Maa, Aū, ma Polokiona

O le savali atu i le fale mai le aoga e masani lava ona le manaia tele. O nisi taimi ou te mafaufau ai i la’u meaaoga o le numera o loo ave e fai i le fale, o nisi taimi ou te mafaufau ai i mea sa matou faia i le vasega faamalositino, ae o nisi taimi ou te savali ai e aunoa ma se mea tele ou te mafaufau i ai.

Peitai na ese le aso lenei. Sa le malolo lo’u mafaufau. Sa ou vaaia i luma atu o au ni aualii e toalua o nisi o tamaiti sa matou taaalo faatasi i nisi o taimi, o—Iose ma Makesi—o faia ni polokiona ma faaolioli mai ia te a’u.

“Ei, Tavita, sau ii!” o le ee mai lea a Iose, ma ata. “E i ai se mea ma te fia faaali atu ia te oe.”

Sa ata foi Makesi.

O Iose ma Makesi e tasi le tausaga e matutua uma ai laua ia te au, ma e malolosi tele a laua togi. Sa ou iloaina e le o toe umi ae amata ona la tauaia mai ni polokiona agai ia te au. E ui ina e masani lava ona la faia lelei a’u, ae sa ou mafaufau atonu ua la tuuina ni aisa i totonu o polokiona.

Sa amata ona ou mafaufau i ni auala e mafai ona ou taofia ai a laua osofaiga.

Tamoe i le isi ituala e aloese ai ma i laua? Leai, o le a la ula mai ai ma faifai pona mai ia te a’u.

Tamoe saoasaoa ia tea ese ai ma i laua? Leai, e sili atu lo la saoasaoa nai lo a’u ma o le a vave ona la mauaina au.

Ia faaputu foi sa’u polokiona e osofai atu ai? E le o se manatu lelei lea, pe a mafaufau atu e toalua i laua ae na o a’u. Na lelei foi lo laua tulaga i le tumutumu o le matie, ma sa leai se mea ou te lafi ai i le pito i lalo.

Sa tonu loa ia te au e fai le mea na talafeagai—savali filemu ia tea ese ma i laua ma faatali mo le felelei mai o polokiona.

A o ou latalata atu i le matie, na oo mai se manatu i lo’u mafaufau. Sa ou manatuaina Samuelu le Sa Lamana, o le na talaiina atu le talalelei a o tu i luga o le pa. Ina ua le fiafia tagata i mea na ia fai atu ai, sa latou tauai atu maa ma tafana atu aū ia te ia.

Na ou iloaina sa puipuia e le Alii ia Samuelu mai maa ma aū. Atonu e mafai foi ona Ia faia ia le tau ni polokiona ia te a’u.

Sa fai sa’u tatalo i lo’u mafaufau, ma ole atu i le Tama Faalelagi ina ia le tau ni polokiona ia te a’u. Sa ou iloaina sa manaomia ia ou toa ma aua le masalosalo—e pei lava o Samuelu. A o ou taunuu atu i le matie, sa ou lagonaina se lagona mautinoa o le a ou le afaina.

E pei lava ona ou faamoemoeina, na amata ona felelei mai polokiona. Sa latalata le alamū o nisi o polokiona i lo’u ulu, lea na ou lagonaina lava le savili a o alamu ane. O nisi polokiona na misi i o’u lima, ae o nisi na pauu tonu lava i lalo o o’u vae, ae na leai ma se mea na ou lavea ai. Leai ma se polokiona se tasi!

Sa faaauau lava ona tauai mai e le aualii seia oo ina ou tea ese, ae na ou iloaina sa ou saogalemu. O le taimi na totoe o la’u savaliga i le fale, sa le malie tele—ma sa leai ma se isi mea sa sili ona ou fiafia i ai. Sa puipuia a’u e pei o Samuelu le Sa Lamana. Sa ou iloaina o le tatalo ma le faaalia o le faatuatua i le Alii na faamanuiaina ai a’u.