GJS, UMateyu 21:33. Thelekisa noMateyu 21:32–33
Umntu makaguquke phambi kokuba abe nako ukukholwa kuKrestu.
33 Kuba lowo ungakholelwanga kuYohane ngokunxulumene nam, akanako ukukholwa kum, ngaphandle kokuba akaguquki kuqala.
GJS, UMateyu 21:47–56. Thelekisa noMateyu 21:45–46
UYesu ubhengeza okokuba Yena ulilitye lembombo. Ivangeli inikwa amaYuda emveni koko iiNtlanga. Abakhohlakeleyo baya kutshatyalaliswa xa uYesu ebuya.
47 Kwaye xa ababingeleli abaziintloko nabaFarisi bevayo ngemizekeliso yabo, bacingela ukuba wayethetha ngabo.
48 Kwaye bathi phakathi kwabo, Ingaba lo mntu uya kucinga ukuba yena eyedwa anganako ukutshabalalisa obu bukumkani bukhulu? Kwaye ke babenomsindo nguye.
49 Kodwa bathi bakufuna ukubeka izandla kuye, boyika indimbane, ngoba babefunde okokuba indimbane yamthatha ngokuthi ungumprofeti.
50 Kwaye ngoku abafundi bakhe beza kuye, waze uYesu wathi kubo, Nimangalisiwe na emazwini omzekeliso endawuthetha kubo?
51 Inene, ndithi kuni, ndililitye, nabo bangabakhohlakeleyo bandicekisile.
52 Ndiyintloko yembombo. La maYuda aya kuwela phezu kwam, kwaye aya kwaphuka.
53 Kwaye ubukumkani bukaThixo buya kuthatyathwa kubo, kwaye buya kunikwa isizwe esizisa ngaphambili iziqhamo zabo; (kuthethwa iiNtlanga.)
54 Ngako oko, nakubani na eli litye eliya kumwela, liya kumcola abe ngumgubo.
55 Kwaye xa iNkosi ke ngoko yesidiliya isiza, iya kutshabalalisa abo bangonwabanga, abantu abakhohlakeleyo, kwaye iya kuqeshisa kwakhona ngesidiliya sayo kwabanye abalimi abangabambi, nkqu kwimihla yokugqibela, abaya kumamkelisa iziqhamo ngamaxesha azo.
56 Kwaye ngoko baqonda umzekeliso awathetha ngawo kubo, okokuba iiNtlanga zimele kanjalo ukutshatyalaliswa, xa iNkosi iya kuhla iphuma ezulwini ize kulawula isidiliya sayo, esingumhlaba nabemi bawo.