Lototoa e Tatalia ai le Afa

I le po lona lua o le tolauapiga a Tamaitai Talavou o le matou siteki, sa matua mamafa timuga ma se asiosio. Pe tusa ma le 24 tamaitai talavou o la’u uarota sa i ai i le tolauapiga faatasi ai ma ni taitai se toalua, ma sa matou taufaaofiofi uma i se tama’i fale. Sa matua mamafa timuga, ma sa faasolo ina malosi le matagi. Sa ou faamanatu pea lava pea ia te a’u lava ia le tatalo mo le saogalemu lea sa faia e lo matou peresitene o le siteki i se taimi ua mavae. Sa fai foi le tatalo a le matou lava vaega o le matou uarota i lo matou fale, ma sa ou faia foi a’u lava tatalo.

O le toatele o teineiti na fefefe, ma na iloagofie le mafuaaga. E le malosi tele lo matou fale, ma sa matou i ai i tafatafa tonu o se vaitafe. Pe tusa ma le 20 minute na matua malosi ai lava le afa, ma o lea na tamomoe uma ai le siteki mai fale o a latou uarota i fale o le au fesoasoani, sa maualuga le nofoaga na i ai. Sa toe fai foi e lo’u peresitene o le siteki le isi tatalo, ma matou usuina ni viiga, pese o le Peraimeri, ma pese o le tolauapiga i se taumafaiga e faamafanafanaina i matou lava. Ioe, na matou fefefe, ae na matou lagona o le a lelei mea uma. Na mavae se afa itula mulimuli ane, ona mafai ai lea ona matou toe foi i fale o a matou uarota.

Na matou iloa mulimuli ane le mea na tupu i le asiosio i lena po. Na vaeluaina i ni afa se lua. O le isi na faataamilomilo ia i matou i le itu taumatau a o le isi i le itu tauagavale. O le vaega na matou aafia ai e le’i taitai lava oo i lona malosi!

Ou te iloa sa faafofoga mai le Atua i a matou tatalo i lena po ma sa Ia puipuia i matou mai le ogaoga o le afa. Aisea o le a vaeluaina ai se asiosio pe a le finagalo ai le Atua? Ou te iloa i afa o le olaga, e mafai ona tatou tatalo i taimi uma i le Tama Faalelagi ma o le a Ia faafofogaina ma tali mai ia i tatou, ma aumaia le lototoa ma le puipuiga tatou te manaomia ina ia tatou saogalemu ai.