28. Dan
Lesem kiyeeman re li najter tenamit Dan (Jos. 19:47), malaj Lahis (Jue. 18:7, 14) rub’elaj naq eb’ laj Israelita ke’reechani li ch’och’. Li yo’leb’aal ha’ sa’ li na’ajej a’in, rochb’een li nayo’la sa’ Cesarea re Filipo, a’an xyo’leb’aal li Nima’ Jordan. Li jalam-uuch a’in naxk’ut lix na’aj li santil ochoch re laj Jeroboam.
K’a’ru kik’ulman: Laj Abraham kixkol laj Lot (Gen. 14:13–16). Lix teepal laj Dan ke’reechani li ch’och’, ut Dan ke’xk’e choq’ xk’ab’a’ (Jos. 19:47–48). Laj Jeroboam kixxaqab’ jun li b’alaq’il santil ochoch ut jun li wakax oor, li kitenq’an chixt’anb’aleb’ li lajeeb’ chi teepal li ke’wan sa’ xnim li saq’e (1 Rey. 12:26–33). Dan a’an li tenamit re Israel li q’axal wan sa’ xnim li saq’e—chi jo’kan nayeeman resil li ch’och’ Israel sa’eb’ li loq’laj hu “chalen Berseba toj Dan” (2 Kro. 30:5; Berseba a’an li tenamit li q’axal wan sa’ xtz’e li saq’e). (Chi’ilmanq K’UTUL RAQAL: Dan.)