Aoao mai le Au Popoto

I le avea ai ma se fomai tipitipi, e masani ona fesiligia a’u pe na faapefea ona ou mauaina o’u tomai. E manatu nisi e ave e se tagata se vasega, matamata i le faiga o se taotoga, ona tuu loa lea o ia e galue. E i ai se faaupuga faaataata i aoaoga faamasani e faapea: e tasi le vaai, tasi le faiga, tasi le aoaoga. Ae peitai, e leai ma se tasi o na faaupuga e moni.

Sa ou mauaina o’u tomai ma le malamalama faapolofesa i lalo o le taitaiga a le toatele o fomai talenia ma onosai. Sa ou amata muamua i le vaavaai mamao mai ona sosoo ai lea ma le vaai latalata. I le mavae ai o se tausaga o le matau, sa tuuina mai ia te a’u ni galuega laiti, o le fesoasoani i le fomai tipitipi ma lona “fesoasoani muamua”—le fomai tipitipi fesoasoani.

Ina ua mavae se isi tausaga, sa faatagaina a’u ou te tu mai i le isi itu o le laulau mai le fomai tipitipi ma avea ma fesoasoani muamua i le taimi o taotoga faigofie. Ina ua mavae se isi tausaga pe lua, sa faatagaina au e avea ma fesoasoani muamua i taotoga e fai sina faigata. Ona amata ai lea ona ou faia taotoga aupito faigofie, e pei o le faaleleia o se totoga pau, ae avea le fomai tipitipi atamai ma o’u fesoasoani muamua.

I lo’u tausaga mulimuli o aoaoga faamasani—i le fitu o tausaga talu ona uma a’u aoga faafomai—na faatagaina ai loa a’u e fai taotoga faigata atu, a e fai le fomai tipitipi ma fesoasoani muamua. Na ou iloaina o faiaoga sili ona lelei e mafai ona faagasolo leleia le taotoga e ala i la latou fesoasoani aua e mafai ona latou faaali mai ia te au mea e tatau ona fai i auala manino ma faigofie—o auala na latou aoaoina e ala i lenei lava faiga e tasi o le faufautua.

Ou te le’i talisapaia atoa le taitaiga a nei fomai tipitipi maoae ma le talenia o e na avea ma o’u fesoasoani muamua seia oo ina maea a’u aoaoga faamasani ma mafai ona ou galue na o a’u lava. Ae peitai, e oo lava i le 30 tausaga muilmuli ane, o loo ou manatua pea o’u faiaoga a o ou faaaogaina i aso taitasi ia tomai sa latou tautiga ai e aoao mai, faasino mai, ma faasa’o mai.

Ua le ese lava ma le aoaoina o mataupu faavae o le talalelei. Ua aoaoina i tatou i le upu ma le upu e ala i aafiaga—e se Faiaoga faapalepale. Tatou te vaai atu ia te Ia, mulimuli i Ana faataitaiga, ole atu mo musumusuga, ma e faamanuiaina i tatou e lo tatou Tama Faalelagi i le taitaiga—lea e masani ona maua mai e ala i le Agaga Paia, o saunoaga a perofeta soifua, o tusitusiga paia, ma isi o e alolofa ma auauna atu. O lo tatou Taiala e peiseai o loo tu i o tatou tafatafa a o tatou maua le to’a, faalauleleia lo tatou ala, tuuina mai faasaoga moomia, tali i fesili, ma ofoina mai le tele ma le tele o le faatuatuaina a o tatou faamaonia lo tatou agavaa ai.

O nisi tagata aooga faafomai tipitipi e naunau lava ia galulue na o i latou, e fai mea i a latou lava ala. E faapena foi ona tatou taumafai i isi taimi e galulue e aunoa ma lo tatou Taiala poto. Peitai, ua ou aoaoina, i le tele o tausaga o avea a’u ma fomai tipitipi, e oo mai lava i le taimi nei, ou te moomoo lava mo le ma teufatuina se fesoasoani muamua e sili atu mea na te iloa nai lo a’u—ae maise lava pe afai o tulaga faaletonu ola ma agaga o tagata!

O lo tatou tuputupu ae i le talalelei na amataina i le olaga i le muai olaga, ma faaauau mai ai iinei, ma o le a le masalomia lava le faaauauina pea pe a maea o tatou olaga i le tino. Ae o vaega uma o o tatou aafiaga, na oo muamua i ai lo tatou Faaola, ma faailoa mai tomai e manaomia ina ia tatou manuia ai. Ma ua Ia valaauliaina tagata uma e faalagolago ia te Ia ma Lona atamai.