23. Li Palaw re Galilea, ut li tzuul reheb’ li Us Xaq
Yoo chi ilok sa’ xtz’e ut sa’ rokeb’aal li saq’e chiru li jun raqal re li Palaw re Galilea li wan sa’ xnim ut sa’ rokeb’aal li saq’e, a’an jun palaw re ha’ moko atz’aminb’il ta. Li tzuul li nak’utun chi nach’ ut sa’ xyi li jalam-uuch a’an li na’ajej seraq’inb’il naq li Jesus kixye wi’ li aatin sa’ xb’een li tzuul. Kafarnaum wan sa’ li tz’e, ut ink’a’ nak’utun sa’ li jalam-uuch. Tiberias wan chi najt wi’chik sa’ xtz’e li saq’e chire li palaw sa’ rokeb’aal li saq’e.
K’a’ru kik’ulman: Li Kolonel kixnumsi xnimal lix kutan sa’ lix k’anjel sa’ li na’ajej a’in. Arin kixb’oqeb’ ut kixk’ojob’eb’ li Kab’laju chi Apostol (Mat. 4:18–22; 10:1–4; Mar. 1:16–20; 2:13–14; 3:7, 13–19; Luk. 5:1–11), kixye li aatin jultikanb’il chiru li tzuul (Mat. 5–7), ut ki’aatinak rik’in jaljookil ru aatin (Mat. 13:1–52; Mar. 4:1–34). A’aneb’ a’in junjunq reheb’ li sachb’a-ch’oolej li kixb’aanu: kixk’irtesi jun li winq saqlep rix (Mat. 8:1–4); kixch’anab’ jun li kaq-sut-iq’ (Mat. 8:23–27); kirisi chaq sa’ jun saaj winq jun teepeb’ laj tza, li ke’q’axon rik’ineb’ li aaq ut ke’ok chi ha’ sa’ li palaw (Mar. 5:1–15); kixk’eheb’ chi wa’ak li 5,000 ut li 4,000 (Mat. 14:14–21; 15:32–38); kixtaqlaheb’ lix tzolom chixkutb’al lix yooyeb’, sa’ li ke’xchap wi’ naab’al li kar (Luk. 5:1–6); kixk’irtesi naab’al li tenamit (Mat. 15:29–31; Mar. 3:7–12); ut kixk’ut rib’ chirix lix waklijik chi yo’yo re xtzolb’aleb’ lix tzolom (Mar. 14:27–28; 16:7; Jwan 21:1–23). (Chi’ilmanq K’UTUL RAQAL: Galilea.)