelei. A o e filifili e faatuatua ma talitonu, o le a e maua le malamalama sili atu faaleagaga ma maua le manino pe a faia ni faaiuga. O le a faateleina lou manao ia usiusitai, ma o le a sili atu ona e filifilia se ala e tau atu i le ola e faavavau.

Mea e mafaufau i ai

  • Na saunoa Peresitene Russell M. Nelson: “Ia tumau i luga o le ala o feagaiga. O lo outou tuuto e mulimuli i le Faaola e ala i le osia o feagaiga ma Ia ona tausia lea o na feagaiga, o le a matala ai le faitotoa i faamanuiaga uma faaleagaga ma avanoa e maua e alii, tamaitai, ma fanau i soo se mea.”6 O a filifiliga ua fesoasoani ia te oe e alualu ai i luma i le ala o feagaiga a le Alii? O a filifiliga o le a e faia o le a fesoasoani ia te oe e tumau ai i luga o le ala?

Gaoioiga mo le aoao faatasi ma isi

  • Valaaulia isi e talanoa e uiga i aafiaga ina ua iu le olaga i se tulaga latou te lei faamoemoeina. Talanoa e uiga i mafaufauga ma lagona e mafai ona maua mai i na aafiaga. Mafaufau e faitau faatasi le Isaia 55:8–9 ma talanoaina pe aisea e aumaia ai e le mataupu faavae o le faamuamua le Atua le filemu ma le mautinoa.

Aoao atili

O Isi Punaoa e uiga i le Faitalia