19. Cesarea ut li Helhookil Ch’och’ Saron toj Karmelo
Yoo chi ilok sa’ xnim li saq’e chiru li najteril hilob’aal jukub’ re Cesaria ut li Helhookil Ch’och’ Saron. Sa’ xtaaqe’qil li jalam-uuch neke’k’utun li tzuul re Karmelo.
K’a’ru kik’ulman: Laj Elias kixyal rib’ rik’ineb’ li b’alaq’il profeet re laj Bahal sa’ li Tzuul Karmelo (1 Rey. 18) Li Via Maris (Xb’ehil li Palaw), jun xnimal ru b’e sa’ najter kutan, wan chirix Cesaria sa’ releb’aal li saq’e. Chirix jun li xnimal ru matk’ sa’ Jope laj Pedro kixtikib’ li k’anjel sa’ xyanqeb’ laj Gentil rik’in xtzolb’al jun centurion aj Romano, aj Kornelio xk’ab’a’, sa’ Cesaria (Hech. 10). Laj Felipe kijultikan aatin ut kiwan rochoch arin, ut ke’wan kaahib’ lix rab’in li ke’xye profeetil aatin (Hech. 8:40; 21:8–9). Laj Pablo kiwan chi preexil sa’ li tenamit chiru wiib’ chihab’ (Hech. 23–26). A’an kijultikan aatin chiru laj Felix, laj Festo, ut laj Herodes Agripa Ⅱ, li kixye, “ka’ch’in chik ma nakaq’unbe’si inch’ool chi ok choq’ aj Kristiano” (Hech. 26:28).