1 Kunantaj ñoqa, Moroni, tatay, Mormompa, escribisqanta tukuchani. Kunanqa pisi imasllataraj escribinay tiyan, imatachus tatay kamachiwarqa escribinaypaj, chayta.

2 Jinataj ancha jatun Cumora maqanakuy pasajtin, lamanitakuna ura llajtaman ayqej nefitakunata mask’arqanku tukuyninku wañuchisqas kanankukama.

3 Tataypis paykunanejta wañuchisqallataj, ñoqataj sapitallay quedakuni llajtay tukukusqanmanta phutiy willanta escribinaypaj. Paykunaqa ripunkuña, ñoqataj tataypa kamachiwasqanta junt’ashani. Sichus ñoqata wañuchiwanqanku, manachus, chayta mana yachanichu.

4 Chayrayku escribisaj, escribisqasta pampapi pakasajtaj; imatajchus pasawanqa, chay mana importawanchu.

5 Tatay kay escribisqata ruwarqa, escribillarqataj imapajchus kashanku kaykuna, chayta. Jinataj campo kajtin planchaspi ñoqapis chayta escribiyman, chaywampis manaña kanchu campo; metaltaj mana kapuwanchu, sapitay kasqayrayku. Tataytaj maqanakupi wañuchisqa, tukuy familiaypis wañuchisqasllataj, manañataj hermanoyojchu kani, manataj ni maymampis kanchu rinaypaj; mayk’ajkamachus Señorqa kawsajta saqewanqa, chaytapis mana yachanichu.

6 Señorninchis, Salvadorninchis jamusqanmanta tawa pachaj wataña pasan.

7 Lamanitakunataj lalajtayta, nefitakunata qhatiykachanku llajtamanta llajtaman, jallp’amanta jallp’aman manaña kanankukama; urmasqankutaj ancha jatun; arí, llajtay, nefitakuna, thunisqa kasqankoqa jatun, t’ukunapajtaj.

8 Jinataj Señorpa makinwan ruwasqa. Lamanitakunapurapitaj maqanakunkuraj; kay jallp’aj patantimpitaj wañuchiy, yawar jich’aywan kan; manataj pipis maqanakuypa tukukuyninta yachanchu.

9 Kunantaj, manaña astawan paykunamanta parlasajchu, manataj ni pipis, lamanitakunalla, suwaswan kay jallp’a patapi kasqankurayku.

10 Manataj ni pipis cheqa Diosta rejsinchu, Jesuspa ajllasqasnillan, pikunachus kay jallp’api quedakorqanku llajta sajra kasqanrayku, may ashkha millay kasqanraykutaj Señorqa paykunata mana llajtawan quedokojta saqenankama, paykunalla payta rejsinku; paykunataj kay jallp’a patapichus, manachus kasqankuta mana ni mayqen runapis yachanchu.

11 Chawampis tatay, ñoqawan paykunata rikorqayku, ñoqaykutataj yachachiwarqayku.

12 Pitajchus kay escribisqata jap’inman, kayta manataj juchachanmanchu, kaypi mana cabal cosas kasqanrayku, payqa kaykunamanta aswan jatuchus cosasmanta yachanman. Qhawariy, ñoqaqa Moroni kani; atispataj tukuy imata rejsichiykichisman.

13 Kay llajtamanta parlayta tukuchani. Mormompa wawan kani, Nefitaj tataypa unay tatan karqa.

14 Ñoqataj kani pichus kay escribisqata Señorman pakarqani; Señor kamachisqanraykutaj planchas mana valesqachu. Imaraykuchus payqa cheqamanta nerqa ni pi qhapajchakunampaj planchasta jap’inanta; chaywampis escribisqan manchay valesqa; pitajchus chayta k’anchayman orqhoj, payta Señorqa bendicenqa.

15 Manataj ni pipis atiyniyojchu chayta k’anchayman orqhonampaj, Diospa atiyninta jap’ejlla; imaraykuchus Dios chayta ruwasqa kananta munan k’anchayninman jina uj yuyayllawan, jinataj Señorpa may unay ch’eqerachisqa trato llajtampa allin kanampaj.

16 Kayta k’anchayman orqhojtaj bendecisqa kanqa; imaraykuchus Diospa nisqanman jina laqha pachamanta k’anchayman orqhomusqa kanqa; arí, pampamanta orqhomusqa kanqa, laqhamantataj k’anchamonqa, llajtaj yachayninmantaj jamonqa; Diospa atiyninwantaj ruwasqa kanqa.

17 Pantaykunataj kan chayqa, chaykuna runaspa pantayninkuna. Mana ni ima pantaymantapis yachaykuchu; chaywampis Dios tukuy imata yachan; chayrayku, juchachajqa reparachun mana ukhu pachaj nina lawrayninman urmanampaj.

18 Pitajchus nin: Qhawachiway, mana chayqa jasut’isqa kanki — payqa reparachun, imachus Señornejta jark’asqa, chayta mana kamachinampaj.

19 Imaraykuchus sinchi usqhayta juchachajqa watejmanta sinchi usqhayta juchachasqa kanqa; imaraykuchus ruwasqanman jina pagonqa kanqa; chayrayku pichus jasut’in, watejmanta Señor payta jasut’enqa.

20 Qhawariy imatachus escritura nin — runaqa mana jasut’enqachu, manataj juchachanqachu; imaraykuchus juchachay ñoqaypata, nin Señor, aynipi kutichiypis ñoqaypata, ñoqataj kutichisaj.

21 Pitajchus Señorpa ruwaynimpa contrampi, Señorpa Israelpa wawasninmanta trato llajtampa contrampi phiñariykunata, tratanakuykunatawan ruwanman, ninmantaj: Señorpa ruwayninta thunisunchis, Señortaj Israelpa wawasninwan tratonta manaña yuyarenqachu — payqa urmachisqa, nina lawrayman wijch’usqataj kananmanta peligropi kashan.

22 Señorpa wiñay ruwanasnenqa ñawpajman renqankuraj tukuy nisqasnin junt’asqas kanankukama.

23 Allinta qhawaychis Isaiaspa sut’inchasqasninta. Chaykunata mana escribiyta atinichu. Arí, niykichis, chay ñawpaqeyta ripojkuna, pikunachus kay jallp’ayoj karqanku, paykunaqa qhaparenqanku, jallp’amantapis Señorman qhaparenqanku; Señortaj kawsasqanman jina paykunawan tratonta yuyarenqa.

24 Hermanosninkupaj Diosmanta mañakusqasninkuta yachallantaj. Feninkutapis yachallantaj, imaraykuchus sutimpi orqosta kuyuchiyta aterqanku; sutimpitaj jallp’ata kharkatitichiyta aterqanku; nisqampa atiyninwantaj carcelkunata pampaman urmacherqanku; arí, nina hornopis paykunata mana imanayta aterqachu, manataj sajra animalespis, ni venenoyoj katarispis paykunata imanayta aterqankuchus nisqampa atiyninrayku.

25 Señormanta mañakusqasninkutaj karqanku, pichus k’anchayman kay cosasta orqhomunman, paypaj karqanku.

26 Manataj ni pipis mana jamunankuta ninanchu tiyan, imaraykuchus cheqamanta rikhurimunanku tiyan Señor chayta nisqanman jina; Señorpa makinnejta pampamanta rikhurimonqanku, manataj pipis chayta jark’ayta atinmanchu; manaña milagros kanchu nispa parlay p’unchaypitaj jamonqa; chaytaj kanqa pipis wañusqamanta parlamunman jina.

27 Pakaypi ruwaykunarayku, laqhapi ruwaykunaraykutaj allin kawsajkunaj yawarnin Señorman qhaparinan p’unchaypi jamonqa.

28 Arí, Diospa atiyninta negay p’unchaypi, iglesias millayta ruwajtinku, sonqonkoj orgullonkupi jatunchaykuy p’unchaypi jamonqa; arí, iglesiasta pusajkuna, yachachejkunawan sonqonkoj orgullonkupi jatunchakojkuna, iglesiasninkumanta kajkunata munapayanankukama, chay p’unchaypi rikhurimonqa.

29 Arí, waj jallp’aspi ninasmanta, sinchi para wayrasmanta, q’osñi llojsiymantawan uyarina p’unchaypi jamonqa;

30 Jinataj kaynejpi, jaqaynejpi maqanakuykunamanta parlaykunata, jallp’a kuyuykunamantawan uyarinkichis.

31 Arí, jatuchas millaykunas jallp’api p’unchaypi jamonqa; kanqa wañuchiykunas, suwaykunas, llullakuykunas, pantachiykunas, qhenchachakuykunas, tukuy imaymana millaykunas kallanqataj; ashkha runastaj nenqanku: Kayta ruwaychis, jiná chayta ruwaychis, manataj importanchu, imaraykuchus qhepa p’unchaypi Señorqa kaykunata ruwajta sayarichenqa. Chaywampis ay chay jina runasmanta imaraykuchus paykunaqa jayaq’epi, sajra ruwaypa wataynimpitaj kashanku.

32 Arí, jamonqa iglesias ruwasqas kajtin, nispa: Ñoqaman jamuychis, qolqeykichisraykutaj juchasniykichis pampachasqas kanqanku.

33 Yaw sajra llajta, mana yuyayniyoj rumi sonqoyoj runas, ¿Imajtin iglesiasta qhapajchakunaykchispaj ruwankichis? ¿Imajtin Diospa llimphu nisqanta cambiankichis, juchachasqas kanaykichispaj? Allinta qhawaychis Diospa sut’inchasqasninta; imaraykuchus tukuy kaykuna junt’akunan p’unchay jamonqa.

34 Señorqa jatun t’ukuchinapaj cosasta qhawachiswan, mayqenkunachus jamonqanku, maypachachus kaykunas qankunaman jamonqanku.

35 Kaypipis kawajchis jina parlaykichis, chaywampis mana kaypichus kankichis. Chaywampis Jesucristo qankunata qhawachiwan, ruwasqaykichistataj yachani.

36 Sonqoykichispa orgullompi purisqaykichista yachallanitaj; wakillantaj mana sonqosninkoj orgullonkupi jatunchakunkuchu, ancha sumaj p’achaswan p’achallikunankupaj, munapayanankupaj, phiñanakunankupaj, sajrata ruwanankupaj, qhatiykachanankupaj, tukuy imaymana sajra ruwaykunata ruwanankupajtaj; iglesiasniykichistaj, arí, sapa uj sonqoykichispa orgullompi millaychasqas kanku.

37 Qolqeta, kapuyniykichiskunata, sumaj p’achasniykichista, iglesiasta k’achachanaykichistawan astawan munakunkichis pobre necesitaj runasmanta, onqosqa phutiyniyoj runasmanta nisqaqa.

38 O millaychasqas, puraj uyas, yachachejkuna, ismuchinapaj vendekojkuna, ¿Imajtintaj Diospa llimphu iglesianta millaychankichis? ¿Imajtintaj Jesucristoj sutinmanta p’enqakunkchis? ¿Imajtintaj mana wañoj muchuymanta, wiñay kusiy aswan jatun kasqanta mana reparankichischu? — ¿Runaspa jatunchayninkuraykuchu?

39 ¿Imapaj mana kawsayniyojwan k’achachakunkichis, yarqhayniyoj runasta, necesitaj runasta, wajcha runasta, onqosqasta, phutikuyniyoj runastawan qankunanejta purejta saqespa, paykunata mana uyarispataj?

40 Arí, ¿Imarayku pakaypi millaychaykunata ruwankichis qhapajchakunaykichispaj, Señorpa ñawpaqempi viudas waqanankupaj, wajchas Señorpa ñawpaqempi waqanankupajtaj, tatasninkoj, qosasninkojwan yawarninku jallp’amantapacha Señormanta mañakunankupaj umaykichisman urmanampaj jasut’iy?

41 Justiciaj espadan qankuna patapi warkhurayashan; pisi tiempomantataj allin kawsajkunaj yawarnin qankunaman aynita kutichisonqachis, imaraykuchus payqa manaña waqayninkunata awantanqachu.