1 Jinataj hermanosniyman parlarqani nispa: Jaku watejmanta Jerusalen llajtaman wicharisun, feniyoj kasuntaj, Señorpa kamachisqasninta junt’ananchispaj. Imaraykuchus payqa tukuy kay mundomanta aswan kallpayoj. Chantá, ¿Imarayku mana aswan kallpayoj kanman Labanmanta, phishqa chunka runasninmanta ima, arí, jinapis chunka waranqa runasninmanta?

2 Chayrayku, jaku wicharina; Moises jina kallpayoj kasun. Imaraykuchus cheqamanta payqa Puka qhocha yakusman parlarqa, t’aqanakorqankutaj. Tatasninchistaj ch’aki pampapi yaku chawpinta chimparqanku presochasqankumanta. Faraompa soldadosnintaj qhatishaspa, Puka qhochaj yakusnimpi p’ampasqas karqanku.

3 Uyariychis, imaraykuchus yachankichisña kaykunaj cheqa kasqankuta. Yachallankichistaj uj angel parlasusqaykichista, ¿Imaynata iskayrayayta atiwajchisrí? Jaku wicharina; Señorqa ñoqanchista salvayta atin, imaynamantachus salvarqa tatasninchista, ajinata. Jinallataj Señorqa Labanta tukuchiyta atin, imaynamantachus payqa egipciokunata tukucherqa, ajinata.

4 Kunantaj kay jina parlashajtiypis, paykuna phiñakorqankuraj, thutorqankurajtaj. Chaywampis paykunaqa qhatiwarqanku Jerusalen llajtaj perqasninkama.

5 Ch’isiñataj karqa, paykunata perqas jawapi pakacherqani. Pakakusqankutawan ñoqa, Nefi, pakakuspa llajtaman yaykorqani Labampa wasinman chimpoaspa.

6 Espirituwan pusasqa karqani, mana yachaspa ñawpajmanta imatachus ruwanayta.

7 Chaywampis rillarqani. Labampa wasinman chimpaspataj uj runata rikorqani, paytaj ñawpaqeypi pampaman urmasqa kasharqa, imaraykuchus vinowan machasqa kasharqa.

8 Chay runaman chimpaykojtiytaj, Laban kasqanta repararqani.

9 Espadanta qhawarqani, waqaychananmanta orqhorqanitaj. Espadaj jap’inantaj qorimanta karqa, may chhika allin ruwasqataj karqa. Qhawarqanitaj espadaj khuchunan may allin valesqa aceromanta ruwasqanta.

10 Jinataj Espiritu niwarqa Labanta wañuchinayta. Chaywampis sonqoypi nerqani: Mana jayk’ajpis runaj yawarninta jich’arqanichu. Ñoqataj ayqerikuspa mana wañuchiyta munarqanichu.

11 Espiritutaj ujtawan niwarqa: Uyariy, Señorqa payta makisniykiman churan. Arí, ñoqataj yacharqaniña wañuchiwayta munasqanta. Arí, manataj Señorpa kamachisqasninta uyarerqachu, paytaj kapuyniykuta suwarqa.

12 Jinataj Espiritu watejmanta niwarqa: Payta wañuchiy, imaraykuchus Señorqa payta makisniykiman churan.

13 Señorqa sajra sonqoyojkunata wañuchin allin kajkuna junt’akunampaj. Aswan allin kanman uj runalla wañunampaj, tukuy llajta chinkaypi, mana creeypiwan tarikunanmantaqa.

14 Kunantaj maypachachus ñoqa, Nefi, chayta uyarerqani, chaypacha yuyarikorqahni Señor ch’in pampaspi parlawasqanta nispa: Wawasniyki kamachisqasniyta junt’anqanku chayqa, prometisqa jallp’api paykunata tukuy imapi allin renqa.

15 Arí, yuyarikorqanitaj mana kamachisqasninta junt’ankumanchu Moisespa leyninman jina, mana ley tiyapojtinkoqa.

16 Yachallarqanitaj chay leyqa bronce planchas patapi escribisqa kasqanta.

17 Yachallarqanitaj Señor Labanta makisniyman churasqanta escribisqa planchasta jap’inaypaj kamachisqasninman jina.

18 Chayrayku Espiritoj nisqanta kasorqani. Labanta umampa chujchanmanta oqharerqani, umanta qhorurparerqanitaj kikin espadanwan.

19 Umanta kikin espadanwan qhorurpariytawampachataj, ñoqaqa Labampa p’achasninta lluch’orqani, chaykunawantaj p’achallikorqani, arí ima juch’uy kajwampis. Maqanakuna p’achasninta churakorqanitaj.

20 Chayta ruwaytawantaj, Labampa qori waqaychanapaj wasinman rerqani. Labampa qori waqaychanapaj wasinman rishaspa, rikorqani Labampa kamachinta, pichus qori waqaychanapaj wasimanta llavesta jap’erqa. Ñoqataj Laban jina parlaspa payta kamacherqani ñoqawan rinanta qori waqaychanapaj wasiman.

21 Paytaj yuyarqa kamachejnin, Laban, kasqayta imaraykuchus p’achasta rikorqa, espadatapis cinturaypi churasqata.

22 Ñoqamantaj parlawarqa judiospa kurajninkunamanta yachasqanrayku kamachejnin, Laban, paykunawan kasqanta ch’ispi.

23 Payman parlarqani Labanman tukuspa.

24 Payman parlallarqanitaj escribisqasta apanaypaj kuraj hermanosniyman, pikunachus perqa wasapi kasharqanku.

25 Payman nerqanitaj ñoqata qhatinawanta.

26 Paytaj pataspa yuyarqa iglesiapi hermanosmanta parlasqayta, jinataj ñoqa Laban kasqaytawan yuyarqa, pitachus ñoqa wañucherqani. Chayrayku qhepayta rerqa.

27 Hermanosniyman rishajtiy, pikunachus perqa jawapi karqanku, payqa ashkha kutita parlawarqa judiospa kurajninkunamanta.

28 Jinataj maypachachus Laman rikuwarqa, chaypacha anchata mancharikorqa Lemuel, Sampis. Paykunataj ñawpaqeymanta ayqerqanku, Laban kasqayta pantaspa yuyasqankurayku. Pantaspataj yuyarqanku Laban ñoqata wañuchiswasqanta, paykunata wañuchiyta munasqantawan.

29 Jinataj ñoqa paykunata wajyarqani. Paykunataj uyarikorqanku, chayrayku manaña ñawpaqeymanta ayqerqankuchu.

30 Jinataj maypachachus Labampa kamachin hermanosniyta rikorqa, chaypacha kharkatitiyta qallarerqa, ñoqamanta ayqej jinataj karqa Jerusalen llajtaman kutipunampaj.

31 Ñoqataj, Nefi, jatun runa kaspa, Señormanta ancha kallpachasqa kaspataj, Labampa kamachinta jap’erqani mana ayqenampaj.

32 Jinataj payman parlarqani nispa, Señorpa kawsasqanman jina, kawsasqayman jinataj mana payta wañuchiykumanchu parlasqayta uyarejtenqa.

33 Payman parlarqanitaj juramentota ruwaspa, mana mancharikunampaj, ñoqayku jina libre runa kanman ñoqaykuwan kuska ch’in pampasman rispaqa.

34 Payman parlallarqanitaj nispa: Cheqamanta Señorqa kamachiwarqayku kayta ruwanaykupaj. ¿Manatajchu Señorpa kamachisqasninta junt’asunchis tukuy sonqonchiswan? Chayrayku ñoqaykuwan ch’in pampasman, tatayman uraykunki chayqa, ñoqaykuwan lugarniyoj kanki.

35 Jinataj Zoram kallpachakorqa parlasqayrayku. Kunantaj Zoramqa Labampa kamachimpa sutin karqa. Paytaj mana llullakuspa nerqa ch’in pampasman, tatayman uraykunanta. Jurallawarqaykutaj chay p’unchaymantapacha ñoqaykuwan quedakunanta.

36 Ñoqaykoqa quedakunanta munarqayku mana judios yachanankupaj ch’in pampasman ayqesqaykuta, paykuna mana qhatinawaykupaj, wañuchinawaykupaj.

37 Jinataj maypachachus Zoram ñoqaykuwan juramentota ruwarqa, chaypacha manaña paymanta mancharikorqaykuchu.

38 Jinataj bronce planchasta apaspa, Labampa kamachinta pusaspataj, ch’in pampasman llojserqayku, purerqaykutaj tataykoj carpannejman.