Ia Faamaoni

I le vaitaimi o le 20 ma ona tupu o o’u tausaga, sa tatau ai ona ou sueina se suega na sili ona faigata ina ia ou sao ai i totonu o se aoga iloga faapisinisi i Farani. Sa ou suesue mo ni itula se tele i aso uma lava mo le lua tausaga. Ae sa ou alu foi i taimi uma lava i le lotu ma le inisitituti ma fai ou tiute o le Ekalesia.

O le vaega aupito taua o le suega o le faatalanoaga. Sa fai sa’u faatalanoaga ma se tasi o aoga, ma ina ua latou iloa o a’u o se tagata o le Ekalesia, sa le’i tulaga lelei.

Ona ou sueina lea o le suega i le aoga sa sili ona ou fia alu i ai. Ina ua mavae sina taimi i le faatalanoaga, sa amata ona fesili mai le au faifaatalanoaga e uiga i mea ou te faia i tua mai o itula ou te suesue ai. Sa ou iloaina o se fesili lea ou te sao ai/pe ou te le sao ai foi. Ae sa ou filifili i se taimi vave o le a ou faamaoni i o’u talitonuga.

Sa ou faapea atu, “O a’u o se tagata O Le Ekalesia a Iesu Keriso o le Au Paia o Aso e Gata Ai,” ona ou faaaluina lea o le 15 minute e faamatala atu ai a’u mea na fai i le Ekalesia.

Sa faapea mai le faatonu o le aoga, “E te iloa, ua ou fiafia ua e tauina mai lenei mea. A o avea au ma se tagata aoga, sa ou aoga i le Iunaite Setete, ma o se tasi o a’u uo lelei lava o se Mamona. O ia o se tamalii maoae, o se tagata sili ona agalelei. Ou te manatu o tagata Mamona o ni tagata lelei tele.”

Oka se faamama avega! O a’u o se tasi o tagata muamua i lena tausaga na taliaina i lenei aoga.

E lua ni lesona mai lenei tala. Muamua, e le tatau ona tatou manatu faatauvaa i le aafiaga tatou te faia i isi. Lona lua, e tatau ona tatou faamaoni i taimi uma i o tatou talitonuga. Taumafai e fai le mea sili e te mafaia, ma o le a fesoasoani ia te oe le Alii e faataunuu mea o totoe.