Nefij Ñawpaj Kaj Libron
Paypa Kamachisqasnin’ Yachachisqasnin Ima
Kayqa willan Lehimanta, paypa warmin Sariahmantawan, paypa tawa wawasninmantawan, paykunaj sutisnin kanku (kurajmanta sullk’akama) Laman, Lemuel, Sam, Nefiwan. Señorqa Lehiman willan Jerusalen jallp’amanta ayqenanta, imaraykuchus runasqa Lehita wañuchiyta munanku, Lehi juchallikus qasninkumanta sut’inchasqanrayku. Payqa kinsa p’unchayta familianwan ch’in pampasta purinku. Nefiqa, hermanosninta pusaspa, Jerusalen llajtaman kutin judiosmanta escribisqata apamoj. Kayqa willan muchusqankumanta. Ismaelpa wawasninwan kasarakunku. Familiasninkuwan ch’in pampasman ripunku. Kayqa willan ch’in pampaspi muchusqasninkumanta, phutiyninkumantawan. Kayqa willallantaj, maymanchus rerqanku, chaymanta. Paykuna jatun qhochaman chayanku. Nefij hermanosnin paypa contranta ch’ajwanku. Payqa paykunata ch’inyachin, uj barcotataj ruwan. Maypichus kanku, chay lugarta sutichanku Sumaj jallp’a nispa. Paykunaqa jatun qhochata chimpanku prometisqa jallp’aman. Nefij escribisqanman jina tukuy kayta ruwarqanku. Chay ninayan ñoqa, Nefi, kay ruwasqaykumanta escriberqani.
1 Capitulo
Lehi mosqoypi rikun jatun ninata, sut’inchay librotawan. Jerusalen tukukunanta willan, Mesias jamunanta willallantaj. Judiosqa payta wañuchiyta munanku.
1 Ñoqa, Nefi, sumaj taasmanta nacesqa kasqayrayku, tukuy tataypa amañasqanmanta yachachisqa karqani. P’unchayniykunapi ashkha phutiykunata rikojtiypis, tukuy p’unchayniykunapi Señorpa bendicionninta jap’erqani; arí Dios k’acha kasqanta, paypa pakasqa cosasninmanta allinta yachaspa, ñoqa escribini imatachus ruwarqani kay p’unchayniykunapi.
2 Arí, tataypa parlaynimpi escribini; chaytaj judiospa yachayninku, egipciospa parlayninkuwan.
3 Ñoqataj yachani ruwasqay cheqa kasqanta. Ñoqa kikiy makiywan ruwani. Ñoqaj yachayniyman jina ruwallanitaj.
4 Jinallataj karqa maypachachus Sedecias, pichus Judaj reynin karqa, ñawpaj kaj watapi kamachiyta qallarerqa (ñoqaj tataytaj Lehi, tukuy p’unchayninkunapi Jerusalempi tiyakorqa). Chay kikin watapi ashkha profetas jamorqanku, runasman sut’inchaspa Diosman kutirinankuta. Willallarqankutaj mana Diosman kutirikojtinkoqa, Jerusalen llajta tukuchisqa kananta.
5 Chayrayku tatay, Lehi, jawaman llojsispa, Señormanta mañakorqa, arí, tukuy sonqonwan Señormanta mañakorqa llajtanrayku.
6 Jinataj karqa, Señormanta mañakushajtin, jatun ninaqa paypa ñawpaqempi rumi patapi rikhurerqa. Payqa ashkhata rikorqa, uyarerqataj. rikusqasninrayku, uyarisqasninraykutaj payqa anchata kharkatiterqa.
7 Chaymanta Jerusalempi wasinman kuterqa. Cama patamantaj wijch’ukorqa, Espirituwan, rikusqasninwan ima atipasqa kasqanrayku.
8 Espiritunejta atipasqa kaspa, rikuypi apasqa karqa janaj pacha kicharikojta rikunampaj. Yuyarikorqa Diosta rikusqanta tronon patapi tiyakojta, angelestataj Diospa ñawpaqempi kajta Diosninkuta yupaychanankupaj, takinankupajtaj.
9 Jinataj ujta rikorqa janaj pachamanta uraykamojta, pichus chawpi p’unchay intimanta astawanraj lliphiperqa.
10 Chunka iskayniyoj kajkunata rikullarqataj, mayqenkunachus ch’askasmanta astawan lliphiperqanku.
11 Paykuna uraykorqanku, kay pachaj kantusninkama rerqankutaj. Ñawpaj kajqa jamuspa tataypa ñawpaqempi sayarikorqa, librota qorqataj, chay librota leenanta kamachispa.
12 Jinataj librota leespa, Señorpa Espiritunwan junt’asqa karqa.
13 Leerqataj nispa: ¡Ay, ay Jerusalenmanta, imaraykuchus millay kasqaykita rikuniña! Arí, tatayqa ashkha imasta leerqa jerusalenmanta. Leerqa Jerusalen, chaypi tiyakojkunawan tukuchisqa kanankuta, ashkhas espadawan wañuchisqas kananakuta, ashkhastaj Babiloniaman presos kanankupaj pusasqas kanankuta.
14 Jinataj maypachachus tatayqa may chhika t’ukuchina kajkunamanta leerqa, rikorqataj, chaypacha Señorman qhaparerqa nispa: ¡Ruwasqasniyki may chhika allin, may chhika t’ukuchinapaj kanku, o tukuy atiyniyoj Señor Dios! ¡Qampa tronoykeqa janaj pachapi oqharikun! ¡Qampa atiyniykitaj, k’acha kayniykitaj, khuyayniykitaj tukuy kay pachapi tiyakojkuna patapi kanku! ¡Khuyayniyoj kasqaykiraykutaj mana tukuchisqachu kajta saqenkichu tukuy qanman jamojkuna!
15 Chay jina tataypa parlaynin karqa Diosninta yupaychanampaj. Imaraykuchus kusikorqa, tukuy sonqontaj junt’asqa karqa rikusqasninrayku, rí, imatachus Señor payman rikucherqa, chaymanta.
16 Kunantaj ñoqa, nefi, mana tukuy tataypa escribisqasninta willanichu, imaraykuchus payqa ashkhata escriberqa, imatachus mosqoykunapi, rikuykunapiwan rikorqa. Escriberqataj wawasninman ashkha sut’inchasqasninmanta, willasqasninmantawan, mayqenkunatachus mana tukuytachu willasaj.
17 Chaywampis ñoqaqa escribisaj imatachus ruwani p’unchayniykunapi. Ñoqataj tataypa escribisqasninta juch’uyyachini, watejmanta escribispa planchas patapi, mayqenkunatachus ruwarqani kikin makisniywan. Chantá, tataypa escribisqasninta juch’uyyachiytawan, ñoqa kawsayniymanta escribisaj.
18 Chayrayku yachanaykichista munayman, Señor tatayman chay chhika t’ukuchinapaj imasta; arí, Jerusalenta tukuchinanmanta willasqantawan, tatay Lehiqa runasman willarqa, sut’incharqataj tukuy rikusqasninmanta, uyarisqasninmantawan.
19 Jinataj judiokunaqa payta asipayarqanku paykunamanta willasqanrayku, imaraykuchus cheqamanta payqa sut’incharqa paykunaj juchallikusqankumanta, millayta ruwasqankumantawan. Sut’incharqataj rikusqasninmanta, uyarisqasninmantawan, jinataj libropi leesqasninmanta Mesiaspa jamunanmanta, kay pacha kacharichisqa kananmantawan.
20 Maypachachus judios kaykunata uyarerqanku, chaypachaqa paypaj phiñakorqanku; arí, imaynatachus unay profetaspaj phiñakorqanku mayqen profetastachus qharqorqanku, rumisqan ch’anqarqankutaj, wañucherqankutaj, jinallatataj paytapis wañuchiyta munarqanku. Jina kajtimpis ñoqa, Nefi, qhawachisqaykichis Señorpa khuyayninta ajllasqasnimpaj, feniyoj kasqankurayku, kallpachakunankupaj salvakuy atiyniyoj kanankukama.