4 Capitulo
Nefitakuna uj maqanakuywan vengakuyta qallarinku lamanitakunaj contrampi. Nefitakuna manaña atipankuchu. Santa escrituras Shim nisqa orqomanta orqhosqas kanku.
1 Jinataj kinsa pachaj sojta chunka kinsayoj watapi nefitakuna shkha soldadosninkuwan Ch’in jallp’amanta wicharerqanku lamanitakunaj contrampi maqanakoj.
2 Jinataj nefitakunaj ashkha soldadosnin Ch’in jallp’aman kutichimusqa karqanku. Sayk’usqaraj kashajtinkutaj mana sayk’usqa lamanita soldados paykunaman jamorqanku; ancha jatun maqanaku karqa, jinataj lamanitakuna Ch’in llajtata jap’erqanku, ashkha nefitakunata wañucherqanku, ashkhata paykunamanta presochallarqankutaj.
3 Nefitakunaj puchuuntaj ayqerqa, Teancum nisqa llajtapi tiyajkunawan kanankupaj. Teancum llajtaqa jatun qhochaj kantunnejpi, Ch’in llajtanejpitaj.
4 Nefitakunaj ashkha soldadosnin lamanitakunaj contranman wicharisqankurayku atipachikuyta qallarerqanku, imaraykuchus mana chay kajtenqa, lamanitakuna paykunata mana atipayta atinmanchu karqa.
5 Chaywampis Diospa juiciosnin sajra runasman urmanqa, sajra runaswantaj sajra runasqa jasut’ichisqas kanqanku; imaraykuchus sajra runas, runaspa wawasninkoj sonqonkuta phiñayachinku yawarta jich’anankupaj.
6 Jinataj Teancum llajtaj contranman jamunankupaj maqanakoj lamanitakuna wakichiskorqanku.
7 Jinataj kinsa pachaj sojta chunka tawayoj watapi lamanitakuna Teancum llajtaj contranman jamorqanku Teancum llajtata jap’inankupaj.
8 Jinataj nefitakuna paykunat qharqorqanku, kuticherqankutaj. Nefitakunataj lamanitakunata atipaytawan watejmanta kallpanku jatun kasqanta yuyarqanku; kikinkoj atiyninkupitaj rerqanku; mosojmanta Ch’in nisqa llajtata jap’ikapullarqankutaj.
9 Tukuy kaykuna ruwasqas karqanku, waranqa waranqakunataj wañuchisqas karqanku iskaynin t’aqamanta, nefitakunamanta lamanitakunamantataj.
10 Jinataj kinsa pachaj sojta chunka sojtayoj wata tukukorqa, watejmantataj lamanitakuna nefitakunaman maqanakoj jamorqanku; manarajtaj nefitakuna sajra ruwasqankumanta llimphuchakorqankuchu, astawanqa sajra ruwayninkupiraj kasharqanku.
11 Manataj simi willayta atinmanchu, nitaj runa cabalta escribiyta atinmanchu imayna ashkha yawarpunichus jich’asqa karqa, imayna wañuchiykunachus karqa, chaytaj nefitakunapurapipis, lamanitakunapurapipis; sapa sonqotaj rumiyachisqa karqa yawar jich’aypi kusikunampaj.
12 Jinataj, Señorpa nisqanman jina, mana ni jayk’ajpis chay jina jatun sajra ruwaykuna karqachu Lehij wawasnin ukhupi, ni tukuy Israelpa wawasnin ukhupipis, kay llajta ukhupi jina.
13 Jinataj lamanitakuna Ch’in llajtata jap’eranku, nefitakunamanta aswan ashkhas kasqankurayku.
14 Jinataj paykuna Teancum llajtaj contranmna purerqanku, chaypi tiyakojkunatataj chaymanta qharqorqanku, ashkha warmista, wawastawan presocharqanku, paykunatataj lantisninkupaj wañucherqanku.
15 Jinataj kinsa pachaj sojta chunka qanchisniyoj watapi nefitakuna phiñakorqanku warmisninkuta, wawasninkutawan wañuchisqankurayku lamanitakuna, chayrayku paykunaqa lamanitakunaj contranman sumaj phiñaywan rerqanku, lamanitakunatataj atiparqanku, jallp’asninkumantataj qharqorqanku.
16 Lamanitakunataj nefitakunaj contranman mana watejmanta jamorqankuñachu kinsa pachaj qanchis chunka phishqayoj watakama.
17 Kay watapirí tukuy atiyninkuwan nefitakunaj contranman jamorqanku lamanitakuna, manataj yupasqaschu karqanku ancha ashkha kasqankurayku.
18 Chaypachataj nefitakunaqa manaña lamanitakunata atiparqankuchu, astawanqa pisiyayta qallarerqanku intej ñawpaqempi chhulla chinkarin jinata.
19 Jinataj lamanitakuna Ch’in nisqa llajtaj contranman uraykamorqanku; Ch’in nisqa jallp’apitaj ancha jatun maqanakuy karqa, mayqempichus paykuna nefitakunata atiparqanku.
20 Nawpaqenkumantataj watejmanta ayqerqanku; Boaz nisqa llajtamantaj jamorqanku, chaypitaj mana manchachikuspa lamanitakunaj contrampi sayarqanku, lamanitakuna paykunata mana atipanankupaj iskay kutita jamunankukama.
21 Iskay kaj kutita jamojtinkutaj nefitakuna kutichisqas, wañuchisqastaj karqanku ancha jatun wañuchiywan; watejmantataj warmisninkuta, wawasninkutawan lantisninkupaj wañucherqanku.
22 Jinataj nefitakuna watejmanta ñawpaqenkumanta ayqerqanku, tukuy juch’uy llajtapi, jatun llajtapipis tiyakojkunatapaykunawan pusaspa.
23 Kunantaj ñoqa, Mormon, lamanitakunaj jallp’ata jap’ej jina kasqankuta rikorqani, chayrayku Shim nisqa orqoman rerqani, tukuy Ammarompa Señorman pakasqan escriturasta orqhorqanitaj.