Tamaitai Talavou, Ia Tutulai ma Susulu Atu!

O le autu o le Mutuale i le tausaga lenei o se valaau mo oe ia avea ma se taitai. O se valaau mo oe ia taulamua i le mama, tausaafia, ma le paia. O se valaau e sui le lalolagi!

Ina ua avea oe ma se vaega o le faalapotopotoga a Tamaitai Talavou, na tuuina atu ia te oe se asoa o se sulu lanu auro ma le paepae e asoaina o se faamanatu e faapea, i le avea ai ma se tamaitai talavou i totonu O Le Ekalesia a Iesu Keriso o le Au Paia o Aso e Gata Ai, o le a e tu atu mo le upumoni ma le amiotonu ma ia tulai ma faasusulu atu lou malamalama i le lalolagi. O lona uiga o le a e faamaoni i lou faasinomaga paia o se afafine faapelepele o le Atua. O lona uiga o le a e taumafai e tu o se molimau ia te Ia ma le Faaola “i taimi uma ma i mea uma, ma i nofoaga uma” (Mosaea 18:9).

Matou te faamoemoe, o le tausaga lenei o le a e asoaina ai ma le mitamita lau asoa e faamanatu atu ai ia te oe lava o oe o se faataitaiga ia i latou e siomia oe. O le a e “susulu atu” pe a e tatalo i aso uma, faitau i le Tusi a Mamona, usitai i tulaga faatonuina i le Mo Le Malosi o le Autalavou, ma ataata. Matou te iloa a e tausia poloaiga ma ola i tulaga faatonuina o loo maua i le Mo Le Malosi o le Autalavou, o le a e faasusuluina atu le olioli ma agavaa ai e taialaina [oe] e le Agaga Paia. O lenei taiala o le a mafai ai e outou taitoatasi ona fai filifiliga o le a fesoasoani e te agavaa ai e maua se pepa faataga o le malumalu.

I le avea ai ma se au peresitene aoao o Tamaitai Talavou, matou te molimau atu, a o e faia nei mea, o le a i ai iina le Faaola e faamalamalama lou ala. Ua Ia folafola mai ia te oe, “Ma o le a avea foi a’u ma o outou sulu … ; ma o le a ou saunia le ala i o outou luma, e tusa ma lo outou tausiga o a’u poloaiga; … ma o le a outou iloa ai o a’u lava ua taitaia outou” (1 Nifae 17:13).