O Faiaoga Asiasi na Taitaiina Atu Au ia Iesu Keriso

I le faaiuga o le vaitau o le 1970, sa fai mai ai sa’u uo ma te o i le Aualofa. “O le a lena mea?” o la’u fesili lea. Sa na o le fai mai lava o la’u uo, “Sau e vaai.” Oka! sa ou maofa i le taimi muamua lava.

O se taimi mulimuli ane o lena taumafanafana, na sau ai Leane i lo’u fale ma fai mai o ia o lo’u faiaoga asiasi. Sa foliga o se mea na ese ma manaia i le taimi lava e tasi, ae maise lava o le taimi lea sa le o au o se tagata o le Ekalesia. Ae o lenei ua ia faaavanoaina le taimi mai ana fuafuaga pisi e faasoa mai ai se mafaufauga faaleagaga ma vaai pe na i ai se mea e mafai ona fesoasoani mai ai ia te a’u. Sa ou iloaina mai lona agaga sa faamaoni o ia. E le o galo lava ia te au ia Leane ma savali sa ia faasoaina mai ia te au.

Na mavae atu ni nai tausaga, ma na siitia mai Faranisisi i le matou uarota. O le mea moni, sa le o se “matou” uarota mo’i aua sa le o au o se tagata o le ekalesia, ae sa ou mafaufau i ai faapena. O le taimi lenei ua toalua la’u fanau teine laiti, ma sa mafai ona ou iloa le faamanuiaina o o laua olaga e ausilali a le Ekalesia. Na tusa lava pe timu pe la, sa asiasi mai lava ia Faranisisi o lo’u faiaoga fou o aiga, ma se lesona, se ata, se tala, po o se lima fesoasoani. Ou te manatua ina ua sau Faranisisi i se tasi o aoauli pisi. O le vaai mai na le mafai ona ou nofo i lalo e talanoa, o lea na saeu ai e Faranisisi la’u kuka i luga o le ogaumu a o ou taulimaina manaoga o la’u fanau teine.

Na mavae tausaga ma sa ou siitia ese. E ui i lo’u le manao e tuua au uo o le Ekalesia, ae sa vave ona ou maua se isi vaega o uso ma ni molimau malolosi ma ni loto tetele i le Aualofa i “la’u” uarota fou. Sa tuuina mai e se faiaoga o le Aualofa ia i matou se lisi ua teuteuina o mea e fai ma uunaia i matou e tusi ai le “Ia agalelei” i le pito i luga o a matou lisi i aso taitasi. Sa matou manatu ma ni uso sa nonofo i ou tafatafa o se manatu matagofie tele lea, ae maise lava ona e lagolagoina ai le mautauave a le Aualofa “E le uma le alofa” (Moronae 7:46).

Ona ou faitau lea i se tala e uiga i se tamaitai paionia. A o laitiiti lena tamaitai, sa talosagaina e le perofeta lona aiga e fesoasoani e faato’a se nuu o le Au Paia o Aso e Gata Ai i se eria taumamao. Sa tupu se mala ina ua maliu se tasi o nai ona tei. Sa matuai faavauvau lona tina, ma sa oo le faanoanoa tele i le aiga.

O se tasi aso sa vaavaai atu ai lenei teineitiiti i fafo o le faamalama. I le mamao sa oo i ai lana vaai, sa siomia le fale faatauvaa o le aiga i le kiona. A o sioa atu le teineitiiti i le tafailagi, sa ia vaaia ni tagata se toalua o tauasa agai mai i le fale. Sa o mai, sa agai malie mai, ma na faafuasei ona iloa e le teineitiiti i laua—o i laua o faiaoga asiasi a lona tina.

O lena tala na musuia ai a’u. Sa ou papatiso ia Me 1983. O se faamamaluga le avea o au ma se faiaoga asiasi. Ou te fiafia tele e fegalegaleai ma tamaitai e toatele o e ua fai ma faataitaiga o “tamatai amiolelei” o e “silisili lona tau i penina” (Faataoto 31:10). E matagofie naua le faatasi ai ma tamaitai o e o loo taumafai foi ia agalelei, ia alofa le tasi i le isi, ma aumaia isi ia Keriso.