1 Kunantaj llajtay, nefitakunaspa, tukukuyninkumanta escribisqayta tukuchani. Jinataj lamanitakunaj ñawpaqenkupi purerqayku.

2 Ñoqataj, Mormon, lamanitakunaj reyninkuman cartata apacherqani, Cumora jallp’aman, Cumora wajyasqa orqonejman, chayman llajtaykuta tantanaykupaj, chayta paymanta mañakorqani chaypi paykunawan maqanakunaykupaj.

3 Jinataj lamanitakunaj reyninku mañasqayta munarqa.

4 Jinataj Cumora jallp’aman rerqayku, Cumora nisqa orqonejpitaj carpasniykuta sayacherqayku; chay jallp’ataj ashkha yakusniyoj, mayusniyoj, pujyusniyoj ima karqa; chaypitaj lamanitakunata atipanaykupaj suyayniyoj karqayku.

5 Kinsa pachaj pusaj chunka tawayoj wata tukukojtinñataj llajtaykoj puchunta Cumora jallp’aman tantarqayku.

6 Jinataj tukuy llajtaykuta Cumora jallp’aman ujllaman tantajtiykuña ñoqa, Mormon, viejoña karqani; kay llajtaypa qhepa maqanakuynin kananta yacharqani; Señortaj tatasniykumanta santa escriturasta lamanitakunaj makisninkumana mana urmajta saqenayta kamachiwarqa, imaraykuchus chaykunata tukuchinkumana, chayrayku kay escribisqata ruwarqani Nefij planchasninmanta, jinataj tukuy Señorpa makinnejta jap’isqay escribisqasta pakarqani Cumora orqopi, wakin planchastataj waway Moroniman qorqani.

7 Jinataj llajtayqa, warmisninwan, wawasninwan ima lamanitakunaj ashkha soldadosnin paykunaman jamojta rikorqanku; chay manchaywantaj, mayqen manchaychus tukuy sajra runaspa pechonkuta junt’an, jinataj wañuy manchaywan paykunata suyarqanku.

8 Jinataj paykuna ñoqaykuwan maqanakoj jamorqanku, ancha ashkha kasqankuraykutaj sapa runa manchikuywan junt’asqa karqa.

9 Jinataj espadawan, arcowan, flechawan, hachawan, tukuy imaymana maqanakunawantaj paykuna llajtayman urmarqanku.

10 Jinataj llajtay urmachisqa karqa, arí, chunka waranqa ñoqawan kajkunapis, ñoqataj chawpinkupi wijch’usqa urmarqani; ñoqanejman purerqankutaj, manataj kawsayniyta tukucherqankuchu.

11 Paykunataj chawpiykuta rispa tukuy llajtayta wañucherqanku — iskay chunka tawayojllatataj mana wañuchiwarqaykuchu (ñoqaykuwantaj waway Moroni karqa) — ñoqaykutaj llajtaykoj wañusqasninmanta kawsasparaj, q’ayantin, lamanitakuna carpasninkuman kutipojtinku, chaypacha Cumora orqoj puntanmanta pusasqay chunka waranqa wañusqa runasniyta rikorqayku.

12 Waway Moronij pusasqan chunka waranqa runasta rikullarqaykutaj.

13 Jinapis, Gidgiddonahj chunka waranqa kajninkuna urmasqanku, paypis chawpinkupi urmasqallataj karqa.

14 Lamahpis chunka waranqa kajninkunawan urmasqallataj; Gilgalpis chunka waranqa kajninkunawan urmasqa; Limnahpis chunka waranqa kajninkunawan urmasqa; Joneampis chunka waranqa kajninkunawan urmasqallataj; Camenihahpis, Moronihahpis, Antionumpis, Shiblompis, Shempis, Joshipis sapa ujninku kikin chunka waranqa kajninkuwan urmasqallataj karqanku.

15 Jinataj chunka runawanraj karqanku, pikunachus chunka waranqa kajninkuwan espadarayku urmarqanku; arí, tukuy laljtaypis urmarqa; ñoqawan iskay chunka tawayoj runaslla mana wañorqaykuchu, jinataj uj chhika runas ura llajtasman ayqerqanku, uj chhika runastaj lamanitakuna t’aqaman riporqanku. Aychanku, tullusninkuwan, yawarninkuwan jallp’a patapi wijch’usqas karqanku, jallp’a patapi ismunankupaj, ñut’ukunankupajtaj pacha mamankuman kutipunankukama.

16 Ñoqataj thunisqa karqani phutiywan, llajtaypa wañusqasninrayku, qhaparerqanitaj:

17 ¡O ancha sumaj runakuna, imaynata Señorpa ñanninmanta t’aqakuyta aterqankichis! ¡O k’acha runas, imaynata Jesusta, pichus mast’asqa makisninwan qankunata jap’inampaj sayarqa, imaynata payta qhesachayta aterqankichis!

18 Qhawaychis, mana kayta ruwawajchischu karqa chayqa, mana urmawajchischu karqa. Chaywampis urmasqas kankichis, chinkasqaykichismantataj waqani.

19 ¡O k’acha qhari wawas, warmi wawas, tatas, mamaswan, qosas, warmiswan, sumajkuna, imaraykutaj urmanaykichis karqa!

20 Chaywampis, ripunkichisña, phutiyniykunataj mana kutichimuyta atisunkichischu.

21 Wañoj mana wañojwan p’achallikuy p’unchay jamushanñataj, kay ismushaj cuerpostaj mana ismoj cuerposman tukunanku tiyan; chaypachataj Cristoj juzganan ñawpaqempi sayarinaykichis tiyan ruwasqasniykichisman jina juzgasqas kanaykichispaj; sumaj runas kankichis chayqa, ñawpaqeykichista ripoj tatasniykichiswan bendecisqas kankichis.

22 O manaraj kay jatun tukuchiy qankunaman jamushajtin Diosman kutirikuwajchis karqa. Chaywampis ripunkichisña, Tatataj, arí, janaj pachaj Wiñay Tatan kawsayniykihista yachan; justicianman jina, khuyayninman jinataj qankunawan ruwanqa.