Ապրող մարգարե վերջին օրերի համար
Երկնային Հայրն ընտրել է մարգարեի միջոցով Իր զավակներին ճշմարտությունը հայտնելու ուղին։
Երբ երեխա էի, ես սիրում էի կիրակիները, քանի որ այն ամենը, ինչ անում էի այդ օրը, կարծես արկած էր: Սակայն ինչ էլ որ անեի, դրան միշտ նախորդում էր ամենակարևորը՝ հեռուստացույցով մուլտֆիլմեր դիտելը: Այդպիսի մի կիրակի առավոտյան, երբ կանգնած էի հեռուստացույցի մոտ և թերթում էի ալիքները, ես տեսա, որ իմ փնտրած մուլտֆիլմը փոխարինվել էր Հիսուս Քրիստոսի Վերջին Օրերի Սրբերի Եկեղեցու գերագույն համաժողովի հեռարձակումով: Հեռուստացույցին նայելով և բողոքելով, որ մուլտֆիլմը հանել են, ես նկատեցի կոստյումով ու փողկապով մի ճերմակահեր տղամարդու՝ նստած գեղեցիկ աթոռին։
Նա տարբերվում էր բոլորից, ուստի ես հարցրի ավագ եղբորս. «Ո՞վ է նա»:
Նա ասաց. «Դա նախագահ Դեյվիդ Օ. Մակքեյն է. նա մարգարե է»:
Հիշում եմ, որ ինչ-որ բան զգացի, երբ իմացա, որ նա մարգարե է: Հետո, քանի որ ես մուլտֆիլմեր սիրող տղա էի, փոխեցի ալիքը։ Բայց ես երբեք չեմ մոռացել, թե ինչ զգացի այդ կարճ, բայց անսպասելի բացահայտման պահին: Մարգարեի դեպքում երբեմն միայն մի պահ է պահանջվում իմանալու համար:1
Երբ հայտնությամբ իմանում ենք, որ երկրի վրա ապրող մարգարե կա, ամեն ինչ փոխվում է:2 Դա ստիպում է մարդուն չմտնել այն բանավեճի մեջ, թե երբ է մարգարեն խոսում որպես մարգարե, կամ մարգարեական որ խորհուրդը պետք է ընդունել, իսկ որը՝ մերժել:3 Այդ գիտելիքը մարդուն ստիպում է վստահել ապրող մարգարեի խորհրդին, նույնիսկ, եթե այն ամբողջությամբ չենք հասկանում:4 Ի վերջո, կատարյալ և սիրառատ Երկնային Հայրն ընտրել է մարգարեի միջոցով Իր զավակներին ճշմարտությունը հայտնելու ուղին․ մի մարդու միջոցով, որը երբեք չի ձգտել նման սուրբ կոչման և առանց մեր օգնության գիտի իր թերությունների մասին:5 Մարգարեն այն մարդն է, որին Աստված անձամբ է պատրաստել, կանչել, ուղղել, ոգեշնչել, հանդիմանել, սրբացրել և հաստատել:6 Այդ պատճառով է, որ մենք երբեք հոգևոր վտանգի տակ չենք լինի՝ հետևելով մարգարեական խորհրդին:
Ուզենք, թե չուզենք, բոլորս էլ ինչ-որ ձևով ընտրվել ենք նախաերկրային կյանքում, որպեսզի ծնվենք այս վերջին օրերին: Երկու իրականություն կա, որոնք կապված են վերջին օրերի հետ։ Առաջին իրականությունն այն է, որ Քրիստոսի Եկեղեցին կվերահաստատվի երկրի վրա: Երկրորդ իրականությունն այն է, որ ամեն ինչ իսկապես դժվար է դառնալու: Սուրբ գրությունները հայտնում են, որ վերջին օրերում «մի ուժեղ կարկտահողմ պիտի առաջ ուղարկվի՝ երկրի բերքն ավերելու»,7 պատուհասներ, 8 «պատերազմներ և պատերազմների համբավներ կլսվեն, և ողջ երկիրը խառնաշփոթի մեջ կլինի, … և անօրենությունը կշատանա»։9
Երբ երեխա էի, վերջին օրերի այդ մարգարեությունները վախեցնում էին ինձ և ստիպում ինձ աղոթել, որ Երկրորդ Գալուստը տեղի չունենա իմ օրոք, որն իհարկե մինչ այս պահը տեղի չի ունեցել։ Բայց հիմա ես աղոթում եմ հակառակի համար։ Թեպետ մարգարեացված մարտահրավերները միանշանակ տեղի կունենան,10 սակայն երբ Քրիստոսը վերադառնա թագավորելու, Նրա ստեղծած բոլոր բաները «ապահովությամբ կպառկեն»:11
Աշխարհում ստեղծված իրավիճակը խուճապի է մատնել ոմանց։ Մենք՝ որպես Աստծո ուխտի զավակներ, չպետք է ընկնենք այս կամ այն բանի հետևից, որպեսզի իմանանք, թե ինչպես կողմնորոշվել այս անհանգիստ ժամանակներում: Մենք չպետք է վախենանք։12 Այն վարդապետություներն ու սկզբունքները, որոնց մենք պետք է հետևենք՝ հոգևորապես գոյատևելու և ֆիզիկապես դիմանալու համար, գտնվում են ապրող մարգարեի խոսքերի մեջ:13 Ահա թե ինչու նախագահ Մ. Ռասել Բալլարդը հայտարարեց, որ «դա փոքր բան չէ ․․․ ունենալ Աստծո մարգարե մեր մեջ»։14
Նախագահ Ռասել Մ. Նելսոնը վկայել է, որ «Իր զավակներին մարգարեների միջոցով ուսուցանելու Աստծո՝ հնուց հաստատված օրինակը վստահեցնում է մեզ, որ Նա կօրհնի յուրաքանչյուր մարգարեի և Նա կօրհնի նրանց, ովքեր ականջ կդնեն մարգարեական խորհրդին»:15 Այսպիսով, լուծումը գտնվում է ապրող մարգարեին հետևելու մեջ:16 Եղբայրնե՛ր և քույրե՛ր, ի տարբերություն հին կոմիքսների և դասական մեքենաների, մարգարեական ուսմունքների գինը տարիների ընթացքում ավելի չի բարձրանում։ Ահա թե ինչու մենք չպետք է ձգտենք օգտագործել նախկին մարգարեների խոսքերը՝ մերժելով ապրող մարգարեների ուսմունքները:17
Ես սիրում եմ առակները, որոնք օգտագործել է Հիսուս Քրիստոսը՝ ավետարանի սկզբունքներն ուսուցանելու համար: Այսօր առավոտյան ես կցանկանայի ձեզ հետ կիսվել իրական կյանքի առակով:
Մի օր ճաշի ժամին ես մտա Եկեղեցու գլխավոր վարչության ճաշարան։ Ուտելիքը սկուտեղին ես մտա ճաշասենյակ և նկատեցի մի սեղան, որի շուրջը նստած էին Առաջին նախագահության բոլոր երեք անդամները, որտեղ կար նաև մեկ դատարկ աթոռ: Երբ անսվտահությունից ելնելով ես արագ շրջանցեցի այդ սեղանը, լսեցի մեր մարգարե՝ նախագահ Ռասսել Մ. Նելսոնի ձայնը, որն ասում էր. «Ալեն, այստեղ դատարկ աթոռ կա: Արի նստիր մեզ հետ»։ Ես նստեցի նրանց կողքին։
Ճաշի վերջում ես զարմացա, երբ լսեցի մի ուժեղ ձայն, իսկ երբ գլուխս բարձրացրի, տեսա, որ նախագահ Նելսոնը ուղիղ պահել էր իր պլաստիկ ջրի շիշը, իսկ հետո սեղմելով հարթեցնում էր այն՝ հանելով շշի կափարիչը:
Նախագահ Դալլին Հ. Օուքսն այնուհետև տվեց այն հարցը, որը ես ուզում էի տալ. «Նախագահ Նելսոն, ինչո՞ւ հարթեցրիք ձեր պլաստիկ ջրի շիշը»:
Նա պատասխանեց. «Դա հեշտացնում է վերամշակող կազմակերպությունների աշխատանքը, քանի որ այս տեսքով դրանք այնքան էլ շատ տեղ չեն զբաղեցնում վերամշակման տարայի մեջ»:
Մինչ վերլուծում էի այդ պատասխանը, ես նորից լսեցի նույն ճռճռոցը: Նայեցի աջ և տեսա, որ նախագահ Օուքսը հարթեցնում էր իր պլաստիկ ջրի շիշը նախագահ Նելսոնի նման: Այնուհետև ես աղմուկ լսեցի իմ ձախ կողմում, որտեղ նախագահ Հենրի Բ. Այրինգն էր հարթեցնում իր պլաստիկ ջրի շիշը, թեև նա այլ ռազմավարություն էր որդեգրել՝ հարթեցնելով հորիզոնական դիրքով, ինչն ավելի շատ ջանք էր պահանջում, քան՝ ուղղահայաց դիրքով։ Նկատելով դա՝ նախագահ Նելսոնը սիրալիր կերպով նրան ցույց տվեց շիշը հարթեցնելու եղանակը՝ շիշն ավելի հեշտ հարթեցնելու համար:
Այդ պահին ես շրջվեցի նախագահ Օուքսի կողմը և կամացուկ հարցրի. «Արդյո՞ք պլաստիկ ջրի շշի հարթեցումը ձեր ճաշարանի վերամշակման նոր պահանջ է»:
Նախագահ Օուքսը ժպիտը դեմքին պատասխանեց. «Դե, Ալեն, դու պետք է հետևես մարգարեին»:
Ես վստահ եմ, որ նախագահ Նելսոնն այդ օրը ճաշարանում վերամշակման նոր վարդապետության մասին չէր հայտարարում: Բայց մենք կարող ենք դասեր քաղել նրանից, թե նախագահ Օուքսը և նախագահ Այրինգը ինչպես անվերապահորեն արձագանքեցին18 նախագահ Նելսոնի օրինակին, և նախագահ Նելսոնը ինչպես ուշադրությամբ օգնեց նրանց դա անել ավելի լավ ձևով։19
Մի քանի տարի առաջ երեց Նիլ Ա. Մաքսվելը կիսվել է որոշ դիտարկումներով և խորհուրդներով, որոնք մարգարեական տեսանկյունից կարևոր են մեր օրերի համար.
«Առաջիկա ամիսներին և տարիներին իրադարձությունները, հավանաբար, կպահանջեն, որ յուրաքանչյուր անդամ ինքը որոշի՝ արդյոք հետևելու է Առաջին Նախագահությանը, թե՝ ոչ: Անդամների համար գնալով դժվար կլինի ընտրել երկու կարծիքների միջև: …
… Եկեք այնպիսի արձանագրություն թողնենք, որ ընտրությունները պարզ լինեն՝ մարգարեական խորհրդին հետևելու ընտրությունը թողնելով մարդկանց …
«Հիսուսն ասել է, որ երբ թզենիների տերևները աճում են, իմանում ենք, որ «ամառը մոտ է»։ Այդպիսով զգուշացնում է, որ մեզ մոտ արդեն ամառ է, և եկեք չբողոքենք շոգից»։20
Աճող սերունդը մեծանում է այն օրերում, երբ թզենու տերևներն ավելի շատ են և ավելի տաք է: Այդ իրողությունը ավելի մեծ պատասխանատվություն է դնում արդեն իսկ չափահաս սերնդի վրա, հատկապես, երբ խոսքը վերաբերում է մարգարեական խորհուրդներին հետևելուն: Երբ ծնողներն անտեսում են ապրող մարգարեի խորհուրդները, նրանք ոչ միայն կորցնում են իրենց խոստացված օրհնությունները, այլ որ ավելի վատ է, ուսուցանում են իրենց երեխաներին, որ այն, ինչ ասում է մարգարեն, կարևոր չէ, կամ որ մարգարեական խորհուրդը կարող է ընդունվել ընտրովի՝ առանց անհանգստանալու դրա հոգևոր թերսնուցման հետևանքների համար:
Երեց Ռիչարդ Լ. Էվանսը մի անգամ ասել է. «Որոշ ծնողներ սխալմամբ կարծում են, որ կարող են մի փոքր իջացնել վարքագծի և հնազանդության նշաձողը… որ նրանք կարող են մի փոքր մեղմացնել հիմնական սկզբունքները՝ առանց ազդելու իրենց ընտանիքի կամ նրանց ապագայի վրա: Բայց եթե ծնողը մի փոքր շեղվի, երեխաները, հավանաբար, կգերազանցեն ծնողի օրինակը»:21
Որպես մի սերունդ, որը վերջին օրերին սուրբ պարտականություն ունի՝ նախապատրաստելու աճող սերնդին իր մարգարեացված դերի համար,22 որը պետք է կատարվի այն ժամանակ, երբ հակառակորդի ազդեցությունը հասնի իր գագաթնակետին,23 մենք չենք կարող շփոթության աղբյուր դարձնել մարգարեական խորհրդին հետևելու կարևորությունը։ Հենց այդ խորհուրդն է, որը թույլ կտա աճող սերնդին տեսնել «թշնամուն, մինչ նա հեռվում է. և ապա [նրանք կպատրաստվեն]»՝ դիմակայելու թշնամու հարձակմանը։24 Մեր թվացյալ փոքր շեղումները, լուռ անտեսումը կամ շշուկով քննադատությունները՝ ի պատասխան մարգարեական խորհրդի, կարող են բերել նրան, որ մենք քայլենք ուխտի արահետի վտանգավոր եզրով, սակայն երբ հակառակորդը մեծացնի դրանց ազդեցությունը աճող սերնդի կյանքում, նման գործողությունների արդյունքում նրանք ընդհանրապես կհեռանան այդ արահետից: Սերունդները մեծ գին կվճարեն դրա համար:25
Ձեզանից ոմանք գուցե կարծում են, որ ամբողջովին չեն հետևել նախագահ Ռասսել Մ. Նելսոնի խորհուրդներին։ Եթե դա այդպես է, ապա ապաշխարեք և նորից սկսեք հետևել Աստծո ընտրյալ մարգարեի խորհրդին: Մի շեղվեք մանկական մուլտֆիլմերի պատճառով և վստահեք Տիրոջ օծյալին: Ուրախացեք, որովհետև նորից «մարգարե կա Իսրայելի մեջ»։26
Նույնիսկ եթե վստահ չեք, ես վկայում եմ, որ մենք կարող ենք դիմակայել և նույնիսկ ծաղկել վերջին օրերի շոգին։ Մենք վերջին օրերի սրբերն ենք, և սրանք հրաշալի օրեր են: Մենք ցանկանում էինք երկիր գալ այս ժամանակ՝ վստահ լինելով, որ մեզ կօգնեն չսայթաքել, երբ անցնենք հակառակորդի՝ աճող մութ ու շփոթեցնող խավարի մեգի միջով,27 իսկ փոխարենը՝ խորհուրդներ և առաջնորդություն կստանանք նրանից, ով լիազորություն ունի մեզ և ամբողջ աշխարհին ասելու․ «Այսպես է ասում Տեր Աստված»:28 Այն մարգարեի սուրբ անունով, որին Աստված բարձրացրեց, որը Իսրայելի Սուրբն է,29 Հիսուս Քրիստոսի անունով, ամեն: